2010-08-11

هو الوضع كله صار عجاج في عجاج

مهداه الى الصديقه جيفاريه معشتره- من شلتنا.. شله غار عشتار

سمعت عن الاجتماع الثنائي الثالث بين ايران والعراق حول دراسة الطرق وايجاد الاليات والحلول على الصعيدين الثنائي والاقليمي لمواجهة العواصف الغبارية و باعتبار عندي ربو و كحه و طول في اظافر اصابع الرجلين و حول في العين اليمنى قررت ان اتجسس لاعرف عما سيدور في الاجتماع الثنائي الرابع و قررت ان اجند لهذا الغرض عصفوري الحباب الذي ياتيني بكل الاخبار....ذهبت الى قفص العصفور و اخبرته بعزمي على معرفه ما سيدور في الاجتماع الثنائي القادم الذي سيعقد في طهران و طلبت منه الطيران الى هناك و نقل كل ما يدور في هذا الاجتماع و اخباري به....نظر الي العصفور و قال لي باستهزاء...عمي لبيب...انته من كل عقلك...فجاوبته و قلت له...طبعا من كل عقلي...فانا اريد ان اعرف ماذا سيدور في هذا  الاجتماع...فاجابني....لا لا...عمي لبيب...انا قصدي من كل عقلك آني اكدر اطير الى طهران...شنو انته متوقع انه الدخن اللي توكلني اياه لو نخاله طحين الحصه راح يخلوني اطير كل هالمسافه الى طهران و ارجع لك سالم غانم...هوه انته ماكل الاكل اللي دتنطيني اياه حتى تعرف شنو معناه طلبك هذا ؟؟؟ آني هم حسيت اني ترزلت من قبل عصفوري....فار دمي....فقلت له....شوف عصفور...احترم نفسك....تره و الله انتف ريشك ريشه ريشه...فقال لي...هو ههم بقه بيه ريش تنتف بيه...مو من الحر و القهر و اكل النخاله وكع كل ريشي...معود دروح وكلني لبزونه الجيران و خلصني من هذا البؤس احسن لي

هاي شنو ...و الله عمي طلع هذا العصفور شجاع و يعبر عن معاناته بكل صراحه....آني هم قررت اغير اسلوبي وياه و اجيه بالعيني و الاغاتي فقلت له

معود عصفوري...آني منو عندي غيرك...مو آني هم اداريك و انطيك حب و ماء و بعض المرات سكائر ...بعد شتريد...مو آني قبائل كامله من الجريديه بدأت تلعب بعبًي من سمعت بهالاجتماعات الثنائيه و اريد اعرف شراح  يناقشون و شنو راح يقررون بهذا الاجتماع

باوع عليه العصفور و قال لي....زين افتح باب القفص حتى نتفاهم.....فقلت له...بس المفتاح وياك...فاجابني...هااا...و الله نسيت...فقام العصفور و فتح لي باب القفص الذي كنت انا محبوس فيه...فشكرته على معروفه

هنا وقف العصفور على الشباك و قال....عمي لبيب...هاي صار لي كم شهر آني وياك و ما شفت غير القهر و النكد ...خليت ريشي يقع من كثره قراءه الاخبار السياسيه اللي لو فيل يقراهه يموت من الضعف و نحول الجسم...كافي قهر كافي...كافي حزن كافي...كافي كافي كافي...و هنا رمى العصفور نفسه من الشباك دون ان يحرك جناحيه فسقط منتحرا....اهئ اهئ اهئ...مات عصفوري الذي كان انسي الوحيد . فقط اللي فرح هوه عتوي الجيران الذي اتى ركضا ليواري جسد العصفور في بطنه

انتحارالعصفور لم يزدني غير اصرار على معرفه وقائع الاجتماع القادم...فقررت النزول الى سوق الغزل و البحث عن طائر يقوم بالمهمه...بحثت في كل ارجاء السوق و شفت العجب..نعامات , اسود , افاعي و حتى تمساح ...اي و الله حتى تمساح...ما ادري منين جابوه بس كان ابو ابوه منسمط من الحر...و المسكين كان يعاني من الجفاف و صاحبه كان يرشه بالماء بين فتره و اخرى و هو يتلوى من الجفاف بين هذه الفترات...خلًي يجي عصفوري اللي انتحر و يشوف القهر...جان حمد ربه على ما كان به من نعمه...يلله...الله يرحمه و يهني عتوي الجيران بلحمه

افتريت هوايه و تعبت من الفر...حيوانات كثيره...طيور متنوعه...زين منو اختار لهذه المهمه...اشو و انا احك براسي من الحيره سمعت صوت يناديني " ها...شو دتحك براسك " التفت فرايت غراب اسود حبيس بقفص كبير...التفت يمينا و شمالا لاعرف مصدر الصوت لاني لم اتوقع ان الغراب هو من كلمني و لكنه كان هو من كلمني فقد وجه كلامه لي للمره الثانيه و قال...شنو...مشايف غراب يحجي....فقلت له...و الله عمي كلشي صرنه نشوف بهالزمن الاغبر....فيل يطير...اخرس يحكم....و قبل كم يوم جان عندي عصفور يحجي بس راحلك فدوه

فقال الغراب....شوف...آني ما احجي ويه كل واحد...بس انته مبين عليك ابن ناس و حبيت ادردش وياك

ماادري شلون عرف آني ابن ناس...اشو جواريبي كل تكه لون...تكه من زجاج مناظري مكسوره و ما عندي فلوس ابدلهه...ساعه اليد مختفيه و لم يبق منها غير السوار فقط...لا فانيله داخليه بس هاي سهله اكدر الوم الحر على عدم لبسها....فسالته: زين اذا اشتريك و اطلعك من القفص ترضى تروح كروه لايران

فاجابني :  اعوذ بالله...ما لكيت غير ايران..مو آني كلهه الطيور و الحيوانات اللي هنا ما تقبل تحجي ويايه و مطلعين روحي...شافوا لوني اسود باسود فعبالهم واحد آيه الله مال هالوكت.... كلهم صاروا ينصبون عليً ... و انته جماله تريد توديني لايران...ليش هيجي...شنو آني مصبح اليوم بوجه غراب لو شنو ؟

فقلت له...هسه شتكول...هذا ما عندي في الوقت الحالي ...موافق من حيث المبدأ على المهمه ام لا...فاوما براسه علامه الايجاب و قال متمتما...احسن من هاي الحبسه

فسالت البائع عن سعره فقال لي : عمي هذا الغراب مخرًع كل الحيوانات اللي بالسوق...عبالهم ملله مال هالوكت...عمي شكد ما تنطيني انعم الله ....و اذا تريده ببلاش هم ميخالف

هاي شنو...طلع حتى البائع ملاحظ المساله مال صاحبنه الغراب..فقلت للبائع...عمي انته هم موكله و مشربه للغراب...راح انطيك بيه خمسه الاف دينار حلال زلال...فقال لي البائع...ميخالف...و القفص ماله هديه مني اليك

اخذت الغراب الى البيت لاشرح له المهمه و الحقيقه كان غراب في غايه الادب طول الطريق و هو صامت و يكرز حب و ما نطق و لا كلمه و كلما مرت بنا وحده حلوه و جميله اسمعه يتنهد و يكول.. شوكت يا ربي شوكت...يمكن كان مستعجل و يريد يوصل البيت بسرعه

وصلنا اخيرا للبيت بعد ان عبرنا كل الحواجز الكونكريتيه و السيطرات بامان بس العجيبه كلما مريت بواحده من السيطرات اسمع الكل يتعوذ من الشيطان الرجيم ...يمكن نزل عليهم الايمان دفعه واحده بسبب حلول شهر رمضان...الله يديم الايمان

فرشت خارطه العالم على الارض و اخذت اشرح للغراب موقعنا الحالي و اين تقع طهران و اخذت اشرح له المهمه و ما يتوجب عليه ان يسمع و يرى و ينقل لي...الغراب كان ينصت باهتمام بالغ و هولا يزال يكرز الحب...و عند انتهائي من شرح المهمه نظر الي و قال....لبيب...انته الظاهر تشوف هوايه افلام اكشن...زين مو اسهل لك و لي ان تشاهد الاخبار في الفضائيات و انته تعرف تفاصيل الاجتماع

الحقيقه هذا الغراب طلع يناقش و يسال اسئله محرجه...مومثل العصفور السابق و المرحوم حاليا...كان المسكين يسمع و ينفذ بدون مناقشه

قلت للغراب...حبيبي...المشكله انه بالاخبار ما يكولون كلشي...يكولون اللي يريدوننا ان نسمعه ..بس مو هذا بالضروره اللي دار بالاجتماع...انته شنو...ما سامع بمبدا التقيه و اللي يكولك احجي شئ بس اللي بقلبك شئ آخر

شاهدت الغراب و هو ينصت لي باهتمام...آني هم نفشت ريشي و نفخت نفسي تكول عبالك طبل ...حسيت انه آني تعيقلت براس الغراب و سويت نفسي افتهم و المسكين صدقها

اجابني الغراب....شوف يا ابن الناس....انته الظاهر ما عندك شغل عمل و تريد تضيع وقتك و وقتي...بس ما يخالف....على الاقل اروح اشوف بلاد جديده و أغير هوا و اشوف شويه كهرباء...بس اريدك توكلني و تشربني للايام الثلاثه المقبله استعدادا للرحله الرمضانيه الى طهران

قررنا انا و الغراب تسميه العمليه باسم " الغراب و الغبار " و ابقائها طي الكتمان. و في اليوم الرابع استيقظت من الصباح الباكر لاجد الغراب مستيقظا مسترخيا في قفصه و هو يكرز الحب و يقرا في مجله الشهر الفائت عن اليسا و آخر اخبارها الفنيه...لك هذا شلون غراب برجوازي و فلته...حتى مجلات يعرف يقرأ... المهم سالته ان كان جاهزا للطيران فقال لي انه مستعد و جاهز

شاهدت الغراب وهو يطير مبتعدا من شباك غرفتي و احسست بالكآبه و الحزن و انا اراه مبتعدا عني و انا باق وحيد مع نفسي في الغرفه... وسبب الكآبه ان هذا الغراب و في  الايام الثلاث الاخيره جعلني اصرف مبلغ ليس بالقليل على شراء الحب و المكسرات و لم يبق في جيبي الا القليل....يلله ميخالف...المهم ان ياتي لي بالاخبار

في اليوم الثاني استيقظت على وخزات بيدي شعرت بها و انا نائم .فتحت عيني لارى الغراب وهو يحاول ان يوقظني فقلت له...و لك شجابك بهالسرعه يا اسود الوجه...فاجابني و قال....من كثر اكل الحب و الكرزات نسيت منين الدرب...بلكت تشرحلي الطريق مره اخرى حتى اندل

وفي خلال ساعتين شرحت له الطريق مره اخرى و في خلال يومين طار الغراب مره ثانيه بعد ان اجبرني على شراء المزيد من الحب و المكسرات و بقى ياكل فيها لمده يومين قبل ان يتوجه للطيران ثانيه....شلون حظ....يعني ما اشتريت غير غراب مدمن مكسرات







المهم و حتى لا أطيل عليكم السالفه اكثر مما هي طويله جائني الغراب بعد اسبوعين من بث نتائج الاجتماع في الفضائيات و الجرائد المحليه و هو يلهث...قال لي اريد ارتاح و بعدين احجيلك ما دار في الاجتماع...فقلت له ان ذلك من حقه فهو متعب من السفر و يحق له ان يرتاح...فقال لي ...روح جر خط كهرباء ذهبي من ابو المولده اللي براس الشارع...الحر لا يطاق و آني اريد ارتاح و استمتع على الاقل بهواء المبرده....لك هذا شلون غراب ارستقراطي...هوه آني بجلاله قدري صارلي من بدأ الصيف و آني مشايف الكهرباء و لا كاعد على هواء المبرده و هذا اجه ذاك اليوم و يطالبني بتشغيل المبرده....و الله زمن

المهم و بعد ان بعت ما تبقى لي من دعابل ايام زمان النادره و اشتريت خط من صاحب المولده و شغلت المبرده للافندي الغراب قال لي..زين وين الحب و الكرزات...ما اريد اكلكم شسويت بنفسي بس حكم القوي على الضعيف...رحت و اشتريت ما تيسر لي من المكسرات...هذا شلون غراب...حتى منقاره غير مهيأ لاكل المكسرات...زين شلون هذا ياكل هذه المكسرات و منين متعلمهه لهذه الشغله...هذا الظاهر غراب من جماعه الحواسم....صار ياكل اللي مشايفه بعرس جدته

المهم و بعد يومين من التشغيل المتواصل للمبرده و تكريز الحب و اكل المكسرات بدا الغراب باخراج الدرًه و قال و هو يكرز الحب....شوف لبيب...آني عرفتلك كل اللي دار بالاجتماع مال الطوز هذا...صادقتلك شكم غراب من اللي متغلغلين يم حجج الله هذوله و خلوني اوكف على السطح يم الشباك حتى اسمع كلشي...و الله يا لبيب...لو تسمع اللي كالوا الغربان عن الشغلات اللي يسوهه الايات بايران جان ابيض ريشك

فقلت له...بابا يا ريش....آني ما عندي ريش...الاحتلال نتف ريش كل العراقيين و الحكومه جتي كملت الباقي...بعدين آني ما عندي اهتمام بما قاله لك اصدقائك من الغربان...آني اريد اعرف شصار بالاجتماع

فقال لي...شوف لبيب " كام يصيحني باسمي حاف...شلون ميانه زفره " جلس الوفد الايراني على جهه و العراقي على الجهه الثانيه و بدا الوفد الايراني بالكلام و دار الحوار التالي

الوفد الايراني: بابا وفد عراقي...الغبار عمانا عمي...انتو لازم يشوف جاره لهذه المسيبه " المصيبه " و تلكون حل

الوفد العراقي : هوه احنا جايين هنا حتى نشوف حل

الوفد الايراني: شوف وفد عراقي ...احنه لازم نعرف شنو سبب طوز هذا حتى نشوف حل بعد الدعاء للاموم " الامام " الخميني بطول العمر !!! زين لو نشرح بعد

الوفد العراقي: بس الامام الخميني مات من زمان...شلون ندعي من الله يطول عمره

الوفد الايراني: شفت وفد عراقي...كمنه نخربت " نخربط " من وره طوز مال انتو...هاي لازم ناخذ عليها تعويزات " تعويضات " كبيره

الوفد العراقي: من ناحيه التعويضات لا تشيلون هم...المهم تطلعون النسبه مالنه من هذه التعويضات زين خلي نبحث اسباب الطوز و سبل تقليل الغبار... اصحاب السعاده...قسم من الناس تكول هذا كلهه من تجارب الصواريخ الايرانيه و التي تجري دائما قريب من الحدود العراقيه الايرانيه

الوفد الايراني: اصحاب التعاسه...هسه احنه نحاول ندرس امكانيه تصنيع سواريخ " صواريخ " ما تطلع طوز من تنطلق...بس انتو بالمقابل لازم تسوون شئ من طرفكم لانه هوايه اسباب تقع من ضمن مسؤوليتكم

الوفد العراقي: ممكن توضحون اكثر يا اصحاب السعاده

الوفد الايراني: مثلا...مخابرات اطلاعات تكول جزء من الطوز ناتج عن تدريبات منتخبكم مال طوبه...احنه نريد ما تسوون اي تدريبات و تشتتون شمل الفريق العراقي اللي مع الاسف فاز على فريق ايران بكاس شباب مال العالم كم سنه فاتت
ثم اردف الوفد الايراني :  و تكول اطلاعات جزء من الطوز سببه تورباينات المحطات الكهربائيه...من تفتر تورباينات تسوي هواء يسبب عجاج...فما نريد محطات تشتغل هوايه
الوفد العراقي: صار ...تدللون...العراقيين و لو بعد الف سنه ما يشوفون كهرباء...و بعدين شيسوون بالكهرباء...كلهه كماليات و احنه محتاجين الفلوس حتى نكنزها و نخباها بمكانات اهم
الوفد الايراني : و بعدين سمعنه انه جزء كبير من عجاجه هو بسبب الفلاحين الذين يحاولون فلاحه و زرع الاراضي و ديسوون عجه غير طبيعيه...و لذلك احنه قررنا نكطع ماء عن العراق حتى نأدب الفلاحين

الوفد العراقي: حقكم...و الله حقكم...شنو لعد...علمود بعد الفلاحين يتأدبون و ما يسووهه

الوفد الايراني : كما لاحظنا ان من اسباب العجاجه هو التنظيف المستمر لشوارع البلد....بعد ما نريد اي امانه او بلديه تنظف اي شارع...و كذلك لتقليل الطوز الناتج عن حركه سيارات الامانه اوالبلديات نقترح انه ماكو بعد جمع زبل او قمامه
الوفد العراقي : خلص...لا زبل ينلم و لا شوارع تتنظف

الوفد الايراني: بعدين من كثر ما الناس تستعمل المهفات صارت حركه هواء غير طبيعيه و سببت جزء من عجاجه...فاحنه و حتى نساعد الناس و نقلل من العجاجه قررنا ان نصدر لكم مبردات ساخت ايران...حتى لو ماكو كهرباء تشغلهه و لا اكو ماء كافي بس لازم تشتروهه

الوفد الخروفي...عفوا الوفد العراقي: صار اغا...تدللون

الوفد الايراني: و راح نسوي معمل مال مكائن شفط غبار جاي من العراق ونصدره لكم مره ثانيه تستخدموه في بيعه كغبار مقدس او في البناء او في زياده الرمل الموجود في الصحراء لتكون اكثر جمالا و بهاء...بس جانب عراقي يدفع تكاليف معمل

خيالات المآته العراقيون : مو تدللون

الوفد العجمي : بعدين تدريبات جيش عراقي و مشيه عسكريه كلهه تسبب ازعاج للتربه و تطاير غبار...فاحنا ما نريد يتاسس جيش عراقي ...احنه ندرب يمنه جماعات و ندزهه الكم...و عراق يدفع فلوس تدريب و عبوات ناسفه

الطراطير اللي مسمين نفسهم وفد عراقي: حاضرين و من الان

الوفد الايراني : بعدين حركه طائرات مدنيه عراقيه تسبب طوز و حكه بالجلد...تلغون خطوط جويه عراقيه

عظاريط الوفد العراقي: علم من زمان و تم التنفيذ

الوفد الايراني : ناس تمشي هوايه بالشارع تسبب طوز و عجاج...احنه ندز مفخخات...انتوا تزرعون مفخخات...الناس تموت و تقل والطوز كنتيجه لهذا هم راح يقل

مساخر الرجال : هاي من زمان جاري تنفيذها و ما شاء الله...جماعه بدر و ماما جلال و جيش الطرشي و كل الحكومه لم تدخر جهدا في هذا المجال

الوفد الصفوي : و احنه قررنا نزرع كل الحدود الايرانيه حتى المتاخمه منها لروسيا باشجار الفستق و البندق و اشجار الخشب و الحكومه العراقيه تدفع التكلفه
زعاطيط الاحتلال: معودين و اذا تريدون احنه ندزلكم شتلات من عدنه ببلاش

وفد بني فارس: انتو...بعد تريدون شئ

طايحين الحظ : لا بالعكس ...نشكر حكومه الجمهوريه الاسلاميه الايرانيه على حسن تعاونها معنا و صبرها على ما سببناه من اذى للشعب الايراني...بس اغوات ...لا تنسونا من يصير حجي على تشكيل الحكومه

هنا سكت الغراب...فقلت له...ها...و بعدين...فقال لي...لبيب...انته شنو...ما دتشوف الكرزات و المكسرات خلصت....شلون تريدني اكمًل الحجي بدون تكريز و تركيز
ولك الله ينتقم من كل من علمك على اكل المكسرات...بس شسوي...لزمني من ايدي اللي توجعني...يمكن هذا السبب اللي خله البائع ينطيني قفص الغراب ببلاش...ممصدك خلص من هيجي غراب

شلت نفسي و رحت للمحل اللي براس الشارع حتى اجيب للغراب حب ركي و حتى يكمل السالوفه....ايبااااه....شوف اللي  ديصير بالاجتماعات و احنا نايمين و رجلينه بالشمس و كاتلنه الحر...يعني لوما الغراب شاف بعينه و حجالي جان صدقنا كلام التلفزيون و الجرائد

و انا داخل البيت انصدمت...شفت العتوي مال الجيران لازم الغراب و دياكل بيه....طار عقلي....ركضت وره الهر اللعين...لزمته قبل ما ينط على الحائط و رفعته من رقبته و قلت له...ولك يا ملعون الوالدين....مو جان ديحجيلي السالفه...صرفت دم قلبي و فلوس جيبي على هذا الغراب و تجي انته تاكله عالحاضر

اشو هذا العتوي كام يحجي و قال لي...لبيب...آني شعليه...تره هوه مات لوحده...انًفخ من الكرزات و بطنه طكت و مات...مو زين آني دا اخلصك من جثث الطيور النافقه
فقلت له...ولك شوف...ما دام انته طلعت تحجي...المهمه القادمه انته تروح بيهه...ما اعرف شلون...تشدلك جناح و تطير...شلون هاي مشكلتك مو مشكلتي...افتهمت لو لا
و رميته بقوه على الارض

نظر الهر الي مستأهزا و وقف قرب شجره النبق و شخهه على الشجره و تحرك ببطء باتجاه بيت الجيران و هو يقول....هذا مخبل لو ديخبل بنفسه...بزون يطير...هاي وين صايره

آني هم طار عقلي و هميت بالركض حتى الزم هذا الهر و اطيح حظه...بس شفت رجليه متبسمره بالارض...حاولت ان اتحرك فلم اقدر...فزعت...تشنج صوتي...ما الذي حدث لي..؟؟ ناديت امي فزعا فجاءت مهروله...فسالتها ان تساعدني على الحركه...فاخذت امي تجرني اليها و هي تقول....يلله ابني....يلله وليدي...يلله لبيب...و فجاه استيقضت من النوم و رايت امي و هي تهزني و تقول.....يلله وليدي ...اكعد وليدي...مو هسه سمعت بالراديون انه هناك عاصفه ترابيه قادمه...كوم و اقفل كل الشبابيك

فقمت متثاقلا و انا اتمتم...هسه يا امي بس لو عايفتني اكمش العتوي و ابرد قلبي بيه قبل ما تكعديني...هسه خليتهه حسره بقلبي مثل ما هيه حسره بقلبي اشوف السيستاني يحجي...ليش ما تجي الامور ويايه عدله و لو مره واحده

بس آني ظليت افكر بكلمه هذا الهر و التي  قالها  لي في الحلم  " بزون يطير...هاي وين صايره" ...صدك...آني شلون صدكت نفسي بالحلم انه البزون يكدر يطير...آني شلون واحد مطفًي   



انقر على الصوره لتراها بحجم اكبر