2013-01-02

حكاية بابا نؤيل العراقي

بابا نؤيل ..ليش ما أجيت

مو كل أطفالنا بالعراق أنتظروك

أبني الصغير أجاني مقهور

 قال لي بابا آني كلش زعلت و بكيت
ليش يا بابا  نؤيل ما أجيت
أجاني المسكين بابا نؤيل
كال ...أعتذرلي من أطفالكم
حاولت أجي بس ما كدرت
و بالهم و الحسرة صفيت
بابا نؤيل شنو المشكلة
خوما كام الفيت بمب مال عربانتك
لو حتى تاكسي يجيبك للعراق ما لكيت
كال لا و الله..مو هاي المشكلة
المشكلة بالوضع المخربط مالكم
سيطرة تكلي أنطينا نص الألعاب حتى نخليك تفوت
و المليشيات يكولولي سني أنت لو شيعي
جاوب حتى تموت
و شوارعكم كلها طسًات و حفر و غركانة
و يمكن بألف حفرة ماء مطر مليانة

 طسًيت و غطًيت
و واحد يقول لي أنت ليش مسوي لحية
أنت من القاعدة لو سعودي
و اللخ يكوللي أنت ليش لابس أحمر
أكيد أنت كافر و شيوعي
و الثالث يسألني ليش شايل كيس مليان
أكيد حاط بيه مفخخة يا عدو أمام الزمان
و الله من كل هذا و ذاك تعبت و ملًيت
شلون أخلًي الأطفال يفرحون و آني نفسي صرت كئيب
و الوضع المخربط اللي عندكم فد شئ تعيس و رهيب
و كيسي اللي أتفرهد من السيطرات
و ما بقى فيه أي شئ للأولاد
حطني بموقف ما أنساه للممات
و تسألني ليش ما أجيت يا لبيب
المرة القادمة راح أستبدل لعب الأطفال
بفلاتر لتصفية المياه الغير نظيفة
أو أجهزة كشف الأشعاعات المميتة
أو غيرها من الأشياء المفيدة
أحسن من لعب أطفال بريئة
و أنتوا يا عراقيين
مو ترة آني من شفت حالكم
من قهري متت و طكيت
ترة كل واحد منكم يكدر يصير بابا نؤيل
روحوا و شيلوا الظلم من على رؤسكم
و حطًوا أيديكم بأيد بعضكم
و أنسوا غير أنكم تنتمون لعراقكم
و أخلقوا مستقبل أفضل لأجيالكم
حتى تشوفون ألف بابا نؤيل
كل يوم يزوركم
و ألا فأعذرني و لا تسألني
ليش بابا نؤيل ما أجيت