2010-07-01

خبر عاجل


الدنيا حر...الوقت الرابعه بعد العصر...يا الهي...الحر و التراب و الكهرباء و حكومه الجت الاخضر اجتمعوا علينا وحولوا حياتنا الى جحيم...اللهم طولك يا روح و قصر عمر هاي الحكومه...قرفنا من كل هالوضع...طلعت الى باب الدار لرش الطرمه و رؤيه بعض الجيران عسى ذلك ان يسلًيني و لكن...لا ماء لرش الطارمه و لا أحد من الجيران لاتكلم معه...يلله اوكف بالباب و اغني ويه نفسي بلكت واحد يمر و يكتشف موهبتي في الغناء و يشغلني رادود أو وكيل للسيستاني...هناك و شفت رسميه الخبازه تركض...يا ستار شنو القضيه...عيني خاله رسميه شنو القصه...كالتلي هيه و تركض و عبايتهه اللي ترفرف وراهه مطلعتهه تشبه الرجل الوطواط ...عيني و ابني لبيب...ما عندي وكت اشرحلك...آني مستعجله...و شاهدتها و هي تركض مبتعده و عجاجه الغبار وراهه واصله للضالين...خير يا رب... بس لا السيستاني راح فطيس

وره شويه شفت نشميه الدلاله منطلقه كالصاروخ ...يارب سترك....خالتي نشميه....صحت عليها باعلى صوتي....شنهي السالفه...خوما الشارع اللي يمنه عندهم كهرباء و رايحه تشوفين شنو الكهرباء....جاوبتني و هي تمر من امامي...خايب جا انته ما تعرف...ابقى على هالحال و راح نشوف شلون راح يصير براسك خير...ايضا كانت عجاجه الغبار تلاحقها و كانها اعصار كاترينا

قلت في نفسي....يا رب سترك...بحياتي لم اكن اتصور ان خالتي رسميه و خالتي نشميه يكدرون يركضون بهذه السرعه...ولا الشارع مالنه مغطى بهذه الطبقه السميكه من التراب

دقائق و رأيت عمي ابو عدنان يحاول يمشي باسرع ما يمكنه و لكنه بالكاد يستطيع جر نفسه....اول مرًه اشوف عمي ابو عدنان كاشخ و لابس دشداشه فسفوريه و شايل علم العراق.....ناديته و تفكيري مضطرب....عموابو عدنان...الطبيب نصحك بالراحه بعد السكته القلبيه التي المًت بك...وين رايح بهالحر...شنو انته و خالتي رسميه و نشميه عدكم سباق لو شنو

عمي ابو عدنان باوع عليه و كال....انته وين عايش ابني لبيب...بس هم ميخالف...ابقى غشيم احسن لك.....و اخذ يبتعد عني من غير عجاجه و لكن المسكين كان يسعل بفعل عجاجه خالتي نشميه و رسميه التي لا زالت تتصاعد


آني الحقيقه الجريدي كام يلعب بعبًي ...شنو القضيه...شنوالحكومه دتوزع شئ ببلاش و آني ما ادري....لا ما أعتقد...هاي الحكومه ما من وراهه فايده و لا خير....زين شنو مقتدى الصدر خلص دراسته و أخذ شهاده الابتدائيه و جيش الطرشي كام يوزع هريسه و قيمه بهاي المناسبه...كلشي يمكن...زين احتمال اكو عبوه ناسفه بمنطقتنا و آني ما أدري...لا ما اعتقد لانه كان زعاطيط المنطقه كلهم تجمعوا حولها من الفضول ...شنو القضيه يمعودين

آخر شئ شفت البعثي السابق الرفيق جثير لابس عمامه و طالع يشبه ابو لهب بفلم الرساله و لازم سبحه ديسبًح بيهه و هوه ديركض...صحت باعلى صوتي...رفيق جثير...وين رايح يمعوًد...باوع عليه بعصبيه و قال...شنو رفيق جثير...بابا آني الملله جثير....روح سويلك نظارات حتى تشوف زين

فاجبته ..عيني ملله جثير...آيه الله جثير....حجه الله جثير...اصيحك مثل ما انته تريد...بس كوللي....شنو القضيه...اشو الناس كلهه دتركض اليوم عبالك ديركض وراهم دب...شنو السالفه

فاجابني....شوف لبيب...و لو انته مطفي و متستاهل اضيع وقتي الثمين وياك بس ما يخالف..راح اكللك...بلكت فد يوم يصير براسك خير من تعرف شديصير بالعالم....اليوم أعلن مرجع شيعي استعداده لتولي منصب رئاسة الوزراء. وقال المرجع الشيخ قاسم الطائي في تصريح نقلته وكالة «نينا» إن السبب وراء تصديه للمنصب هو «تخليص البلد من المشكلات التي دارت حول هذا المنصب وولدّت تداعيات ومشكلات بين الكتل السياسية، كانت نتيجتها تعليق مصالح الشعب العراقي»....الرفيق جثير قال لي هذه العبارات و كانه يقرأ قصيده في رفعه العلم

اجبته....والله هذا خبر جديد....شنو هالتضحيه من قبل هذا المرجع....شنو هالايثار و انكار الذات...هنا اختلط غبار عجاجه غبار خالتي رسميه و نشميه بدموع عيني....يا رب شنو هالتراب اللي مغطي شارعنا...الى الان و الغبار لايزال يتطاير

الرفيق جثير...عفوا الملله جثير اردف قائلا و بنفس النبره الخطابيه و اللغه الفصحى .... الى ذلك، دعا عضو «التحالف الوطني» عن «الائتلاف الوطني» محمد مهدي البياتي، الطائي الى «تقديم ترشيحه عبر التحالف الوطني إذا كان واثقاً من معرفته بالسياسة وقدرته على إدارة الدولة فضلاً عن قبول باقي الكتل به».ولفت الى أن «الدستور لا يشترط في المرشح لرئاسة الوزراء أن يكون عضواً في البرلمان

رفيق جثير ....شنو هاي ملكه الخطابه في كلامك هذا اليوم...يمعوًد قطعت قلبي....زين شنو علاقه هذا الخبر بركضه طويريج اللي انته و ابو عدنان و ريا و سكينه تمارسوها هذا اليوم

قال لي...احنا كلنا لازم نضحي في سبيل الوطن...و ما دام شعيط و معيط يكدر يصير رئيس وزراء فاحنا كلنا رايحين نتسابق لخدمه الوطن و نرشح نفسنا لرئاسه الوزراء....بلكت الله يوفقنا و يبتلينا بهذا المنصب و نناضل من خلاله و نفني وقتنا لخدمه هذا الوطن....الله اكبر و عاش عصير حجي زباله

مضى الرفيق جثير في حال سبيله و دشداشته تكنس تراب الشارع...انا في الحال ركضت باتجاه التلفون...تلك التكنولوجبا الوحيده التي لا زالت تشتغل " في معظم الاحيان " و اتصلت بصديقي زاهرفي قطاع 56 و ما ان رد على اتصالي حتى بادرته بالسؤال...زاهر انته تحب تسوي خير للناس...اجابني و كله ثقه...اكيد لبيب...لعد شعبالك...مو هذاك اليوم استلفت مني خمسين دولار اخضر...هذا مو خير آنه سويته و ذبيته بالشط ؟....فقلت له....زين صادق العربنجي بعده براس شارعكم ينام على العربانه ماله....اجابني ...اكيد بعده...هوه قبل اسبوع اجانه يرجف و حالته حاله بسبب عبوه طكت شويه قريب عنه و الحمار ماله راحلك فدوه بس هوه الحمد لله بخير

فقلت له....ينوبك به ثواب....روح كلله انه اليوم اعلنوا انه وظيفه رئيس العربنجيه الي كان خال عينه عليها صارت متاحه ...و يا يلحك يا ما يلحك....بس دير بالك....قبل ما يركض رش الشارع بالماء...تره العجاجه راح توصل للضالين