2010-01-29

وينك يا ابو القاسم الطنبوري


الصوره مقتبسه من احد المواقع

القندره الذريه سلاح فعال و محظور استخدامه في معظم دول العالم المتطوره والمتهوره . عرف هذا السلاح منذ القدم بفعاليته في اجتثاث الحيوانات الزاحفه صغيره الحجم " كابو بريص و ابو ريشه " .عرفه العراقيون في العصر الحديث فاستخدموه كواحد من ادوات التربيه حيث استخدمه الاباء لتقويم ابنائهم عند الحاجه. يمكن استبدال القندره الذريه بالنعال الليزري اذا قضت الحاجه لاستخدام هذا السلاح داخل البيت و اثناء فتره الراحه حيث يندر تواجد القندره الذريه في متناول اليد. فعلى سبيل المثال يمكنك التنفيس عن غيضك في حال رؤيتك لاحد قرود الحكومه و انت تشاهد التلفاز و في هذه الحاله ينصح و بشده باستبدال القندره الذريه بالنعال الليزري تجنبا لاحداث ضرر بجهاز التلفاز و ضمانا لتكرار هذه العمليه في المستقبل القريب و خاصه حين نقل وقائع جلسات مجلس الدواب " مصطلح مستعار " او عند مشاهدتك لتصريحات المسؤولين في حكومه المنطقه الصفراء. يمكنك تكرار العمليه عده مرات طالما ان جهاز التلفاز يتحمل هذه الضربات و طالما تم استخدام الموديل الخفيف من هذا السلاح . و للاستفاده القصوى من لحظه رمي الحذاء ينصح باخذ شهيق عميق في اثناء رفع النعال الليزري " او القندره الذريه اذا قررت قصف التلفزيون بالعيار الثقيل او اذا كنت تتفرج على تلفزيون غيرك  " و من ثم اخراج زفير في لحظه افلات السلاح باتجاه الهدف مع ترديد بعض الترنيمات المقدسه مثل " يا ولد الاوادم....لو تعرفون شكد نحبكم....الله يطول بعمركم.....كافي بهجه مو شبعنه خدمات....ما شايفين هيجي صيني شعره مكعكل ...الخ من عبارات المديح المعروفه " . و يمكنك ايضا ممارسه هذه الشعائر حين رؤيتك لموكب أحد المسؤولين على ارض الواقع هذا أذا كان بالامكان الاقتراب من هذا السؤول بدون تعرضك لاي دغدغه من احد افراد حمايه هذا المسؤول اواذا لم تمت من الضحك حين يعاقبك احد افراد هذه الحمايه باطلاق سيل من النكات المضحكه و المريحه للاعصاب و لكن يرجى التاكد من الهدف قبل اطلاق القندره باتجاهه لانه من المحتمل جدا أن لا يتسنى لك الوقت لاعاده هذه الفعاليه باعتبار انك ستكون مشغول جدا بعد محاولتك الاولى بقضاء فتره نقاهه ممتعه في مدينه العاب ابو غريب على حساب المسؤول المستهدف لاراحه أعصابك المرهقه 

 كما يرجى مراعاه اللوائح الجديده في جميع مطارات العالم بالتصريح عن هذا السلاح و الا تعرضت للمسائله القانونيه و المرور الاجباري عبر جهاز " ربي كما خلقتني" لرعايا الدول الناميه و دول الباميا



و مؤخرا اصدر نادي " المسؤولين خدم الشعب " مرسوما جديدا يقضي بترديد قسم عدم استخدام القندره الذريه مع طقوس الانضمام لعضويه نقابه الصحفيين و ذلك بعد خرق الصحفي منتظر الزيدي معاهده عدم استخدام هذا السلاح اثناء زياره الرئيس الامريكي السابق خوخ بوش للعراق. كما تقدم السيد هادي العامري بمقترح لتدريب كل اعضاء البرلمان و مسؤولي الحكومه العراقيه و حكومه بوركينا فاسو على صد و اعتراض هذه القنادر تجنبا لاي احراج مستقبلي . ووعد السيد نوري المالكي باجتياز هذه الدوره بتفوق اذا تم انتخابه للمره الثانيه و ذلك ضمانا لقدرته على امساك هذه القنادر اثناء اي مؤتمر صحفي  و باحكام و منعا للتجربه المريره التي حدثت اثناء زياره خوخ بوش الاخيره. و قد أعترض كاكا مسعود و ماما جلال عن عدم تضمين صد " الكًيوه الكرديه " ضمن منهاج هذه الدورات و لكن عمار الحكيم وعدهم بالضغط على الحكومه العراقيه لقبول هذا المقترح العادل و الاعتراف بشكل صريح ان كركوك كرديه و ان البو كمال هي جزء من أقليم الجنوب



هذا و قد اعلن السيد الدكتور أحمد الجلبي عن تصنيع شركته لأجهزه صد القنادر الذريه و التي سيتم تسميتها تجاريا ب" مضادات البتراء "  و توريدها للحكومه العراقيه حسب العقد المبرم مع هذه الحكومه و البالغ قيمته خمسين مليون دولار . و صرح الدكتور الجلبي ان هذا مبلغ صغير نظير ما تقدمه هذه الاجهزه الفعاله من منع هدر كرامه المسؤول المستهدف



هذا و قد اشيع ان مسؤول كبير في تنظيم القاعده في بلاد ما بين الجسرين قد اعلن عن تطوير جيل جديد من القنادر الذريه و التي بامكانها اختراق كابينه الطيار لاصابه مساعده بجروح بليغه و بدون الحاجه الى استخدام اي لباس داخلي كما حصل مع اخينا عموري النايجيري. و اردف ان هذه القنادر بامكانها عبور اجهزه التفتيش دون الكشف عنها وانه يمكن ارتدائها بدون جواريب . و قد اطلق مسؤول القاعده اسم "من اسامه لاوباما "  على هذا الجيل الجديد من القنادر الذريه . و اعلن هذا المسؤول عن انشاء معسكر تدريبي تحت عنوان " ان الحياه لطرطره.. من لم يمت بالسيف مات بالقندره " لتدريب شباب المائده على استخدام هذا السلاح الجديد



و بالمقابل اعلن السيد جيم مكورماك صاحب الشركه المصدره لاجهزه كشف الروائح الكريهه في سيارات المواطنين الغير نظيفين باختراع شركته لبديل عن القنادر الذريه و هو النعال الذكي الذي يمكن برمجته مسبقا لاصابته الهدف من مسافه كبيره و بدقه متناهيه. و ميزه هذا السلاح انه من الاجهزه الجديده التي يعرف عنها انها من جيل  " ما خف وزنه... وغلا ثمنه... و من زيزي راح  تشتغل " و لكن الدكتور الجلبي عقًب قائلا ان بامكان الجيل الجديد من " مضادات البتراء " ان تعترض هذه النعال الذكيه و بنسبه قد تصل في بعض الاحيان الى 120 بالمئه  "  لحد يسألني شلون جتي هاي النسبه" ولكن سعر الجهاز المطور سيكون اغلى من الجيل الاول من هذا الطراز الاعتراضي


و في النهايه يبقى سلاح " التفله " التقليدي هو انفع الاسلحه  و اكثرها فعاليه و الذي اثبت لحد الان كفاءته في شتى المناسبات و سيصدر قريبا عن دار نشر " عليوي ابو الجص " كتيب لارشادات المواطنين عن انجح السبل لاستخدام هذا السلاح التقليدي و مرفق مع الكتيب صوره مجانيه لاعضاء الحكومه الحاليه و القادمه لتجربه هذه الارشادات. و بامكان القارئ الكريم طلب المزيد من هذه الصوره في حاله تلف الصوره المرفقه مع الكتيب المباع جراء كثره الاستخدام . و يتضمن الكتيب ايضا روابط لمواقع على الانترنت لتمكين القارئ الكريم من تحميل صور اضافيه لمشاهير الحكومه الحاليه و القادمه في حاله رغبه القارئ لاستخدام صوره شخص معين اكثر من غيره لاغراض التدريب و لتقليل الضغط النفسي و اخراج ما مكبوت في النفس . و يتوقع نفاذ النسخه الاولى عند طرحها للاسواق في خلال ساعات قليله  فسارع  عزيزي المواطن الشريف لحجز نسختك من الان.........هاي شنو طلع بالنهايه كل هالحجي هو دعايه لكتيب علوان ابو الجص

 بس لا ضيعت وقتكم عالبلاش

2010-01-24

ديرو بالكم من تشوفون وحده تركص


اليوم و آني بأمان الله كاعد اتفرج وحده من القنوات الفضائيه طلعت اغنيه يكول مطلعها...."هزيلي بالطول...هزيلي بالعرض...و خلي رقصك هذا يزلزلًي الارض"... ما حافظ الكلمات بالضبط



يعني آني مو ضد الفن و كذلك آني اعرف ان تسعين بالمئه من أغاني هالوكت هابطه بس مرًات اكو أغاني تستفزني أكثر من غيرها و هذه الاغنيه تقع ضمن هذا التصنيف يعني الارض تهتز و العالم ينخبص لعده اسباب و أحداث اذكر منها


الحروب: عندما القت الولايات المتحده قنبلتيها الذرييتين على هيروشيما و ناكازاكي و هزت ارض اليابان و اهتز العالم لذلك و انلاصت كليا على جماعه المحور

عالم السياسه: مثل ما حصل في العراق من أمريكا غزت العراق بحجه أسلحه الدمار الشامل . الارض كلها انخبصت في زمن ما قبل و بعد الغزو و بعدين طلع لا أكو أسلحه و لا هم يحزنون و المنادين بعراق ديمقراطي نموذجي انضربوا بوري أمريكي
و لايفوتني ان اذكر البوري الحوزوي للناس اللي راحت انتخبت الحكومه الحاليه و اكتشفوا انهم انتخبوا مجموعه حراميه ... الحقيقه هو هم يرهم نسميه بوري جلبي

عالم المال : العالم كله اهتز على وقع الازمه الماليه العالميه التي ادخلت العالم في ركود اقتصادي و افلست الكثير من البنوك و الشركات و الكثير من الناس اكلت بوري انكشاري يوازي بوري بنك البتراء مع دكتورنا القديس احمد
  
عالم الكوارث الطبيعيه : و آخرها عندما أهتزت الارض تحت أقدام الهايتيين و صار طشارهم ماله والي...الله يساعدهم و يبعد الجميع عن كل مكروه

علوم الفضاء : عندما غزا الانسان كواكب غير الارض و آخرها كان غزو المريخ اللي شغل العالم بالطول و العرض و الروبوت دز كومه صور ملونه عن هذا الكوكب  و بعدين  طلع ماكو لا حياه و لا ناس خضر و انضربوا الجماعه بوري مريخي

عالم كوارث الطيران : مثل ما صار في برج التجاره العالمي  و العالم كله ارتعب و الجماعه الامريكان اكلوا بوري قاعدي و حامضي

عالم الفن: مثل ما حصل السنه الماضيه و اخذ مايكل جاكسون جرعه زايده من الادويه و كعد الصبح و شاف نفسه ميت .العالم كله انخبص و الجماعه اللي ديحضرون الحفله و ماخذين فلوس من الناس أخذوا بوري جاكسوني

عالم الانشاءات : كما حدث مؤخرا و افتتح اعلى برج في العالم في دبي و انخبص العالم على ما ادري شنو و مثل ما حصل مؤخرا في شارعنا من ابو فاضل كدر يجيب جماعه البلديه و يفتح المجاري المسدوده الي صارلهه مسدوده من يوم ما دخلوا الامريكان للعراق و الصراحه احنا جماعه الشارع  حسينا ان العالم كله تغير بعد هذا اليوم التاريخي و ابو فاضل اعترف ان هذا اليوم كان اسعد يوم في حياته بعد يوم تجفيت محرك سيارته الركًه...بس يا فرحه ما تمت بعد ما عرفنا ان المجاري الرئيسيه اللي مجرى الشارع يصب بيهه هيه هم مسدوده....راحت فلوس الرشوه يا صابر

العالم الشخصي : هوايه مرات الواحد ينضرب بوري تخليه يشعر ان الارض تهتز تحت اقدامه و نتركها عند هاي النقطه و بدون تفاصيل حفاظا على الكرامه الشخصيه و تجنبا لتذكر آلام و بلاوي الماضي


الامثله كثيره و متعدده و يشمل كذا مجال بس و الله ما سامع و لا مره ان الاخت لمن تهز بالطول و بالعرض " هاي ما أدري شلون شكل هالركصه " تبدي الارض تتزلزل تحت الاقدام الناعمه الا اللهم اذا الاخ المغني و الاخت الراقصه عايشين في الطابق الثاني من بيت تنك

 هاي بس حجينه على كلمات الاغنيه .... بعد ينرادلنه حجي على لبس الاخت بالفيديو كليب


2010-01-23

أخبار عالطاير






بعون الله تم افتتاح جمعيه ( البتراء لمساعده الغرباء ) الخيريه . و ناشد الدكتور احمد الجلبي مؤسس و رئيس الجمعيه " و العضو الوحيد فيها " جميع الخيرين بالتبرع لضحايا زلزال هاييتي و لمساعده جزر القمر بمناسبه كسوف الشمس  الاخير على ان لا يقل المبلغ عن الف دولار اخضر مع ملاحظه ان الجمعيه لا تقبل التبرعات بالعمله المحليه و لا المواد الغذائيه كونها غير قابله للخزن لمده طويله 

وصل السيد عمار الحكيم لى لبنان ليلتقي السيد حسن نصرالله. و كان قد اعلن ان هدف هذه الزياره هو للتباحث عن امكانيه ايفاد هادي العامري لدراسه الدكتوراه في لبنان و ذلك دعما للحركه التقنيه و تعزيزا لدور الكفاءات العلميه في العراق . هذا و قد ابدت بعض دور الازياء برغبتها بانضمام السيد العامري لهذه الدور بصفه عارض ازياء ولكن الحوزه رفضت العرض بشده دون ان توضح الاسباب و كذلك لم توضح ماهيه الاختصاص الذي سينال فيه العامري درجه الدكتوراه

شوهد صالح المطلك و هو يجمع الحصى من شوارع بغداد. و قد تردد ان المطلك قد هدد بعض الاحزاب و قادتها بالانتقام جزاء بما فعلته ايديهم من استبعاده من الانتخابات المقبله و يظن ان المطلك سيستخدم هذا الحصى في تنفيذ تهديده . و قد تردد ان الدكتور اياد علاوي كان يمد صالح المطلك بالاكياس اللازمه لجمع الحصى

تدور شائعه في الاوساط السياسيه عن نيه جلال الطالباني و مسعود البرزاني باغراق اسواق كركوك بلبن اربيل. و عزت هذه الاوساط هذا التوجه من قبل الزعيمين الكرديين الى رغبتهم في اثبات كرديه كركوك من خلال اضفاء طابع كردي على المدينه

أحتج الملله جلال الصغير على تبذير و أسراف وزير التخطيط علي بابان. و قال الملله المبجل في تصريح ناري ان العراق يحتاج الى توفير كل ما يمكن توفيره لبناء البنيه التحتيه و تطوير الخدمات  و على أعضاء هذه الحكومه ان يديروا العائدات الى الخزينه بحكمه و لذا على الوزير ان يتوقف عن التبذير و ان يغير اسم عائلته من بابان الى باب واحد للمساهمه في توفير النفقات و باب واحد كافي

وزيره البيئه العراقيه نرمين عثمان أقرت خطه كرديه باستيراد مختلف أنواع الضفادع و أطلاقها في أماكن البرك الراكده و المستنقعات في كل انحاء العراق و ذلك كوسيله للحفاظ على بيئه خاليه من البعوض و على اساس ان الضفدع يحب اكل البعوض . و عندما أبدى بعض الخبراء تخوفهم من أنتشار الضفادع بشكل يصعب السيطره عليه قالت السيده الوزيره انها ستستورد لقالق لمكافحه هذه المشكله شريطه ان ترتدي هذه اللقالق الشروال الكردي

قام المسشار السابق الدكتور موفق الربيعي " المعروف بين أوساط العلماء بالدكتور شاهبوري" بنشر دراسه مستفيضه تثبت ان الهامبركر الامريكي سيحل محل الدولمه في المستقبل القريب . و أستندت هذه الدراسه الى جمله من المعطيات و الحقائق العلميه و التي زودته بها مشكوره وكاله ناسا للفضاء و مركز " أوباما للفجل الاسود " للابحاث المفيده . و قد طالب بعض المحللين الدكتور شاهبوري بأصدار تكمله لهذه الابحاث لتشمل مستقبل الفلافل و التبوله. هذا و قد صرًح مسعود البرزاني ان الدراسه تثبت انه " لا بديل عن لبن أربيل " و ان كركوك كرديه

أبو أسراء المالكي يعد السيد مقتدى الصدر بدور كبير و مهم  في الجزء الثاني من فلم الرساله شريطه تعلمه ركوب الخيل و اجادته فن الكونغ فو


انتهى موجز انباء هذا اليوم


2010-01-22

العراق يشتري حقوق نشر صفحه ياهو




اضغط على الصوره للتكبير

صديقي في بلاد المهجر أرسل لي هذا البوستر تحت عنوان " العراق يشتري حقوق نشر  صفحه ياهو"  و قد اضحكني كثيرا . لا أعرف صاحب البوستر و لكن تحيه مني لصانع هذه النكته و الله يديم ضحكات العراقيين الطيبين

2010-01-21

اويلي النفط شكد ينفخ



أذا كنت مكتئب و تحب ان ترفه عن نفسك فأذن يجب عليك ان تقرأ هذا الخبر و التصريح العظيم من الدكتور العلامه حصيني اليوم ستاني آسف حسين الشهرستاني...تعالوا لنقرأ هذا التصريح سويا " و جيب عين و ابجي

يقول حصيني ردا على سؤال حول اين تذهب ايرادات النفط ان وزارته لا علاقه بأيرادات النفط و ان وزارته تستجدي المال من وزاره ابن العم صولاغ " اي من وزاره الماليه " ...حلوه من اتخيل حصيني الشهرستاني يستجدي و يتوسل صولاغ دريل لاعطاء وزارته بعض التخصيصات " لك داده صولاغ.....الموظفين مالي طكوا بجي و ما عدنه ولا فلس ...دخيلك الشتاء على الابواب و ما عدنه ولا جليكان نفط...حبيبي صولاغنا...حل الكيس و انطينا

و يسترسل حصيني قائلا ان ما يحصل عليه لا يكفي لتطوير طاقاتنا الانتاجية، وما خصص للوزارة عامي 2009 و2010 أقل بكثير من حاجة الوزارة....زين ليش تكول سابقا ان حقول شرق بغداد سوف يتم تطويرها بالسواعد العراقيه اذا ما عندكم فلوس ...زين منين راح تنطي رواتب هالمساكين ؟؟؟؟ "للعلم انه لم تبدي اي شركه اجنبيه اهتمامها بتطويرهذه الحقول "!!! لو العسل للشركات الاجنبيه و البصل لولد الملحه ؟؟؟
و عندما سئل السيد اليوم ستاني عن تأثير الازمه العالميه على النفط العراقي و الموازنه العامه اجاب ان العراق يبيع بالسعر العالمي، وعندما يحدث هبوط نتأثر به كما يتأثر به الاخرون، والعام 2009 هبطت فيه اسعار النفط من سعر اكثر من (140) دولار للبرميل الواحد، الى دون الـ (40) دولارًا وبذلك كانت اكثر من (100) دولار، وهي بالتأكيد تؤثر على العراق والدول الاخرى...زين سؤال برئ....الموازنه العراقيه كانت تستند على اي سعر اثناء أقرارها...مو صحيح ان الموازنه اقرت بسعر اقل بكثير من ال 140 دولار للبرميل...اذن يجب ان يكون هناك زياده عن قيمه الاقرار حين ارتفعت الاسعار..زين وين راح الفرق يا دكتور حصيني ؟؟؟؟

و سئل كذلك عن اي حد يمكن ان يصل انتاج النفط العراقي مستقبلا فاجاب نحن الان في موجب العقود العشرة سنصل بالطاقة الانتاجية الى اكثر من (12) مليون برميل في اليوم، منها (11) مليون برميل من هذه الحقول العشرة ومليون اخر بالجهد الوطني من بقية الحقول " هم راح اسأل منين راح يجيب الفلوس اذا تخصيصات الوزاره اقل من حاجتها " ، والايرادات من الممكن ان تتوفر للبلد تكون بحدود (200 – 250) مليار دولار سنويا بالاسعار الحديثة التي هي الان (70) دولارًا للبرميل الواحد، وكلما ترتفع الاسعار في السنين الآتيات سيرتفع هذا المبلغ وهو بالتأكيد اكثر من حاجة العراق السنوية إلى اعادة الاعمار

دكتور حصيني...كم سؤال


اولا : طاقه الانتاج يجب ان تقابلها طاقه مماثله بالتصدير...حاليا لا يملك العراق نصف امكانيه تصدير ال12 مليون برميل التي تتكلم عنها...زين شلون راح تصدًر الباقي...بعربانات ام الحصان ؟؟؟


ثانيا : شلون عرفت ان المبلغ الناتج هو اكثر من حاجه العراق السنويه للاعمار و شلون حسبتهه...بس لا ناوي تنطي الباقي للجاره العزيزه ايران لانهم مساكين محتاجين كم فلس حتى يبنون المفاعل الجديد مقابل البصره...و بطريقك تحول كم فلس لحساب شركاتك في الخارج


و سئل الصحفي دكتورنا الفلته عن الارقام الهائلة من صادرات النفط فيما الرواتب قليلة مع الغلاء فاجاب فطحلنا اليوم ستاني ان صادرات النفط تمثل ثلثي الدخل الوطني العراقي الذي هو 63 مليار دينار، ولو نعتبر نفوس العراق 31 مليون يعني معدل دخل الفرد ثلاثة الاف دولار سنويًا، وبالتأكيد ان الجديد هو في تحسن الخدمات في العديد من النواحي الصحية والخدمية وغيرها...زين سؤال...أذا بزمن النفط ابو ال 140 دولارالمواطن مشاف اي تحسن في الخدمات لا من الناحيه الصحيه و لا الخدميه...زين يا تحسن دتحجي عليه و سعر النفط اليوم بحدود النصف... اشو الوضع من سئ الى اسوأ ..بالطبع انا لا اتكلم عن وضع جيوبك و جيوب جماعه المنطقه الحمراء


النكته الاخرى التي ادلى بها دكتور حصيني هو ان ما حققه العراق كان امرا غير مسبوق في الصناعة النفطية، لا من حيث طبيعة العقود ولا سقف الانتاج الذي تحقق للعراق والذي لا احد يتوقعه، ولا بالنسبة إلى الاسعار التي وافقت عليها الشركات وهي الادنى، وكان البعض يتحدث عن عصر النفط ما بعد العقود العراقية لان الدول صار لها العراق انموذجًا تحتذي به في تطوير صناعاتها النفطية تحت سيطرتها الوطنية وترفع هذا المستوى الذي هو من الانسب لها....و داعتكم صار لي ساعتين احك براسي على حجايه عصر النفط ما بعد العقود العراقيه هذه....بالضبط هوه شنو اللي صار...و شلون صار العراق نموج يحتذى به في تطوير صناعه النفط و الجماعه الاجانب ليهسه ما بلشلو يحفرون و لو حفره صغيره وصار الكم كم اسبوع من وافقتوا على هذه العقود !!!! اشو حقولنا بعدهه بحاله يرثى لها ...زين يا سقف انتاج الذي تحقق للعراق اذا لحد الان انتاج العراق لا يزال دون الحد المسموح للعراق بتصديره...يعني بصراحه دا أشوف كومه فيال و بعران ده تطير عالي


وسئل البروفسور حصيني عن الكلام الكثير عن وجود فساد مالي كبير في عقود الشركات التي وافق وصادق عليها الوزير فقال سعاده الوزير بأن لا يوجد مثل هذا الكلام ابدا وانه لن يوافق او يصادق على عقود فيها فساد وتحداه بان يعطي امثلة عن ذلك فاردف الصحفي بقوله


مددتم لشركة (رام) لحفر الابار النفطية على الرغم من ان المفتش العام قال انها كبدت العراق خسائر كبيرة ورغم اعترافكم انها متورطة بفساد مالي؟


- لم نوافق على شركة (رام) ابدا، وأحلناها الى المحاكم.


* لماذا وافقتم على عقد شركة (فجر الجزيرة) رغم انها معروفة بتهريب المشتقات النفطية ومدرجة على القائمة السوداء؟


- هذه الشركة اوقفنا العمل والتعاون معها وبأمري

بروفسور حصيني اليوم ستاني... مو جنابك مددت عقد شركة رام لحفر 60 بئر نفطي قيمة العقد اكثر من مائة مليار دينار عراقي مع ان تقرير المفتش العام لوزارة النفط المرفوع اليك اشار الى عده مآخذ على هذه الشركه و انك مددت العقد بهامش يشير الى ان ذلك تم بطلب من رئيس الوزراء بدون تقديم اي دليل على ذلك ومن استجوبوك و سئلوك عن هذا الشئ مكدرت تكول اي شئ.....صحيح لو مو صحيح دكتور حصيني..ومو صحيح اتك مددت عقد فجر الجزيره و الهامش بخط ايدك.... يا جماعه ما ادري ليش مرات آني أنخبش بشغلات ما تخصني


اما المقطع الاتي فراح اطبعه مثل ما ورد بالمقال


كثير هو الكلام الذي يقال عن وجود فساد في الوزارة، ولكن ما اريد ان اعرفه هو هل يمكن لعالم ذرة ان يكون المال نقطة ضعفه؟


اذكر لك حادثة اخرى، بعدما تم اعتقالي وتعذيبي من قبل نظام الطاغية، كنت مشلولا في كل جسمي ومطروحا على الارض ولم يتحرك عندي اي اصبع " دشوفوا شلون متفح بالصوره اعلاه " ، جاءني برزان التكريتي وانا مرمي على الارض، وقال لي : (السيد الرئيس يسلم عليك (يقصد صدام) وكلفني ان اتحدث معك) ثم بدأ يشتم الامن، ثم قال (نحن حضرنا لك قصرًا في المنطقة الخضراء التابعة لهم (القصر الجمهوري) ونريدك ان تجيء وترجع الى عملك في الطاقة الذرية، والرئيس قال اعطوه شيكًا مفتوحًا في سويسرا يسحب منه ما يريد، والقصر فيه امتيازات)، لكنني رفضت التعامل معهم، اترى ان نقطة ضعفي المال فيما قلته.


و الله هنا  متت من الضحك لو ما الدكتور جيراني انقذني بآخر لحظه " جان صار لقبي شهيد الحصيني " يعني هوه جان مشلول في كل جسمه...مطروح على الارض...لم يتحرك عنده اي اصبع...و البطران برزان التكريتي جاي يريد يحجي وياه....زين ليش يحجي وياه و هوه مرمي على الارض...ماكو كراسي ...زين دجيبله دكتور الاول...شربه عصير برتقال...خليه ياخذ حمام ... وبعدين احجي وياه...ليش هيجي برزان ضيعت على نفسك فرصه العمر ...وانت دكتور حصيني ...يعني شنهو هالنضال و الصمود اللي ديخر منك خر...يعني واحد بهاي الحاله " هاي اذا صدك اذا انت جنت بهاي الحاله " شلون راح تكون واعي لكل هالتفاصيل و تكدر تسمع و ترد....بس اريد اعرف انته و بهاي الحاله شلون كدرت تفتح حلكك و تطلع الكلام و تكله البرزان  " لا بويه...انت عليمن جاي...روح كلله لصدام خلي ينسه انو اتعاون معاكم..و طبكم طوب..فلا راح تكدرون تسوون قنبله نوويه بدوني " .. و الله عمي انت حديد....بعدين هاي اول مره اعرف انو صدام راد ينطي جزء من قصره لسعاده العالم الفلته ..زين اذا صدام راد ينطيك فلوس ليش ينطيك اياها بسويسرا....شنو مجان مخترعين شئ اسمه بنوك بالعراق....معرفنه الصك جان بالدولار الامريكي لو بالفرنك السويسري....اكلك...بس لا هذا برزان حوسم الشيك و قال لصدام انك اخذته...كلشي يجوز


والمقطع الاخير من المقابله كلش أثر بيه و ابكاني...اسمعو شكال عندما سئل عن ماذا يفكر بعد الانتخابات المقبلة واين سيكون وبماذا يرغب فأجاب


انا شخصيًّا.. أديت ما عليّ للعراق سواء في مقارعة النظام الدكتاتوري، والحفاظ على ثروة العراق الوطنية التي هي النفط، واعتقد ان ما اديته للعراق وللشعب العراقي هو شرف كبير، وسوف اسعى مع اخواني في ائتلاف دولة القانون لبناء عراق موحد كريم عزيز يعيش ابناؤه في ظل قانون يساوي بين المواطنين في الحقوق والواجبات ونجنب ابناءنا واحفادنا المآسي التي تحملها هذا الجيل والذي قبله، وانا انظر الى العراق بعد عشر سنوات عراقا اخر بمستوى الاعمار والبناء والخدمات والمستوى المعاشي للمواطنين


عني انا شخصيا فاني لم اتوقف عن البكاء عندما قرأت هذا الكلام و اترك لكم تخمين هل كنت ابكي من التـأثر ام على العراق في ظل هؤلاء؟؟؟


ملاحظه: شفتو كم هاتف على مكتب الاستاذ بالصوره أعلاه....زين ليش ؟؟؟


2010-01-20

منعرف باجر المن راح يلزمون



و الله يا جماعه اني تفاجأت عندما قرأت خبر القبض على "والي ولاه العراق" . تخيلت نفسي كاني أشاهد فلم ديني قديم أو مسلسل تاريخي على غرار مسلسل هارون الرشيد او الناصر صلاح الدين او ما شابه. الظاهر ان جماعه القاعده متأثرين بهذه المسلسلات و الافلام " على فرض ان الافندي قاسم عطا يتكلم صدقا وان هناك شئ اسمه دوله العراق الاسلاميه او هناك والي كاللذي قبضوا عليه ". الحقيقه أول مره اسمع بمنصب بوالي الولاه هذا....العفو ليش كم والي اكو بالعراق ؟؟


يقول قاسم عطا ان والي الولاه هذا قد اعتقل ضمن خليه تابعه لتنظيم القاعده مكونه من 4 اشخاص .زين هيجي واحد بهذا المنصب المهم مثل والي ولاه دوله الالف عمامه و عمامه يحيط به 3 اشخاص بس...مو شويه غريبه..زين من جانوا يطلعون الرجل الوطواط الزرقاوي بالتلفزيون شفنه وياه كومه زلم...زين هذا الرجل اللي يشغل منصب واااالي ولاه العراق و مكمشوا وياه غير 3 اشخاص بس...شنو البقيه وين راحوا...عدهم عطله راس السنه لو جانوا رايحين مسواك لو شنو.. والله اعلم يمكن واحد من اللي كمشوهم كان ( طاهي طهاه العراق) حتى يطبخ اكل للوالي ماله

و فوكاهه يكول ثارم عصا ..اسف قصدي قاسم عطا ان من بين الاربع اشخاص هناك شخص سعودي الجنسيه في بغداد ضمن الخليه التي تنتمي الى (دوله العراق الاسلاميه) زين ما افتهمنه اذا الدوله الاسلاميه هيه عراقيه زين شجاب السعودي بالنص

السؤال الاخر اذا الاخ اللي لزموه هو والي ولاه العراق زين ليش ما سموهه ( ولايه العراق الاسلاميه ) وليس ( دوله العراق الاسلاميه) ....مو يمكن جماعه ثارم عطا شطحوا شويه زايد هالمرًه

و يقول قسومي عطا ان الصماخ الكبير " والي ولاه العراق هذا " مسؤول مباشر عن العديد من الاعمال المسلحه التي شهدها العراق بما فبها العاصمه بغداد . زين اسمعوا العمليات التي ذكرها ثارم عطا عن هذا الارهابي

تفجير مقر الامم المتحده عام 2003 مع العلم ان هذا التفجير اعلن عن مسؤوليته عده جهات منها القاعده و جيش محمد و انصار الاسلام و انصار السنه و كل واحد زايعته الدنيا
تفجير صهريج مفخخ امام مركز شرطه الرشاد
تفجيرناقله للجيش العراقي في ديالى
تفجيرمواقف عمال في بغداد الجديده
الاشراف( يعني مو منفذ ) على تفجير ناقله للجيش الامريكي.. منعرف وين
مسؤول عن حلقات المفاوضات مع ذوي المخطوفين الاجانب ..منعرف يا اجانب مخطوفين ديحجي عنهم ثارم عصا هذا


زين بشرفكم عدا تفجير الامم المتحده هاي اعمال و عمليات تليق بواحد بمنصب والي ولاه العراق...زين شنو العمل البطولي اللي يستحق ان يتقلد من اجله هذا الارهابي منصب والي الولاه . زين مو المفروض مثلا ان يقود هذا الوالي جحافل المجاهدين و ينزل دك بالجيش الامريكي و العراقي و يسوي بيهم شغلات تشيب لها الولدان على الاقل يحفظ هيبته امام اتباعه

و يقول ثارم عصا ان الوالي هذا كان يعمل طيارا بالخطوط الجويه العراقيه....شنو بالاكاديميه ديعلموهم يطيرون طيارات لو يطيرون رقاب ناس...هذا اذا سلمنا ان ثارم البصل عطا يقول الحقيقه

المصيبه الكبرى ان ثارم عصا يقول انهم اعتقلوا والي الولاه هذا في 26 حزيران من العام الماضي و يتفاخر بهذا الانجاز...زين اذا الوالي هذا جان ديشتغل من سنه 2003 بدليل ضلوعه في تفجير الامم المتحده وين جانوا زلم عطا كل هل 6 سنين المنصرمه

زين سؤال أخير....أذا انتم لزمتوا والي الولاه بجلاله قدره....زين منو اللي ديسوي كل هالتفجيرات الداميه الاخيره ؟؟؟

يابه ثارم البصل عطا....يمكن شويه احنه سود...بس مو الى هذه الدرجه هنود

2010-01-17

صوره تتكلم



ظافر العاني ( في يمين الصوره )  للدكتور اياد علاوي: اكللك هذا شبي صالح المطلك متخشب مثل التمثال و عيونه شاخصه كانه شاف بعبع


أياد علاوي : هاي من سمع مراح يخللوا يترشح بالانتخابات المقبله و هوه على هذا الحال .. لعد شعبالك ...خساره الكرسي مو هينه ...أسالني آني اللي كنت رئيس وزراء


2010-01-16

خطيه...و الله حرام



نشرت ال سي ان ان قائمه بالارصده و الاماكن التي يمتلك فيها قاده النظام الايراني ارصده خارجيه . طبعا هذه الارصده هي من بركات الامام المنتظر و من استجابه الله لدعاء الوالدين

و يقال و الله اعلم ان الساده في ايران يتاملون خيرا على اساس ان هذه الارصده هي من علامات ظهور الامام و كلما كبر رقمها و حجمها كلما اقترب فرج الامام و لذا تراهم يحثون بعضهم البعض في تدبر الوسائل الكفيله بزياده هذه الارصده


و يتبين من حجم هذه الارصده ان الربع في ايران قد نزلت عليهم بركات الامام منذ مده غير وجيزه . و الظاهر ان هذه البركات تكون معديه بشكل شديد فترى ان معظم اقرباء الحكومه الايرانيه و قد انتقلت اليهم هذه العدوى


و مربط فرسنا في هذه القضيه هو انه يبدو ان عدوى مرض البركات هذه قد انتقلت الى أعضاء الحكومه العراقيه في اثناء فتره تواجدهم في ايران و احتكاكهم مع الجماعه في عصر ما قبل الاحتلال . و يبدو ان الربع الايراني قد درب اعضاء الحكومه العراقيه على كيفيه التعايش مع هذه العدوى . وانطلاقا من مبدأ " عدوى الحبيب مثل اكل الزبيب" فقد تجرع اعضاء حكومتنا الموقره هذا البلاء بكل صبر و جلد


و يقال ايضا ان الحكومه العراقيه و حال استلامها السلطه قد حاولت و بشتى الوسائل و السبل مكافحه هذه العدوى فانشأت لهذا الغرض مستشفى بنك البتراء تحت اداره دكتورنا البارع احمد الجلبي . هذا ولا تزال نتيجه العلاج غير معروفه لحد الان و لكن تقريرا سريا قد تم تسريبه كان قد ذكر ان دكتورنا البارع الفطحل احمد الجلبي كان هو نفسه من يوزع فايروسات هذه العدوى و لكن ناطقا باسم مستشفى البتراء قد نفى هذه الادعاءات


هذا و دعا اعضاء الحكومه لعقد مؤتمر لتدارس السبل الكفيله بابقاء هذه العدوى داخل نطاق الحكومه و ابعاد المواطن العراقي البسيط عن اي نوع من انواع هذه العدوى حفاظا على سلامته و درء لاي ضرر قد يصيبه


هذا و قد حاولت بعض الوكالات معرفه ماذا سيناقش اعضاء الحكومه في هذا المؤتمر فرد السيد الحكيم ان كل ما يستطيع البوح به الان هو شعار المؤتمر و الذي اتفق عليه كل الاعضاء و بالاجماع و عندما سئل عن هذا الشعار اجاب مشكورا ان شعار المؤتمر سيكون " الدولار الاخضر ينفع في اليوم الاغبر " ...... اللهم عجل فرجنا و اشف مرضانا ...اللهم آمين

خواطر سريعه....و جديًه




اللوحه اعلاه مقتبسه من احد المدونات


اضطرني حظي العاثر لاخذ لقاح من خلال ابره في اليد . تالمت اثناء غرز الابره. سالت نفسي عن مراكز الاحساس عند البشر و استنتجت انه لو غرزت ابر صينيه في كل جسد اعضاء الحكومه فانهم لن يحسوا ...لا فرق...يا ترى لماذا؟


..........................................................

رأيت جاري ابوفاضل يتأفف و يضرب كفا بكف و هو يقول " مصايره بتاريخ العالم ...لا ماء صافي و لا كهرباء و لا عيشه مثل العالم ...شلون بلوه ...و المصيبه مدنشوف اي حل

فقلت لجاري ابو فاضل " اللي قاري تاريخ العالم كله " لا بد ان يكون هناك ضوء في نهايه النفق...قال لي .. ابني احنا النفق مالنه حلقه ما الهه نهايه ....ماكو غير الظلمه



قلت لجاري ابوفاضل مشجعا ...اذن الحل هو بكسر حائط هذا النفق حتى نرى الضوء

رد ابو فاضل .. ابني اخاف نكسر الحايط و يوكع النفق على روسنا

فقلت له لا تخاف.. الهيكل والاساسات قويه ..صارلها 6000 سنه قائمه و لا زالت قويه رغم انف الطامعين 
............................................................

قال لي صديقي شناوه انه حيث يسكن في بلاد المهجر يحتفل الاكراد بعيد نوروز. فتراهم يقيمون احتفالا كبيرا يضم كل الاكراد في ذلك البلد. و في الاحتفال تراهم يسالون بعضهم البعض " من اكراد اي بلد انت "  لانه و كما تعرف يسكن الاكراد في العراق و سوريا و تركيا و ايران

قلت لصديقي شناوه " شكد حلو الكردي هنا في العراق و اينما يذهب لا احد يسأله هذا السؤال حيث الكل يعرف انه عراقي و هو منا و فينا" ....مو صحيح هذا الكلام كاكه مسعود ؟
...........................................................


في شوارع بغداد ترى كل انواع السيارات القديمه منها و الحديثه. أسترعى انتباهي ان هذه السيارات على اختلاف انواعها و حداثتها و منشأها كلها تعاني من نفس المطبات و الازدحام و الحواجز و التأخير الا أذا كانت السياره تابعه لمسؤول حكومي فبهذه الحاله لا تنطبق قوانين السيرعلى سياره سعاده المسؤول


جال بخاطري اننا في العراق كعراقيين حالنا حال هذه المركبات نتكون من عده طوائف و ديانات و نختلف في الاعمار و الالوان و اللهجات و الدين حالنا كحال اي بلد في العالم لكننا كعراقيين كلنا كهذه المركبات نعاني ما نعاني من مطبات الحكومه الموقره من عدم الامان و فساد و اهمال وتقصيرو غبن و رشى و ما الى ذلك الا اذا كنت قرد من قرود الحكومه


لكن لا بد ان ياتي اليوم و ان تحل ازمه السير هذه ...لان دوام الحال من المحال

.........................................................


الم شديد يعتصرني كل يوم...يشتد...يلفني...يبكيني...قال لي الطبيب بعد الفحص الشامل....عندك مرض مزمن اسمه حب العراق... و مع شديد الاسف فان لا دواء له و لا شفاء منه .... ومع ذلك خرجت من عنده فرحا

2010-01-12

و بئس المصير


في يوم الحساب و الناس على افعالها تحاسب ترى فريق في الجنه و فريق في السعير. حين فتح باب جهنم لالقاء بعض الكافرين فيها سمع هذا الحوار

-أويلي يابه يمعودين الحكوني. يمعودين ما أريد بيبسي او عصير راوخ. بس أريد ماي بارد . يمعوديييييين دخيل الله

فرعون : من هذا المزعج . لقد صدع رأسنا بصراخه . الم يعلم بما سيلاقيه في جهنم و اي عذاب سيرى عندما اقترف ما أقترف في دنياه

أحد الكافرين: يقولون انه من احد اعضاء الحكومه العراقيه في زمن الاحتلال الامريكي

فرعون: سمعت انهم جميعا سيكونون معنا

الكافر: انهم يأتون تباعا و هذا أولهم

فرعون: ما بك يا هذا . الم تسمع في جهنم و عذابها في زمانك...الم تكن من امه محمد؟

الصارخ: بلي وداعتك. هويه الاحوال مو ويايه جان شوفتك مكتوب بيهه مسلم. و داعتك ما خليت لطميه ما شاركت بيهه .خوب كل سنه اوزع خبز العباس ...شنو هاي ما غزرت

فرعون: من انت يا هذا

الصارخ: انا احد اهم عضو من اعضاء الحكومه العراقيه في زمن مشعول الصفحه بوش. محد ورطنا غيره

فرعون: اسكت ثكلتك امك

الصارخ:ما أسمحلك تحجي على امي

فرعون: الم تعلم ان كلما ارتفعت منزلتك في الحكومه صارت فرصتك بالسرقه و ظلم الناس اكبر و بالتالي عذابك في جهنم سيكون أشد....ثكلتك امك و على عنادك

الصارخ: اويلي يابه...دخيلك ربي ...انسمطت سمط...كل ما جنت اسوي شئ اسأل المرجعيه و كلهه جانت تكولي ...روح سوي التريده و ماءك بالصدر...لازم اكو شي غلط...يمعودين دققوا زين....اخاف اكو خلط بالدفاتر و اكوا واحد زوًر الدفتر مالي مثل ما جنه  نزًور الانتخابات

فرعون: كلنا كنا نسمع بظلمكم . سمعتكم الكريهه وصلت للدرك الاسفل

الصارخ: يمعود انت هم جاي تتفلسف براسي...على اساس انت سمعتك ذهب و كاعد جنابك هسه بفندق سبع نجوم.... مو هيانه وجهك اسود مثل الكير من النار .....دخيلك ربًي شنو هالحر...هسه حسيت بالناس من جانت تنكطع الكهرباء بعز آب اللهاب

فرعون: أراك صلفا رعديدا كما كنت في الدنيا... و لكن هيهات ان تفلت من عقاب الله . هنا الآخره و هنا المستقر

الصارخ: بشرفي اذا ما سكتت يا فرعون لا أخلي جماعه بدر يثرموك  ثرم  بس  يوصلون

أحد الكافرين: ايهذي هذا المجنون ام لعله يظن ان الامر لا يزال بيده

الصارخ: لك شوف دا أكللك...آني مسويت شي..همه الامريكان و الايرانيين جانوا يكولونه على الشئ و احنه نسويه
بعدين قابل آني لوحدي اللي سويت كلشي...موالربع اللي وياييه كلهم مشتركين

احد الكافرين : ارانا سندفعه الى الطابق الاسفل لنرتاح

الصارخ: لا بويه اذا اكو طابق جواني فكلنه ننزل بيه....لو نسوي قرعه و اذا طلع اسمي ندز واحد بدالي و انطيه حصه بالمقاوله الجايه ....ها شدكولون

فرعون: قد جن هذا الرعديد و اكلت النار ما تبقى من عقله

الصارخ: لا بويه آني محد ياكل منًي شئ ...عمري كله آكل الناس و محد ياكلني ...بس الامريكان و الايرانيين ياكلون براحتهم....دخيلكم اشتعلت ..آني جنت اسمع الناس تدعي و تكول ...اللهم خذهم من المنطقه الخضراء الى جهنم الحمراء....اشو هنا الحاله سوداء....اكيد اكو غلط

وهنا فتح الباب من جديد و رمي في جهنم جوق جديد و صرخ احد الداخلين الجدد بعد ان شاهد صاحبنا ملقى يتلوى من العذاب....هلو حبيبي هاي انته هم هنا

فرد الصارخ: هلو كبدي....لك هاي شلون طركاعه...زين اذا احنا الاثنين هنا ...منو راح يرتب المسائل و الرشاوي حتى يطلعنا من هنا؟

فصاح به فرعون: يا معتوه...من تظن نفسك..أذا كنت ترشي و ترتشي في دنياك فهنا لا يوجد لا راشين و لا مرتشين ...انت بيد الماك العادل اللذي لا يضيع عنده مثقال ذره و لا يدع مثقال ذره الا و اخذ لكل ذي حق حقه... ..دشو ثكلتك امك انت و صاحبك قبلت بهذا ام لا

اجاب الصارخ: ولك غير الوكت ذبني....آني اللي ما جانت مقاوله تفلت من ايدي. ما كو صفقه سلاح مغشوش ما بيهه خبزه زينه الا و جان الي حصه بيهه...ما كو بضاعه اغذيه فاسده اذا ما جان اللي ضلع بيهه...خوب ماكو بيت حلو اذا ما صادرته...و الله ما خليت قصور على اي عضو بالحكومه...جنه كلنه نلغف سويه مثل الاخوه....ليش تاليهه هيج...اكيد اكو غلط

العضو الداخل الجديد مؤيدا: اي والله دائما جنه نخلي مصلحتنا العليا امام مصلحه  الوطن و المواطن السفلى حتى نعلو و نعلو وتاليهه صرنا اسفل السافلين

صاحبنا الصارخ: مو آني دا أكول....اكو غلط بالموضوع

فرعون مستهزئا: هذا حال الظالمين في الدنيا يظنون ان لهم اليد العليا و ينسون ما ينتظرهم في الاخره و في يوم الحساب

الصارخ: و الله محد مدمرني غير هذا الفرعون...ناصب علينا من فتنه ليهسه...ما ادري ليش كارهنا

العضو الداخل الجديد: يمعود هيه بقت على فرعون...الشعب العراقي كله جان يكرهنه و نازلين علينه نصب بالمدونات مالهم...دخيلك ربي....احتركت حرك....يمعودين شويه هوه و ماي

و هنا جاء فوج ثالث و كان معظمهم من اعضاء الحكومه

صاحبنا الصارخ: هلو كاكاو....الربع كلهم هنا...مدا اشوف زين الدخان عماني...هاي كلهه المنطقه الخضراء هنا

و هنا تكلم احد الداخلين بلهجه غريبه و قال....هاي صديق...شلونكم

الصارخ...اويلي يابه هذا بوش...انت شجابك هنا....مو رئيس جمهوريه امريكا...و بالك عنه ...تاليهه ويانه بهالمنطقه السوداء

بوش: آني ما يدري....الزاهر حوبه عراق و عراقيين...كالولنه فوك...انت و ربعك كلكم ينزل جوه .آني كلتلهم آني يدور على اسامه ابن لادن ولازم يلكيه هذا الاسامه...كالولي انزل جوه و انته تلكيه

فرعون مستهزئا : حشر الظالم مع الظالم وكلهم الى بئس المصير

صاحبنا الصارخ: هذا اذا ما سكت راح ادزله مفخخه لو اخلي احد يخطفه و يذب جثته وره السدًه

و هنا دخل احد زبانيه جهنم و صرخ بهم قائلا...انتهت استراحه جماعه الحكومه العراقيه ...الكل ينزل الى الطابق الخاص... واذا ما اندلليتو بس اسالوا عن طابق القلي...راح تندللوا من صوت الصياح.....يللللله.... الى الاسفل در

و هنا بانت على وجه فرعون ابتسامه ساخره و تمتم مع نفسه قائلا.....الحمد لله اني لم اكن معهم في طابق القلي ......


وسمع صراح عالي من بعيد يقول....يا جماعه اكيد اكو غلط




2010-01-09

اخبار سريعه و تعليق اسرع



قوات بريطانية حاولت انقاذ الرهائن البريطانيين الخمسة عند الحدود الايرانيه قبل اكثر من سنتين كانت ميليشات مصائب أهل الحق قد اختطفتهم وسارعت بهم الى ايران ولاحقتهم قوات بريطانية لكنها فشلت باللحاق بهم. عمي شنهي السالفه.... هيجي جماعتنه صاروا يركضون سريع و حنه ماندري ...زين ليش مركضوا هالركض من الجنود الايرانيين دخلوا لحقل الفكه


عبد المهدي يؤكد ضياع فرصه ائتلاف الحكيم و المالكي : اويلي يابه ضاع مستقبل البلد . هسه بس لا الربع يسولهه مناسبه سنويه و يشتغل بيهه اللطم و التطبير


وصفته بالسفاح الإيراني وضابط الاطلاعات واتهمته بتلقي الدعم من أحزاب طائفية عراقية في سدة الحكم دار النشر الحر: جلال الدين الصغير يعد لحملة تصفيات جسدية واسعة قبل موعد الانتخابات: الرجال صارله سنين يطبًر بالعالم و دار النشر الحر نايمه و رجليهه بالشمس.... أو الظاهر الرجال عباله كل يوم اكو انتخابات


قوات عمليات بغداد تسرق 100 مليون دولار من بنك بريطاني :لازم فرغت خزينه الدوله كبل ما ينترس جيب الجماعه


العلماء يسعون للتوصل الى خاصيه نمو الاصابع و الاطراف اللتي يفقدها البشر : و الله نصيحتي لهؤلاء العلماء ان يستشيروا اعضاء الحكومه العراقيه الموقره اللي طلعتلهم ستين ايد و مئات الاصابع و اشتغل اللغف بشكل غير طبيعي و يسألونهم شلون كدروا يطلعون هالايادي و الاصابع و اعتقد انهم لازم يبدون بعمار الحكيم و الدكتور الجلبي توفيرا للوقت و الجهد و ضمانا لاحسن و ادق النتائج

السفير البريطاني في بغداد يقول ان الوضع القائم حاليا أفضل بكثير مما كنا نظن أنه سيكون في 2004 - 2005 هاي الافضل بكثيرمما كانوا يظنون شكلهه هيجي لعد من بوش كال راح نخلي العراق نموذج للعالم شجان خال في باله


كلينتون: إمّا تحقيق السلام في السودان وإمّا عودة الفوضى : ما أفتهمنه هذا تحذير لو تهديد . الربع الامريكي بدأوا بالاعيبهم و حروبهم باهل العراق ذوي البشره السمراء و سوف يمرون باليمن ذوي البشره الاكثر سمارا و سيصلون الى السودان ذوي البشره السوداء . لو آني هندي جان خفت على مستقبلي لا يروح بالرجلين

.
كشفت وثائق ، ان وزير العلوم والأبحاث التقنية في ايران كامران كانشجو، تحول الى المسيحية عندما كان طالباً في بريطانيا، وتم تعميده في اليونان تحت اسم جورجيوس كامران كانشجو في 8 سبتمبر 1978، ليتزوج بعد أيام من الطالبة اليونانية المسيحية أولغا، وفق سجلات كاتدرائية الصعود في مدينة فولوس اليونانية، ومكتب المطران ديمتريادوس. لو تنخبشون راح تلكون 90% من اعضاء الحكومه العراقيه حولوا ديانتهم الى اليهوديه او الزرادشتيه . اما الاسماء فحدث و لا حرج باقر صولاغ صار بيان الزبيدي و شاهبور صار الربيعي و حمار صار عمار ....يلًه... بيتنه و نلعب بيه شلهه غرض بينه الناس

اتهم رئيس لجنة الشهداء والسجناء السياسيين بمجلس النواب العراقي، محمد أحمد، حكومة الإقليم بالاستحواذ على رواتب عائلات الشهداء والسجناء السياسيين في الإقليم للأعوام الثلاثة الماضية، رغم قيام وزارة المالية الاتحادية بصرف تلك الرواتب وتسليمها لحكومة أربيل. كاكا مسعود و ماما جلال ديشتغلون بمدأ الحي ابقى من الميت...ليش انتوا مدتفتهموهم و تاخذون كلشي بسؤ نيه بعدين ياهو الاحسن ...ينطون الفلوس لاهل الشهداء حتى يتلفسوهه لو لحكومه الاقليم حتى يسووا بيهه مشاريع للاجيال الحيه و القادمه

لعنة ناطحات السحاب تترافق مع الأزمات وتكمن السخرية كما يشير البعض إلى أن تزامن هذا الافتتاح مع الأزمة المالية التي تمر بها إمارة دبي والعالم ليس فريداً من نوعه، بل إن التاريخ يدل على أن العالم عاش أزمات اقتصادية قاسية في كل مرة كان خلالها البشر يفتتحون ما يوصف بأنه "أكبر مبنى" على وجه الأرض. اشوا احنا اللعنات بالعراق نازله علينه دك و ماعدنه ولا ناطحه سحاب واحده...غريب امور عجيب قضيه


قال وزير الخارجية الايراني منوشهر متقي ان حرس الحدود وقسما من العسكر هم الذين احتلوا حقل الفكة النفطي في محافظة ميسان وإن الاوامر قد صدرت الى اعادة الاوضاع الى طبيعتها السابقة و قادة البلاد يؤكدون لمتكي ضرورة اعتماد الحوار أساساً لحلّ الخلافات : عصفور يقود زرزور.... و من دَبَش راح تقبضون

قال صالح المطلك زعيم الجبهه العراقيه للحوار الوطني امس انه اذا تقرر فعلا حضر مشاركته في الانتخابات المقبله بدعوى صلاته بحزب البعث المنحل فانه سيتوجه الى الامم المتحده و المجتمع الدولي. عمي صلًوحي خلفيه باتريوس بالعراق تعادل اكثر من الامم المتحده و المجتمع الدولي ..ليش متعلمت حساب ليهسه ...دروح الحك بوسهه بلكت تنحل
قضيتك

ملاحظه : الصوره اعلاه و الله اعلم لماما جلال و ابو أسراء لحظه سماعهم بخبر نيه صالح المطلك التقدم بشكوى الى الامم المتحده على خلفيه اقصاءه من الانتخابات القادمه



2010-01-06

نقلا عن جاسب برس

مام جلال يحب الكل و الكل تحب الماما . تحت هذا الشعار قرر كاكا جلال ان يعقد لقاءات لتنقيه الاجواء قبل الانتخابات و ليبحث عن افضل الوسائل لملء الاستمارات الانتخابيه نيابه عن الشعب العراقي

و اكد المام للجماعه ان كل ما يسمعونه من كلام عن عدم ترشيح انفسهم لولايه ثانيه " مثل ما قال المام عن رغبته في التقاعد و مثل ما قال موفق الربيعي عن عدم رغبه المالكي لترشيح نفسه لولايه ثانيه " هي محض هراء لابعاد عين الحسود . فكل اعضاء الحكومه و البرلمان يعرفوا كم هم محبوبون و لكنهم محسودون و اهم ما اوضح مام جلال للجماعه هو الاتي


ازدقائي و احبائي لا يتعارك الواحد مع الواحد الاخر.انتو مثل الابن مال آني و اسمعوها مثل ما تسمعون الاب مال انتو

ماكو احسن من العيراق .الفلوس و النفط في كل مكان. شوفونا احنا اكراد دوله كردستان نلغف من النفط و الموارد. بعدين نطالب الحكومه المركزيه بحصه من موارد العيراق. بعدين ناخذ كمرك من المهربين و غير المهربين. كتكوتنا عمار الحكيم بدا يتعلم و يسوي بزنز و يهرب نفط و يطالب باقليم الجنوب. كل هذا و الحكومه مو بس ساكته انما تشاركنا بهذه الفعاليات . وين يلكوهه انتو مثل هيجي بلد

احنا اخوانكم الكورد دائما بالخدمه . جبنا اليهود يمنه بالاربيل حته يساعدونا. جبنا الايرانيين يمنه بالسليمانيه حتى يكعدون اعوج و يخططون عدل . طالما احنا موجودين و الكركوك بالايد مالنا احنا راح نستمر بالمساعده

الانتخابات مضمونه النتايج . عدنه خطه ام البطه اللي راح تكون ضمان مال النتايج مال الانتخابات.


ررر يا هوش " و القصد بيها هوشيار بالعربي بس الاخوه الاكراد دائما يعكسون الكلام" .. بالوزاره مال الخارجيه راح يجيب كومه من الاسوات اللي نريدوها و نكول هذي اسوات " الاصوات بالعربي الفصحى " مال العراقيين البره و نكول كلهم انتخبونا

وكما رفع ماما جلال الشعارات التاليه اللي جانت مزينه القاعه


ايد بايد لنترس و نبني جيبنا الجديد

ما عدنا مانع مع الامريكان ...كلنا نصير مثل الخرفان...بس الجيب يبقى مليان

من عمارالحكيم الى مسعود... العراق و كردستان كلها فرهود

لا تديرون بال اذا المواطن كال بزعنا و ملينا....دائما كلكم باوعوا بالجيب شكد خلينا

عبوه ناسفه او مفخخه بين الناس...تشيل عنا هوايه من وجع الراس

شنو حقل فكه شنو هالسخف.....ما عندنا اهتمام اللا باللغف

لا ماء و لا كهرباء و لا بانزين.......كلنا بشراءعقارات بالخارج مهتمين

نفط الجنوب لايران .... و خيرات الشمال للثيران


ادناه ننقل لكم لمحات سريعه من اللقاءات

ساعد في كتابه هذه الشعارات الدكتور احمد الجلب...ي

تخلل اللقاءات مشاده كلاميه بين المالكي و شاهبور الربيعي على خلفيه تصريح الربيعي بان المالكي لا ينوي ترشيح نفسه لولايه ثانيه. و اكد البعض انهم سمعوا الماكي يقول لشاهبور " ولك كلنا عبالنه انك باكستاني اثاري طلعت هندي ابن هندي " و صرح الربيعي تعقيبا عن هذه الانباء بان المالكي كان يتكلم مع المدير السابق لبنك البتراء عندما عين الجلبي كمدير للبنك و لم يكن هو المقصود

شاهد المجتمعون مسعود العربنجي و هو يستبدل اعلام الدوله العراقيه باعلام كردستان و على اثرها قام عمار اللئيم برفع العلم الايراني تماشيا مع تصرف مسعود

قام العامري قائد قوات بدر بتوزيع القيمه و الهريسه على المجتمعين كما اهداهم زناجيل و قامات و مسدسات كاتم صوت مكتوب عليها " ساخت ايران " و اعتذر عمار عن قبول هذه الهديه حيث سمعه الحاضرون و هو يقول ( و الله انترسنا من هاي الشغلات بعد ما عندي مكان اخزن بيه اي شي ) فاقترح عله العامري مصادره المزيد من بيوت النظام السابق لاستخدامها لاغراض متعدده

شوهد احد الحاضرين و هو يلمع احذيه ماما جلال و كاكا مسعود تبين فيما بعد انه جلال الصغير و الغايه هي الحصول على اي مقعد انتخابي مع الاكراد

احتج مثال الالوسي على عدم حضور اي ممثل عن اسرائيل في هذه الاجتماعات فاجابه ماما جلال بان المكان ملئ باليهود و اذا نظرت حولك جيدا ستراهم في كل مكان حتى في المرآه

سمع كاكا مسعود و هو يقول لماما جلال .....آني يريد الكركوك....قبل او بعد الانتخابات ما يهم ...و سمع جلال و هو يرد ..... لا تخاف الكركوك مال احنا طالمنا هؤلاءالبهائم سيتم انتخابهم مره ثانيه . و احتج صولاغ على وصفهم بالبهائم فرد عليه جلال.... ليش شكو بيهه البهائم مو همه الي جابوك بالحكومه و ديدفعون راتبك ؟

وصل ممثل جبهه التوافق عدنان الدليمي متاخرا و عزا ذلك الى خلل فني في بوصله السداره سبب له فقدان الاتجاهات

هذا و خرج جميع الحاضرين و هم متفائلون بالمستقبل كتفائلهم بالماضي ... ووعد ماما جلال كل الحاضرين ان يوزع على كل قرد منهم لبن اربيل بس يقبض الراتب ماله

ها نسيت شئ ......الكل اكتشفوا ان محافظهم قد سرقت ...و لما همًوا بتفتيش الجميع اكتشفوا ان الدكتور الجلبي قد اختفى..... و الله انت ذيب دكتور

2010-01-05

الارقام القياسيه العراقيه


بمناسبه انتهاء العام المنصرم و بحلول العام الجديد و لمناسبه افتتاح برج دبي العالي كلش نعلن عن الجوائز ادناه بعد فرز عدد مهول من اصوات المشاركين بالتصويت . مبروك لكل الفائزين و سيتم تقديم الجوائز رسميا من قبل الملله خامنئي و الملله اوباما في احتفال مهيب و اللذي سيعقد في قاعه الهتليًه و النصابين في المنطقه البنفسجيه و سيذهب ريع الحفل كتبرع لعلاج شارون النايم بالمستشفى " عجل الله فرجه" كولو آمين


اكبر حرامي : فاز بها العلامه الدكتور احمد الجلبي

اكثر حكومه مواليه للاحتلالين الامريكي و الايراني : فازت بها الحكومه الحاليه برئاسه المالكي

افصح رئيس جمهوريه:. فاز بها مام جلال...مبروك كاكا والله انته يستاهل


اكبر واحد عراقي يشعر انه ايراني اكثر من الايرانيين : تنافس عدد كبير على هذا اللقب ولكن فاز بهذه الجائزه مناصفه كل من جلال الصغير و عمار الحكيم

مخترع السنه : فاز فيها بجداره السيد باقر صولاغ عن ابتكاره استخدامات أخرى للدريل غير المتعارف عليها

اكبر مسؤول مطنش عن احتلال بئر الفكه " ناهيك عن احتلال العراق " فاز بها السيد نوري المالكي

اكبر برمكي من جيب غيره : فاز بها المأسوف على شيباته عبد العزيزالحكيم عن مطالبه العراق بمائه مليار دولار كتعويض لايران عن استمرار تعنت الخميني بمواصله الحرب

اكبر زنديق انفصالي : فاز بها عن جداره كاكا مسعود البرزاني ...مبروك كاكا مو بس مام جلال يفوز بجوائز

اكبر كذاب : فاز بها فلته العلم النووي حسين الشهرستاني " ما اعرف بيا محافظه تقع شهرستان هذه " عن كذبته بان حقل الفكه العراقي هو من الحقول المشتركه . و اسم الحقل يدل على ايرانيته بس العراقيين اخذوا بالغلط

اكبر مطفُي و مسوي نفسه يفتهم: فاز بها بدون منازع الدكتور الفيلسوف موفق الربيعي

اكثر سياسي يغير وجهه " ابو الف وجه و وجه" : فاز بها رئيس جبهه النفاق أياد علاوي


القائمه من فلتات هذا الوقت كبيره و لكن لمحدوديه الامكانات الماديًه فقد اكتفت اللجنه بما جاء اعلاه

لجنه جائزه بابا نؤيل للسلام و التقدم


عنهم : الجنرال باتريوس قلب الاسد ...قائد قوات القطط الضاحكه للسلام و بس

شمسوي الرجال

و الله سباع زلم الحكومه مالنه.آني كلت الربع ما راح يسكتون على الضيم . أبو اسراء اخيرا أحتج و صرح و انتقد المؤسسه الدينيه السعوديه لانتقادها و تهجمها على آ يه الله العظمى السيد السيستاني ادام الله الفئ ماله

يعني الرجل السيستاني "عظم الله طابوق بيته" كاعد بحاله و تجيه البلاوي . يعني هم فوك ما الرجل ساكت على تصرفات الحكومه و اللي ديسووه بالناس وساكت على قتل و اغتيال كفاءات العراق من قوات الغدر و كل هذا حتى لا يكولون ان الرجل " ادام الله شجره النبق مال بيته " ديسوي مشاكل و يخلط الدين بالسياسه

و الرجل ديستثمر كل اموال الخمس و الثلث في أيران و يبني كل المؤسسات و المستشفيات في ايران باموال الخمس العراقيه حتى لا احد يقول انه يبني مستشفيات في العراق لعلاج الارهابيين المصابين او مؤسسات دينيه لتخريج الارهابيين او ما شابه . شفتوا الحكمه من استثمار هذه الاموال في ايران و هم الرجل ما خلص من الحجي . صدك لو كال المثل ... تجيك التهايم و انت نايم

و الرجل لم يفتي بجواز قتال الاميركان و ذلك حفاظا على ارواح العراقيين و لم يخطب خطبه واحده يحرض فيها على هذا القتال باعتبار ان الدين الاسلامي دين محبه و تآخي و الاميركان هم بشر مثلنا فلماذا هذه الحساسيه تجاه الامريكان طالما ان قصدهم شريف

و لم يصدر سماحته " حفظ الله الشارع اللي يم شارعهم من كل سؤ " اي بيان عن احتلال أيران لبئر الفكه حتى لا يقال انه يحرض على قتال غير متكافئ تكون الغلبه فيه لابناء جلدته . و من سيكون الخاسر الاول غير العراقيين المساكين اذا نشبت هكذا حرب

الرجل لا يستحق منكم كل هذا التجريح يا آل سعود فما ذنبه اذا الحوثيون يحبونه اكثر من حب الاميركان لالفس برسلي

روح افًالك ابو أسراء و نحن من ورائك. و نحن معك عندما سالك احدنا " متى سنحرر الفكه " فاجبت ان تحرير مكه وشيك و يجب ان يتم اليوم قبل غد

ابوأسراء انته و بس باللعب

2010-01-04

مكالمات مع صديقي شناوه

خابرت شناوه " صديقي في بلاد المهجر" لاهنأه بالعام الجديد فسألني أن كانت لي رغبه في الهجره من العراق الى اي من البلدان الاجنبيه خاصه و أن الاوضاع في العراق تسير من سئ الى أسوأ و اخذ يغريني بقوله "ولك هنا الجو بارد و ماكو لا ذاك الحر و لا ذاك البك " البعوض" وفوك كل هذا الحريه و الديمقراطيه دتخر خر من اذان الناس هنا.... و البنات...آه من اجمل ما تتخيل" آني من جاب طاري البنات تكهربت بس شكول و شحجي

قلت له " شناوه انا احب العراق و لا أقول لك ألا كما قال الشاعر.... بلادي وان جارت علي عزيزه....و قومي وان شح علي كرام "

قال لي شناوه " بمناسبه الكرام مال الشاعر مال جنابك أحب ان اعلمك بان هذه آخر مره اسمح لك أن تتصل بي على (الكولكتف) و تكلهم شناوه يدفع ثمن المكالمه...مو ذبحتني
...................................................................

المكالمه اللي جرت قبل الاخيره مع شناوه " وبأعتبار أن شناوه كان يدفع ثمن المكالمه كنت أسأله عن كل العراقيين في بلاد المهجر حتى الناس اللي ما يعرفهم" فسألته عن صديقنا المهندس محمد الذي سافر الى نفس البلد الذي يعيش فيه شناوه فقد سمعت ان محمد قد اثبت نفسه كمهندس قديرو تدرج الى مناصب عليا حتى وصل الى مدير فرع لشركه انشاءات كبيره فقال لي شناوه

محمد أحواله هالايام مو كلش تمام و صاير كلش عصبي

فقلت له... شناوه ميت مره كتلك لا تزور محمد بكثره و الآن هذي النتيجه الزلمه راح يجيله أنهيار عصبي

فقال لي ... ولك لازم كثره شوفه اعضاء البرلمان و الحكومه بالتلفزيون سوت شي بعقلك ...ولك السبب غير شي

فقلت له مستغربا .... آسف شناوه بس مدا اكدر افكر بسبب غيرك انت اللي ممكن ان يسبب لمحمد انهيار عصبي

فقال لي ... لا مو هذا السبب....السبب انه محمد بدأ يقدم على وظيفه باحد دول الخليج باعتبار ان اطفاله كبروا و راد ينقلهم لبلد عربي

فقلت له .... خوش حجي و آني هوايه سمعت انه أكو خوش شغل في هذي البلدان... زين شنو المشكله

فاكمل شناوه ... المشكله انه عندما بدأ يقدم على وظيفه قالوا له انهم لا يستطيعون اعطاءه منصب كاللذي هو فيه و ان عليه ان يقبل بمنصب ادنى حتى يتاقلم مع متطلبات و معايير الشغل هناك ثم يتدرج لمناصب اعلى

فقلت له... بس الزلمه فطحل بشغله بعد شيريدون

فاردف شناوه ....المهم الزلمه آمن بالامر الواقع على اساس الكلام الذي قيل له و قال في نفسه انه سيثبت نفسه من اول سنه و بعدها سيكون لكل حادث حديث

فسألته ... اذن هو قبل بالوظيفه المعروضه عليه

فقال ... أي قبل بيهه بس المشكله هي ما بعد ذلك

فقلت له متسائلا... ما المشكله

فقال شناوه

عندما ذهب ليلتحق بالوظيفه أكتشف ان مدير القسم الذي يشتغل فيه هو أحد المهندسين الاجانب

فتسألت قائلا ... شنو المشكله بها الشي ...بس لا طلع المهندس الاجنبي يشبهك و سبب هذا الشبه لمحمد مشاكل نفسيه

فقال شناوه ... و لو أعرف انه آني اخبل و احلى من اي اجنبي بس مو هذا السبب

"لعد شنو السبب؟ "

السبب انو هذا المهندس طلع جان يشتغل جوه ايد محمد كمهندس متدرب و محمد كان المدير ماله ...و فوكاهه أكتشف محمد انو راتب المهندس الاجنبي ضعف راتبه

فقلت له ... آني اعرف انه بعض الناس عدهم عقده الاجنبي و يعتبروهم ما كو منهم.. بالضبط مثل حكومتنا اللي الامريكان نازلين بينه دك والحكومه فوك كل هذا تبوس خلفيات الامريكان بمناسبه أو بدون مناسبه


فقال شناوه ... محمد صاحبنا راح للناس اللي شغلوه وسألهم عن القضيه و كل عقله انو جان أكو لبس بالموضوع... المدراء ماله كالوله ان السبب هو انه اسمه محمد و لون بشرته اسمر و محل الولاده بغداد و الاخ الاجنبي اسمه جون و شعره اصفر و بشرته بيضاء و مولود في هيوستن ولهذا هناك ذاك الفرق بالراتب و المنصب حتى وان كان يحمل نفس جنسيه جون ....محمد اتخبل من سمع بهالشي و شال غراضه ورجع

فقلت له ... و الله حقه يزعل....هسه الاسم ممكن يتغير و نبدل اسم محمد بغاري او بول او حتى بوش... بس الجلد شلون ؟....لو مايكل جاكسون ما مات جان سألناه عند يا دكتور بدل لون جلده

هنا انقطع الخط و لا أدري هل ان شناوه زعل مني من جبت طاري تغيير الجلد لو المكالمه كلفته هوايه و روحه طفرت...ملحكت اساله

2010-01-03

هاي الزلم الخشنه

الى جاري العزيز " الحايط على الحايط " ابو فاضل اللي قاري تاريخ العالم كله. قل لي يا جاري هل قرأت في التاريخ عن ذله لاحد اجهزه الدوله العراقيه على يد محتل كالذله التي تشاهدهها في هذا الشريط
قره عين الحكومه العراقيه على هالسياده

طفل عراقي غيور

هذه الصوره اخذتها من مدونه جندي أمريكي " أضغط على الصوره لتكبيرها " .الصوره أخذت بواسطه كاميرا الجندي الامريكي من داخل المدرعه الامريكيه . في الصوره تشاهد طفل عراقي و هو يرسم علامه المسدس بيده و يوجهه صوب المدرعه
طفل يملك الاحساس و لايملك السلاح و لكنه على الاقل عبر بشجاعه عن ما في داخله . حكومتنا الموقره تخشى حتى الاحتجاج على قرار تبرئه قتله الشعب العراقي من بلاك ووتر اوالمطالبه بتسليمهم . بئر الفكه هو الاخر يشهد على جبن و عماله حكومتنا الموقره
يا ليتكم كنتم أطفالا شجعان و لم تكونوا أشباه رجال خانعين
قليل من الاحساس يا فاقديه