2009-12-31

الجناح الطائر

الجناح الطائر هو اسم طائره شبح كان الالمان يطورونها لقصف المساكين الاميركان ايام الحرب العالميه الثانيه. قناه أمريكيه أعدت برنامج خاص عن هذه الطائره و قام فريق مختص ببناء هيكل كامل لهذه الطائره لاختبارها و لمعرفه مدى فاعليتها بالاختباء من الرادارات الامريكيه . الفريق هذا أستنتج ان 60-80%من جسد الطائره لن يرى على الرادارات و بالتالي كان سيعطيها عنصر المفاجأه في اي غاره جويه . محركها النفاث سوف يعطيها عنصر السرعه للتغلب على الطائرات الامريكيه و بالتالي ستكون اي معركه محسومه لصالح الالمان. كانت هذه الطائره ستخصص لقصف الاميركان و بالتالي قلب موازين الحرب " من حجيتله لابو فاضل جيراننا الي قاري تاريخ العالم ضرب ايد اب ايد وكال ليش مسواهه هتلر و خلًصنه من الاميركان " طبعا اكيد هتلر جان صار اضرب من الاميركان لو رابح الحرب بس هذا مو مربط فرسنه
البرنامج قدم الطائره على انها " لو نجح الالمان بانتاجها " لكانت قلبت موازين الحرب و لما استطاعت أمريكا و حلفائها أنهاءالحرب لصالحهم و تخليص العالم من بعبع هتلر و لكن الاميركان و لحسن الحظ انهوا الحرب لصالحهم و خلصوا العالم من شر النازيين. وين سامعين نفس القصه ؟؟؟ ها هسه أتذكرت...نفس قصه حرب العراق و اسلحه الدمار الشامل اللي ما لكوهه بالاخير
نرجع الى قصه الطائره الالمانيه. مره رحت الى طبيب أسنان فلته . هوه أجنبي من بريطانيا بس كلش حباب " لا عبالكم آني ساكن بالمنطقه الخضراء لو آني من جماعه الحواسم بس اثناء عملي مع احد الشركات الاجنبيه في الامارات تضررت اسناني نتيجه حادث و التأمين دزني على هذا الدكتور
المهم هذا الدكتور كان عنده واهس بالطيارات و كان من المهاره انه مختص بتجميع و اعاده تصنيع الطائرات المروحيه القديمه " سبع صنايع بس بخته ما ضايع " و انه يمارسها كهوايه " آني اكثر هوايه مكلفه لي كانت ركوب البايسكل
دكتورنا هذا سألته انا عن هذه الطائره . بعد ما بدأ يشتغل بحلكي وأتأكد انه ما راح أكدر أحجي أو اقاطعه انفتح مثل البوري و كام يحجي على هالطياره. قال الدكتور" والعهده عليه " انه أشتغل مع مهندس طائرات الماني عجوز بتجميع طائره قديمه . التقى بهذا العجوز في نادي هواه و محبي و مختصي تجميع هذا النوع من الطائرات " خما مثل جماعتنه بالكهوه و كاتليهه بشرب النركيله و الجكاير " و كان هذا العجوز مهندس يسكن في بريطانيا مع زوجته البريطانيه والتي استقر معها منذ زمن طويل
.
ما أطولهه عليكم المهندس العجوز كله لدكتورنا هذا انه هذه الطائره كانت عباره عن خرده طائره . كان الطيار لا يستطيع ان يتحكم بشكل عملي في حركاتها و لم تكن لها القدره على المناوره و اضافه الى ذلك فأن صوت المحرك كان يصم آذان الطيار فيفقده القدره على التواصل مع القاعده أو بقيه السرب لكون مقعد الطيار قريب من المحرك . و بالاضافه الى هذا فقد كانت وضعيه الطيار داخل الطائره تشبه وضعيه الانبطاح مما يفقد الطيار القدره على الرؤيه بشكل واضح و بالتالي تؤثر على امكانيه التحكم و المناوره
ساعه يحجي و آني حلكي مفتوح وهو يصلح أسناني و اتمنيت لو ما سالته . بالنهايه ختمهه بعد ما خلاني اتمضمض و اسد حلكي و كاللي . شوف لبيب هاي الطياره لا كانت راح اطير و لا كانت راح تكدر اتسوي شئ ." معناتهه كل حجي الاميركان طلع خرط". سبحان الله هالامريكان ما يبطلون كذب
بالنهايه شكرته على العلاج و على المعلومات اللي وضحها اللي و آني بدوري انطيته معلومه مهمه و كتله
شوف دكتور الاميركان دائما ايبينون للعالم على انهم منقذيهم واعلامهم يلعب دور مهم بهاي المسأله "طبعا جنت دا أحجي وياه بالانكليزي المكسًر مو بالعاميه مالتنه مثل مدا أكتبها الكم " و كتله ..دكتور مره اللخ اذا الاميركان رادوا أيورطوكم بحرب مثل حرب العراق اوكفوا بوجوههم و كسروا اسنانهم أذا اصروا انوا يجرجروكم وياهم" لا تسألوني شلون كلت يجرجروكم بالانكليزي" بس الله يعلم
فقال الدكتور" يا ريت نكدر نكسر اسنانهم جان صارت عيادتي عامره و اتزنكنت أكثر" طبعا كالهه بالانكليزي الفصيح مو بالعاميًه مالنا مثل ما آني كاتبهه

في ليله غاب فيها وجه القمر

في ليله غاب فيها وجه القمر و أشتد الحر حتى اثناء الليل و فارقتنا الكهرباء كعادتها خرجت الى باب البيت حتى اكسر الرتابه و انسى النوم الذي هرب منًي . و عندما خرجت و جدت الجيران قد فعلوا الشئ نفسه فقلت في نفسي "حشر مع القوم عيد " و انضممت اليهم لنتجاذب اطراف الحديث و لنقتل الوقت .

قال ابو فاضل " جيراني الحايط بالحايط " والله ياوليدي الواحد ما ديكدر ينام من وره هالكهرباء . والله هاي ما صايره بتاريخ العالم . أول مرًه اعرف انو الحجي أبو فاضل قارئ نهم لدرجه انه قرأ كل تاريخ العالم و أستنتج ان الوضع الذي نعيشه لم يعشه أحد من قبل

الحجيه أم حيدر قالت . والله هذا الحر كتلنه . ايام بيبيتي جنه انام بالسطح بس ما جان أكو هيجي حر. دخيلك يا ربي

قلت لها: حجيه هذا كلها بسبب الاحتباس الحراري.

كالت : شنو هذا وليدي. هم شغله جديده جتًي ويه الاميركان

لا حجًيه هاي شغله عالميه . الحجي ابو فاضل يكدر يشرحه لانه قاري تاريخ العالم

الحجي ابو فاضل عقًب قائلا : ابني آني شمفهمني بهاي الشغله ليش آني طالع برًه محلتنه هاي حتى أعرف شنو هذا المحبس الحراري

الحجيه ام فاضل زوجته قالت: حجي شلون ما طالع بره. مو ذيج السنه رحت يم فاضل بالامارات و لزمت واحد لابس عمامه و عنده لحيه و كعدت تسب بيه و باسامه بن لادن و بعدين طلع واحد هندي من السيخ لا مسلم و لا حتى يعرف يحجي عربي

انتفض الحاج ابو فاضل و قال: آني شمعرفني انهو اللبس مال السيخ يشبه لبس مشعول الصفحه ابن لادن

هنا تدخلت الحجيه رسميه زوجه ابو جاسب وقالت : المصيبه في البك " البعوض " اللي ثابرنا .هم هوه و هم الحر علينه

قلت لها : خما راح اذبيهه براس الاميركان شغله البك هاذي

قالت : لعد شنو... شوف المجاري الطافحه . شوف الزبل اللي بكل مكان و ماكو احد يرش مبيد مثل كبل لعد كل هذا براس منو نذبه مو براس الاميركان و الحكومه اللي جابوهه

قلت في نفسي: و الله الحجيه رسميه تفتهم و آني اللي عبالي الحجي ابو فاضل احسن واحد يفتهم باعتباره قاري تاريخ العالم

والله بعد مندري وين نودي وجهنه و وين نروح. لاالمحافظ يسمعنا ولا الحكومه تسمعنا و مندري بعد وين نروح حتى الملله توماس عبالنه يكدر يسوينه شي طلع اضرب منهم و اللي كدر عليه انو كال النا " روحو صلًو ميت ركعه و أدعوا الله ليفرج كربه الامام المهدي و يعجل فرجه" ....شنو علاقه الامام بالكهرباء قابل هوه فني مولدات....اردفت الحاجه رسميه

قلت لها: و الله حجيه آني جنت ناوي أكتب للبابا بلكت يحجي ويه أحد و يسويلنه حل بس من شفت اللي سوته بيه هاي البنت من عبرت السياج ووكعته كلت يمعود هذا اللي بيه مكفًيه

قالت الحجيه ام حيدر: اسم الله على ابوك منو اللي وكًعه.

وقبل أن اوًضح للحجيه أم حيدر شغله البابا أفرجت الحكومه عن الكهرباء و تراكض الجيران ليشغلوا المبردات و لينعموا بقليل من النوم و قالت الحجيه أم حيدر و هي تهرول الى بيتها

كلهه للوالده باجر نجي نزوركم و نشوف ابوك ونشوف شنو شغله هاي المكموعه اللي وكعته

قلت لنفسي اروح انام أحسن

2009-12-30

تصريح كبير لاستاذ اكبر



نشرت مجله ايلاف الالكترونيه هذا التصريح عن فطحلنا المستشار الدكتور العلاًمه موفق الربيعي اطال الله لحيته و قد جاء بالتصريح الآتي


لندن: قال مستشار الأمن القومي العراقي سابقاً رئيس تيار الوسط موفق الربيعي الذي يتزعم تيار الوسط احد مكونات الائتلاف الوطني العراقي "الشيعي" المنافس الاكبر لقائمة دولة القانون بزعامة المالكي في الانتخابات المنتظرة " انه من خلال قرائته للساحه السياسيه والشعبيه فأن المالكي لا يرغب بالتجديد لدورة ثانية بمنصب رئيس الوزراء" الذي تولاه في ايار (مايو) عام 2006. واكد الربيعي في بيان صحافي تلقت "ايلاف" نسخة منه اليوم انه "سمع من المالكي شخصيا في السر والعلانية وفي عدة مناسبات".. فيما بينهما وبحضور اخرين انه ليس راغبا بالتجديد لدورة ثانية "واعتقد ان هذا شيئ سليم اتفق به معه وقد اكبرته لترفعه وعلو شأنه

".
تعليق من حضره جنابي : و الله فريت الديلكو عندي . يكول بالتصريح انه من خلال قراته للساحه السياسيه والشعبيه " ما ادري مصدر الشعبيه هاي منين و همه ساكنين بالمنطقه الخضراء و ما يطلعون منهه غير بحمايه " فأن المالكي لا يرغب بتجديد لدوره ثانيه . ليش هو فاز الاول حتى يرفض التجديد .و بعدين شنو قصده هل يعني انه بعد قرائته للساحه الشعبيه عرف انه شكد همًه مكروهين من قبل الشعب .والله اذا القصه هيجي فلازم المالكي ينطي دروس محو الاميه لبقيه اعضاء الحكومه حتى يعلمهم يقرون الساحه الشعبيه زين بلكت يحسون على دمهم . اما على صعيد الساحه السياسيه و قراءات المالكي فالظاهر عرف جماعته زين و عرف انه يكتلون ابوهم على المنصب وخاف ليجيه السره. وبعدين يكول ان قرار المالكي شئ سليم و انه يتفق معه...يعني شنو قصده المالكي مو كدهه لو شنو....هنا انتهى تعليق جنابي على هالفقره


وأشار الى ان الديمقراطيات الفتية الخارجة لتوها من انظمة ديكتاتورية تحتاج الى فترة طويلة من اجل بناء ثقافه ديمقراطية تعتاد عليها شعوبها في تبادل السلطة وتغيير الحكام وهذا ماحدث في دول اوربا الشرقية التي خرجت من الانظمة الشمولية الشيوعية وتحولت الى ديمقراطيات فتية حيث يتغير رؤساء الوزراء فيها كل اربعة سنوات الى ان استقر الوضع السياسي والامني فيها لان الشعوب التي اعتادت على انظمة شمولية استبدادية منفردة تميل الى العودة اليها خاصة اذا كانت تمر بظروف امنية صعبة وهناك تجربة اخرى تتمثل بماحدث في جنوب افريقيا بعد نهاية حكم التمييز العنصري للبيض ضد السود ومجيء (مانديلا) وبقائه فترة واحدة حيث رفض تجديد رئاسته لدورة ثانية.


تعليق ثاني من جنابي: بشرفكم افتهمتوا شي من اعلاه و شنو علاقه مانديلا بتجربه اوروبا الشرقيه


واضاف الربيعي انه لاحظ من خلال تجربته الشخصية في الدولة خلال السنوات الست الماضية التي واكب فيها الحكومات العراقية المتعاقبة منذ سقوط النظام السابق " حصول تغيير في سلوكيات عموم المسؤولين عما كانوا عليه عند بدء استلامهم المسؤولية وبعض هذا التغيير واضح للشعب العراقي" كما قال من دون توضيح ماهية هذا التغيير

.
تعليق ثالث من جنابي " اسف على المقاطعه مثل أعلانات التلفزيون ": أول مرًه يحجي حجي يخبًل ففعلا هناك تغييرات في سلوك المسؤولين فما أن يجلسوا على الكرسي حتى يبدأ اللغف من اليمين و اليسار ..لعد شعبالكم و الاً تكدرون تكولولي منين خريبط الحدقجي اشترى بيت و اسس شركه لتوريد المبيدات و صاروا يصيحوله استاذ . و اتفق معه ان هذا التغيير واضح للشعب العراقي . شفتوا تره الرجال يفتهم


واكد الربيعي اعتقاده بأن رئيس الوزراء المقبل سيكون مرشحا من الائتلاف الوطني العراقي "لأنه سيكون الكتلة الاكبر" واوضح ان هذا نابع من ثقته بوعي الشعب العراقي في اختيار الاصلح

آخر تعليق و داعتكم : و الله عرفنه انك مستشار و دكتور بس هاي اول مره نعرف بيك تقره فنجان ...يا ولدي

2009-12-29

ليش ماكو خدمات





طرق توليد الطاقه آخذ في الازدياد و يحوزعلى اهتمام المختصين و الحكومات على السواء و خصوصا مع المحاولات لايجاد بدائل للنفط . فبالاضافه الى محطات التوليد النوويه هناك الحراريه و الغازيه و الهيدرولوكيه و الجيوثيرمال والشمسيه غيرها . وهناك نوع اخر من انتاج الطاقه من الازبال . نعم من الفضلات العضويه التي تدفن و الغازالناتج عن التحلل يستخدم لتوليد الطاقه .

زين العراق عنده نفط للمحطات الحراريه و عنده غاز للمحطات الغازيه و عنده سدود للمحطات الهيدرولوكيه و عنده شمس للطاقه الشمسيه و حتى عنده زبل مالي الشوراع للمحطات العضويه زين ما دا
افتهم ليش عدنه كل هذا بس ما عدنه كهرباء ؟ليش ما يصلحون المحطات القديمه و يبنون محطات جديده من اي نوع كان

الجواب اعتقد كما ذكرت رئيسة اللجنة المالية
الاء السعدون ان العجز الحالي في ميزانية الدولة يبلغ واحد وعشرين تريليون دينار مطالبة بان لا يتم تحميل الموازنة المقبلة اعباء اكثر . و الجماعه ميكدرون يصرفون بعد فلوس لهاي الكماليات . شفتوا احنا شكد طماعيين و نطالب الحكومه بكهرباء و مستشفيات و علاج طبي و تحسين شبكه المياه و الصرف الصحي وبناء المدارس و المجمعات السكنيه...الخ والجماعه خطيه ما عدهم فلوس بس خافوا يكللولنه خوفا على مشاعرنا من الصدمه " باعتبار العراقي مدلل و حساس
"
يا جماعه راعوا مشاعر الحكومه مثل مدتراعي مشاعركم ....خطيه بعد ما ديتحملون

ملاحظه : الصوره الي خليته فوك مال جنود امريكان ديصيدون الكلاب و البزازين " جمع بزونه " حفاظا على صحه المواطن العراقي و بعدين راح ينظفون الشارع وره مايخلصون الصيد

لبيب العراقي

2009-12-28

البنطرون و ما ادراك مالبنطرون

منذ فتره و صلتني بالبريد الالكتروني هذا الرابط لوكيل وزير الزراعه اثناء تكريمه من قبل الوزير

. في المقطع ترى الوكيل في موقف لا يحسد عليه بعد ان سلت بنطرونه و اثبت للجميع بما لا يقبل الشك انه زلمه ابن زلمه . و في ليله حاره غابت فيها الكهرباء و ظهر فيها البعوض جلسنا انا و اصدقائي نتجاذب اطراف الحديث عن هذا الفيديو المضحك المبكي . وبما ان الليل طويل و الحر لا يطاق قررنا تحليل ما الذي حدث حتى حصل ما حصل للسيد الوكيل و كانت الاستنتاجات كالتالي

دريد ابن خاله ام دريد : الظاهرانه راد يكلله للوزير انه مستعد لعمل اي شي في سبيل المنصب حتى لو يطلع خلفيته لليسوه و الميسوه

جاسب ابن خاله حمديه : راد يكلله للوزير انه كاتل نفسه في خدمه الناس ليل نهار و من التعب و قله الاكل نزل وزنه

عباس ابن حجي باقر : الظاهر تجار اللاستيك كامو يغشًون . و بدأ باستعمال الموبايل الخاص به ليستورد صنف معتبر من اللاستيك و كال " تصوروا يا جماعه لو صارت هاي الحادثه ويه مسؤول جبير بوحده من زياراته لاميركا وين نودي وجهنه من الاعلام الغربي " حقًه و الله شغله تخوف تخيلوا قفا واحد صماخه جبير بالفضائيات الامريكيه

مروان ابن حجي محمد: الظاهر اللغف وصل للبناطيل و تلكيه حوسم بنطرون اكبر من حجمه بس دره بيهه بعد فوات الاوان


مثنى ابن الاسقف خوشابا : الظاهر راد يكلله لوزير انه ما ضام اي شئ على الوزير و انه نظيف وجه و كفه

واحد دخل على الكعده ما ندري منو : الرجال راد يكول للكل انه حلك اللي بالحكومه مثل قفاهم ما يطلع غير البلاوي النتنه

ما ادري ليش بهذيج الليله ما جتي الكهرباء و ضلت علهلحال لمده اسبوع ....ليش يا ترى ؟



لبيب العراقي

و لله في خلقه شؤؤن


الصوره لا تحتاج الى تعليق


مناقشه ميزانيه الدوله

و عندما لاح ضوء الصباح .بدأ مخبرنا بالكلام المباح .فقال مخبرنا الهمام .أنَه يا سادتي يا كرام .بلغني إجتماع عصابه الحكومه .لتقاسم الميزانيه بلا خصومه .فخدمه البلد تحتاج لمصاريف .و فقرات الميزانيه بحاجه لتعاريف .فانبلج أحمد الجلبي كالفارس .و بدأ كلامه بلعن المتارس .و هتف لا للحواجز الكونكريتيه .فكلُنا إخوه و كلنا حراميه .و علينا جميعا شكره على نعمه الغرَاء .حتى لا تختفي كنقود بنك البتراء .و ذكَرهم بالمثل إن سرقت فاسرق بعير .و أنَ المليون اليوم لا يعدل شروى نقير .و إنَ العقارات و البساتين و المليارات هي الهدف .و حجتنا في هذه انَا ورثناها من السلف .و يحق لنا بعدما عانبنا في المهجر .أن نتذوق جميعنا قليلا من السكَر .و في النهايه كلها لخدمه هذا الوطن .الذي و بفضلنا تجاوز كلَ المحن .شكر الحاضرون محدثهم لنزاهته و صراحته . و ذكروا الناس بأن هذا من شيمه و عادته .و إنبرى بعد ذلك البرزاني متحدثاً عن الأكراد .و ذكَر ما لهذا الجنس من فضل على العباد .و قال إن البيشمركه على أمن الناس قائمون .و هم على خدمه الناس و الوطن ساهرون .فهم على النقاط الحدوديه يقبضون الأتاوات .من كل عابر و من كلِ المركبات .و يقوموا بتكريد كركوك خدمه للصالح العام .و هم من أجل هذا لهم عين لا تنام .و يحرصوا على أن تكون لهم حصه في شركات الأعمار .لإنشاء و إعمار البلد من الدمار .و البحث عن منابع أخرى للنفط .لتأمين أكبر حصه لهم من الشفط .و هم يتحملون كل هذه المشاق .فقط من أجل خدمه هذا العراق .و هم بذلك يستحقون نصف مال الميزانيه .جزاء و شكورا لخدماتهم الطرزانيه .و هنا قام عمار الحكيم للكلام .مؤيداما قال سلفه لمن هم نيام .و أوضح بعد ان أقسم برب السماء و الطارق .أنه و لنفس سبب محدثهم السابق .فإنه يدعوا لإنشاء أقليم الجنوب .حتى تعمر الأرض و تمتلئ الجيوب .و أوضح ان كل اللاهثين لجمع أموال الخمس .يحتاجون للأستمرار من الميزانيه السدس .لتبقى مدن الجنوب زهيه و نظيفه .ولتنسى هموم عهد صدام السخيفه .و لتبقى الكهرباء دائمه يستمتع بها الناس .ومن الأمان لا تحتاج الأبواب الى ترباس .و الأمن مستتب في القريه و المدينه .و حياه الناس تضللها الهدوء و السكينه .و لا يوجد في أي مكان أي ميليشيات .و رجال الشرطه سيشكون من قله العصابات .و إن ابنه الهمام سيقوم بالخدمه من بعده .و كل هذا من نعمه الله و فضله .و إن القائمين على تهريب النفط لإيران .يستحقون مكافأت النائم منهم و السهران .و لهذا فهو يطالب بثلث مبلغ الميزانيه .الذي بالكاد يسد خدمات الديوانيه .و الباقي المحتاج سيتبرع به من جيبه الخاص .تحت شعار سياره لكل الناس و لا للباص .و من كل هذا لا يبغي سوى وجهه الكريم .ولهذا سموهم الناس بعائله الحكيم .و هنا تكلم صولاغ عن إحتياجات الناس من الغرب و الشرق .و الكل له حصه بلا نظر للدين و العرق . و جزء من المال سيصرف للحث على التسامح و العطف .و مطارده كل من تسول له نفسه بالقتل أو الخطف .و لتوعيه الناس عن الغرض من صنع الدريل .و من لا يفهم فعليه اللعنه و الويل .و هنا قام المالكي و هو يبكي من التاثر .لما لمسه من أعضاء الحكومه من التدبُر .و أوضح أن قبولهم بالمناصب هو فقط لخدمه الرعيَه .و سيبقون كلهم على هذا الدرب حتى المنيه . و كما اسلف الجميع بأنَ الميزانيه غير كافيه .و بما أن جميع من في الحكومه أرجلهم حافيه .فالحل الأمثل هنا هو الضرائب .لدفع الأذى و درء المصائب .و بما ان موارد البلد محدوده .و جميع الحلول في وجه الحكومه مسدوده .و للوقوف بوجه موج الفاقه الهائج .فأنه يشجع أرسال امولهم إلى دول الخارج .و يمكن الاستفاده من خبره الجلبي في هذا المضمار .دون إئتمانه على فلس أو دينار .لانهم جمعوا هذه الأموال بتعب .بعدما نالهم ما نالهم من ذله و نصب .و ذكَر إن إيران و هي نعم الجار .قد تبرعت لهم اليوم بمليار .سيتولى أمرها الربع من فيلق قدس الميامين .ليتم صرفها بحكمه وبكافه الميادين .من العبوات الى المفخخات الى الأغذيه الفاسده .وهي بهذا تفقئ كل عين حاسده .و خير لنا إن العرب نائمون .و هم فيما نفعل جاهلون .و يوما ما سيتفاجؤن من حجم الأعمار .ولنثبت لهم من هم الاخيار .و هنا أنتبه المالكي إن الجميع يغطون في نوم عميق و هانئ .بما هم بذلوه من جهد في التخطيط ًالهادئ .فتذكر أن من يقوم بخدمه الناس في كل النواميس .نام قرير العين نوما بلا كوابيس .و هنا سكت المخبر و بكى و انهار .عندما تذكر حال العراقيين في دول الجوار .و صب من عينه الدمع رقراق.
و صاح بائسا لك الله يا عراق

لبيب العراقي

ودًع البزون شحمه

البزون " بالعربي الفصيح القط " حيوان اليف تراه يعيش بترف و دلال حيث يعيش صديقي شناوه في بلاد المهجر بينما يعيش على الفتات و الازبال في بلاد ما بين النهرين ولكي لا نرمي باللوم على الاحتلال فأن عيشه البزازين " القطط " على الفتات و الازبال كانت قائمه منذ أن رايت أول بزونه في حياتي أيام كنت أعيش في بغدادا الجديده . و عندما انتقلنا الى زيونه و هو حي راقي منذ 20 سنه مضت أكتشفت ان حياه البزازين " جمع بزون " هي نفس الحياه يقتاتون على الفتات حالهم حال اولاد عمهم في بغداد الجديده . حيوان البزون هذا سواء ان عاش في بلاد المهجر معززا مكرما يحضى برعايه و مستوصفات خاصه بالحيوانات للعلاج في حاله ان اصابه مرض " شناوه كللي انه عندهم اوتيلات للكلاب و القطط الذين يضطر اصحابهم للسفر في بعض الاحيان ما أدري شناوه يحجي صدك لو يطير أفيال " أو ان عاش في بلاد المليون عمامه " كانت اقل من ذلك بكثير قبل الاحتلال " هذا الحيوان له نفس الصفات في نكران الجميل وعدم الامانه و عند العراقيين مَثَل يقول " ودًع البزون شحمه " للدلاله على قلًه أمانه هذا الحيوان مقارنه بالكلب الذي يكن للانسان كل الاحترام و الحب و يستخدمه الناس" حتى يم صديقي شناوه " في رعايه الماشيه و حراسه البيوت ....الخ . بس كلما تكلًم أحد بكلام لا يعجب قلنا عنه " خلًيه ينبح مثل الكلب " دلاله على استهجان صوت الكلب .
العبره من المقدمه المطوله في عالم الحيوان أنه هناك ملاحظه مهمًه في عراقنا الحبيب و هي أنه هناك مخلوقات جديده ظهرت بعد الاحتلال تجمع ما بين البزون و الكلب و الخنزير . فهي عديمه الوفاء لبلدها و تأكل ما اؤتمنت عليه كالبزون و تنبح كالكلاب حينما تتكلم فلا يعجبك ان تسمع ما ينبحون به وهم كالخنزير في قله الغيره على وطنهم و حقل الفكه يشهد .
شناوه سألني زين البابا مال العراق" حلوه من شناوه كال كلمه البابا و الله بلاد الغرب تعلم الانسان هوايه أشياء " ليش ميسوي شي فأجبته أذا المَرَه " الامرأه " كمزت بس حتى تحيي البابا شفت أسوه بيهه و راح يودهه المصح حتى تتعالج و هاي أنتو اللي عدكم أوتيلات مال بزازين و كلاب زين آني شراح يصير بييه اذا بس حاولت أدك الباب مال البابا مالنه مع الأخذ بنظر الاعتبار أنه بزازين زيونه تاكل من الزبل في بلد الالف عمامه و عمامه

.لبيب العراقي

فكره عاشورائيه

تعرفت على صديقي بدر منذ 25سنه حين أنتقلوا للعيش في الدار الملاصقه لدارنا و خلال كل تلك السنين كنا كالاخوه بل أكثر نشارك بعضنا البعض الأفراح والاحزان والعاب الاتاري و البلاي ستايشن .نقتسم كل شئ في ايام المحن " عدا قنينه الغاز اللي معرفنا لحد اللحظه شلون نقسمهه " . صديقي بدر هذا ما انفك أن يشارك في طقوس عاشوراء و المسيره الى أرض كربلاء بينما أنا اكتفي بأكل القيمه من خالتي أم بدر. هذه السنه قررت أن أسال بدر صديقي هذا عن عدد اللذين يشاركون في هذه المسيره . أجابني " يمكن مليون وشويه اللا واحد واللي هوه أنته " قلت له " كلش زين " و اردفت " والعبره من مناسبه كربلاء هيه انوا نصره الحق حتى ولو أستلزم الأمر قتال جيش عرمرم وهو واجب علمنا اياه نبينا و ديننا و آله من بعده " اجابني " شنو صرت ملله توماس و جاي تخطب براسي خطبه الجمعه " فقلت له " مو القصد بس اصبر عليه و خليني أخلص " فأوما رأسه بالقبول فأردفت مسائلا " و كم جندي ايراني احتل حقل الفكه " سمعت يكولون 11 نفر " قال بدر فقلت له " أذا المسأله محلوله لو نكدر ناخذ ربع الناس اللي طالعين مسيره ونروح براسنه لحقل الفكه فراح نكدر نحرره بدقيقتيين " و أردفت "حسبه عَرَب ربع مليون مقابل 11 والحق معنا أذن أكيد راح نفوز بالضربه القاضيه لأنه لو ننتظر الحكومه حتى تحرر البئر فراح ننتظرللأبد " و قبل ان يعلق بدر على ما قلته عاجلته قائلا "و داعتك راح يصير عاشوراء مراح ينًسي " فقال بدر مهللا " و الله صدكت يا طويل العمر " فقلت له " و مراح ننتهي لهذا الحد لازم نمشي بربطه المعلم لبغداد و نحجي وييه الحكومه حتى تحسًن الاوضاع و الا نعمل بقول الشاعر أذا الشعب أرادالحياه فلا بدً أن يستجيب القَدَر" و هنا أنتفض بدر و هتف بحياه العراق وقال " تعال وييايه " فقلت له و قد تلون وجهي "وين يمكرود تريد تاخذني تره آني قصدي شريف و أحنا أصدقاء عمر " فقال لي " لتصير سخيف لازم نروح للمله توماس حتى انكلله على الموضوع حتى يدعيلنه " و عندما وصلنا لقصره " عفوا قصدي بيته " قال لنا الحراس ان الملله بفرنسا ذهب ليحتفل مع بابا نؤيل لان الاثنين عندهم نفس اللحيه وهنا نظرت الى وجه صديقي بدر فرأيت وجهه و قد تحول الى هلال فقلت له مشجعا ......... " لا بد أن يستجيب القدر
"


لبيب العراقي

مدونتي الاولى

اختي عشتار من غار عشتار شجعتني لاكتب مدونتي و اشكر لها هذا التشجيع و سابدا في مدونتي الاولى بتعليق بعثته على احد مقالاتها الرائعه عشتار شكرا على التشجيع

ذكرت وكاله " جثير " الأخباريه انً وقائع حادثه الطائره الامريكيه مع الاخ من نايجيريا هي ليست كما تناقلته وكالات الانباء و الاف بي آي وانما الحقيقه ان هذا الاخ " اللي مثل متكول عشتار اسمه لوحده تهمه " كان قد توقع ان اكل الطائره لن يعجبه فقرر ان يجلب معه مكونات اكله نايجيريه ليطبخها بنفسه و عندما بدأ بمحاوله الطبخ انفجرت قنينه الغاز الصغيره الخاصه بالرحلات " وهي عكس قنينه الغاز العراقيه ذات الحجم الكبير والغاز القليل " و نتج عن هذا الانفجار حاله رعب . اما بالنسبه لعلاقته مع اليمن فذكر عمر النيجيري هذا ان كل البهارات التي استخدمها قد حصل عليها من واحد حباب ساكن باليمن " و حين سئل عما يعرفه عن القاعده و عن علاقته بها اجاب بان المره الوحيده التي سَمِع بالقاعده هي حينما كان يدرس الرياضيات في المدرسه حينما قال له مدرس الرياضيات ان مساحه المثلث هي نصف القاعده في الارتفاع " يعني الزلمه طلع يعرف نصف القاعده بس " .
هسه القضيه يم عشتار حتى تكول النه المن نصدك .....شدكولين عشتار ؟

لبيب العراقي