نحباني للو - قراءة معاصرة لملحمة حجي راضي

حجي راضي : أتتي مشناف

حجية أم غانم : يعني شنو حجي

عبوسي : يعني أنني مشتاق...حجية أبنك ضعيف بالنقاط

حجية أم غانم : مشتاق لشنو حجي فدوة لعمرك

حجي راضي : و آني شمدريني حجية ...يمكن مشتاق لطيبة الناس..مشتاق للأمان ..مشتاق للأخوة و النخوة...مشتاق للبراءة و الصدق..مشتاق لأستكان شاي بعد الضهر..مشتاق يتمشى بالكرادة و العرصات و اليرموك و 14 رمضان بعد العصر...مشتاق لكعدة الحديقة مع الأهل و ولد الطرف بعد المغرب ...مشتاق لولد الجيران ..مشتاق لسمك مسكوف بأبو نواس و دولمة حارة من يد أمه الحنون و كل العائلة كاعدة حول الصينية ..مشتاق يروح لأي مكان بدون سؤال و جواب من السيطرات و أنت منين و شنو مذهبك ..مشتاق لنومة السطح على الهوا الطيب مال حزيران...مشتاق يمشي وراسة مرفوع أنه عراقي أبن عز و كرامة و سليل أقدم حضارة على الأرض ...مشتاق و مشتاق حجية لأن أيام زمان كانت أحلى أيام يشتاقلها كل واحد مثلي و مثلك و مثل أبنك

حجية أم غانم : يمًة سوده بوجهي...ليش هيجي الي دا يصير بينا

الرجل اللي دا يزين عند حجي راضي : حجية أبنك شكد صارلة بالعراق

حجية أم غانم : سافر و رجع لبغداد و صار له  هناك 10 سنين هو و زوجته

الرجل الي دا يزين عند حجي راضي: حجية هذا أبنك أكيد نسى كل عز أيام زمان و مشتاق لكل لحظه منها

حجي راضي : أبني عبوسي دروح جيب هذا المسهل من الصيدلية حتى نشربه و ننسى هالقهر

  



سوالف المفتش هوبي - المكالمة الرابعة - اقصر مكالمة

المكالمة الثالثة هنا 
الو شلونك مفتش جاك

هلو..هل هذا مفتش روبي

اي جاك الصخونة...مفتش هوبي

اهلا مفتش..كيف حالك

الهمد لله مفتش جاك...أريد اسألك على اللي راح يسويه العبادي

و ماالذي سيفعله خراعة الخضرة هذا

ما أدري جاك...هو هدد تركيا أذا لم تنسحب من العراق

هوبي

نعم جاك

قل للعبادي خلي يروح يسولفها على الدبة

الله لا ينطيك عبادي...صار 3- 1 لصالح جاك الواوي

حتى ايام زمان كانوا محترمينا

قصة تمثال الحرية الشهير في نيويورك

، أعزائي المشاهدين...أن فكرة تشييد التمثال تعود لفلاحة مصرية رأى نحات فرنسي فيها شابة تحررت من قيود الاستبداد

فكرة المشروع التي قام بتصميمها النحات الفرنسي فريديريك أوغست بارتولدي، كان يخطط من ورائها لأن ينصب التمثال الذي يبلغ طوله من قاعدته 26 متراً، في مدخل قناة السويس في مدينة بور سعيد، حيث عرض المشروع حينها على حاكم مصر حينها الخديوي إسماعيل باشا، والذي رفض المشروع الذي سماه بارتولدي "مصر تجلب النور لآسيا" بحجة تكاليفه المادية المرتفعة.

وعلى أثر رفض الخديوي للأمر، غيّر النحات الفرنسي فكرته، وتحوّل إلى تصميم تمثال الحرية، أحد أبرز معالم الولايات المتحدة الأميركية اليوم، حيث تم إهداؤه باسم الشعب الفرنسي للولايات المتحدة في 28 أكتوبر/ تشرين الأول عام 1886 كهدية تذكارية، بمناسبة الذكرى المئوية للثورة الأميركية.

ويزن التمثال 125 طناً، يعكس شابة تحررت من قيود الاستبداد، وامتشقت بيمناها مشعلا يرمز للحرية، وفي يسراها حملت كتابا نقش عليه تاريخ 4 يوليو/ تموز 1776 للتذكير بيوم إعلان الاستقلال الأميركي. أما رأسها، فكلّله صانع التماثيل بارتولدي بتاج برزت منه 7 أسنّة يقال إنها ترمز للبحار أو القارات.

العبرة من القصة أعلاه ليس لمعرفة تاريخ نصب الحرية أبدا...العبرة من السرد أعلاه هو هالملاعين الفرنسيين لم ينصبوا التمثال لأن خديوي مصر رفض الفكره لأرتفاع تكاليفها و لكن الفرنسيين راحوا و أهدوا التمثال للأمريكيين بدون مقابل...ليش هيجي...قابل راس أبو الخديوي أكرع

أما أحنا بالعراق فعندنا نصب تسوى أبو نصب الحرية

كاراتيه خلف

المسكين خلف وين ما يروح يتبهذل.بالسيطرات يتفتش و يتبهذل و بس يفتح حلكه بكلمه يشبع بسط . سيطرات الميليشيات تشبعه رزايل و بسط خاصه من تعرف انه من جماعة ذيج الصفحة. و يراجع دوائر الدولة لازم يلزم سره و من يشوف واحد عنده واسطه يجي و يضرب السرة بدون أي مشكله يبدي يسب و يشتم . و كنتيجه لتصرفه هذا ياكل بسطه من الموظفين و الفراش و ينطرد . 
خلف طلعت روحه و ضاقت به فسحة العيش و قرر انه لازم يسوي شيء

طبعا ما أقتنع بفكرة الهجرة و اللجوء و الكلام الفارغ هذا . يعني قابل الواحد يهرب من رزاله حتى يروح يشبع رزايل هذا أذا أستطاع العبور الى ذيج الصفحة .

فكر خلف مع نفسه و تسائل عن الحل. و مع أول فلم هندي شاف بيه البطل نازل دك و ضرب بالعصابة قرر خلف أن يفعل الشئ نفسه .يروح و يتعلم كاراتيه و بعدها يطيح حظ أكبر واحد يحجي وياه

راح خلف يسأل عن أكبر معلم كاراتيه . شاف أكو واحد يكسر الخشب برجليه فانبهر. راح و شاف واحد يكسر الخشب براسه فأندهش. سأل و دلوه ولد الحلال على واحد يكسر الخشب بيد واحده فوقف شعر رأسه. و اخيرا عثر على واحد يدك مسمار في خشبه بسمك 4 سنتيمتر بأستعمال أصبعه الصغير و حاط فلم على اليوتيوب يعرض فيه مواهبه
فقال هذا هو المراد

توسل خلف بمعلم الكاراتيه الأخير بأن يدربه على الكاراتيه و كيف يصبح قادرا على دق مسمار كبير بخشبة كبيرة بواسطه أصبعه الصغير فقط مقابل أي شئ يطلبه المعلم . في لبداية رفض المعلم و لكن بعد أن عرض عليه خلف حجل الذهب مال أمه و بعض المصوغات المتفرقة وافق مدرب الكاراتيه على طلب خلف

يلله معلمي أبدأ التدريب و ليحيا اليوتيوب اللي دلاني عليك ...قال خلف . لا تتعجل يا بني فالتدريب سيستغرق سنوات من الصبر و التدريب قال المعلم لخلف .... يعني ما كافي سنوات البهذله هالنوب سنوات الصبر و التدريب. يلله ميخالف بس أصير بطل كل هالهم يتنسى .

أبني حتى تتعلم الصبر و المطاولة تبدأ أولا ببرنامج التنظيف . تروح وتنظف البيت مالتي كل يوم خمس مرات من السطح الى الطارمه. و هكذا قضى خلف 4 سنين ينظف البيت من السطح الى الطرمة و من الدنكة للدكنة حتى أنكسر ظهر اللي خلفوه . من الصبح الى الليل شطف سطح و طرامي  غسل مواعين و تنظيف زوالي و غسل هدوم و ما الى خلافه الى أن صار جلد يد خلف أقوى من ورق الصنفرة .فاليحيا اليوتيوب اللي دلاني عليك قال خلف مع نفسه و هو فرحان

الله يخليك معلمي ما كافي بهذلة مو صار لي سنين على هالحال..توسل خلف بمعلمه. المعلم أجابه بنبرة حاسمة " أبني تعلم الصبر و المطاولة "  بعدها أنتهى المقام بخلف بتنظيف مزرعة معلمه و العمل بالحقل و القيام بكافة الأعمال الشاقة من تنظيف زرائب الحيوانات الى تقليم أظافر الأحصنة و البقر. و بعد مرور سبع سنين عجاف صار جسم خلف كجسم رافعي الأثقال و لو المسكين خسر الكثير من وزنه و بدأ الشيب يغزو شعر رأسه

مو كافي صبر معلمي...مو طلعت روحي ...قالها خلف و صبره يكاد ينفذ. نظر اليه معلمه ثم قال...ميخالف أبني ..راح أعجل فرجك و أعلمك شلون تدق مسمار كبير بخشبة كبيرة بأصبعك الصغير فقط

يحيا اليوتيوب اللي دلاني عليك معلمي...دخيلك علمني كيف السبيل الى دق مسمار كبير بخشبة كبيرة بأستعمال أصبعي الصغير فقط

أجابه معلمه و الفخر يملأه بما حققه تلميذه لحد الآن ...أبني هاي كلش سهلة...تروح و تشتري خشب من محل أبو علوان اللي براس الشارع...الخشب عنده مسوس و لو تنفخ عليه يطير..و مو بس تقدر تدق مسمار كبير بخشبة كبيرة بأستعمال أصبعك الصغير فقط و لكنك تستطيع أن تقوم بهذه العملية حتى بأستعمال لسانك فقط...فالخشب مسوس من الخارج و الداخل 

لابو حتى اليوتيوب و ذاك اليوم الأسود و الحزام الأسود 

ملاحظة : و مع كل هذا راح خلف لدكان أبو علوان لكاه معزل و شايل الى مكان آخر و لا أحد يعرف وين نقل أبو علوان محله

سوالف المفتش هوبي - المكالمة الثالثة

المكالمة الثانية هنا

الو تفضل...هنا المفتش جاك من المباحث الفيدرالية الأمريكية

لك هلو جاك شلونك..مشتاقين

هل هازا المفتش هوبي

نعم يا جاك...ربي أجعلها بشرى خير لأنك أول مرًة تلفظ أسمي صح

تفضل مفتش هوبي ..هل بالأمكان مساعدتك

شوف جاك الموت...هذا أحمد الجلبي مات

آسف لسماع هذا الخبر المؤسف أن كلبك أحمد مات...أذهب و أقتني كلبا جديدا

لك يا كلبي يا حبيبي جاك...و لك هو أسمه أحمد الجلبي و هو نائب بالبرلمان و يقول بعضهم أنه قد جرى تسميمه و ما مات موته طبيعية..تعرف شيء عن الموضوع

لا و بحق السماء مستر هوبي...ليس لدي علم أن أمريكا قد أغتالته لأنه و على حد علمي أمريكا لا تهتم لمثل هذا العميل الذي أنتهى دوره منذ زمن

يعني شنو...مو هو اللي جاب أمريكا للعراق

مفتش روبي...أنت على نياتك...أنت شلون مفتش ...أمريكا أرادت أحد أن يفعل لها ما تريد و ليس العكس

زين سؤال يا جاك الصخونة ...هذا المالكي ليش كان يضحك بالجنازة

لحظه هوبي خلًي أشوف بالكومبيوتر مالي...همممم...كان يقول راح جلب و الحصًة مالتنا كبرت

قصدك كان يقول راح الجلبي

لاء مفتش روبي...قال راح جلب بمعنى الكلب الحيوان

و الله يا جاك الموت الكلب أطهر من هؤلاء كلهم...لا وراحوا دفنوه في الحضرة الكاظمية

شوف مفتش روبي...لو أنا مكانهم لأوصيت بدفني خارج العراق لأنه سيأتي يوما و ينبش العراقيون قبور هؤلاء

لاء جاك...أحنا أبدا ما نتعرض لميت...أخلاقنا و ديننا لا يسمحان لنا بذلك

مفتش هوبي

نعم جاك

هاي روح سولفها على الدبة

لا يا ملعون جاك...غلبني و صار المجموع 2- 1



سوالف المفتش هوبي - المكالمة الثانية

المكالمة الأولى هنا 

الو

نعم تفضل

هازا مفتش روبي

هذا لازم جاك الموت يا اللي ما تعرف تلفظ اسهم هوبي

نعم هنا مفتش جاك

لازم هم جايني بشغلة نص ردن مثل شغلتك الأولى
لا مستر بوبي آني ما أبيع تي شيرتات
و منو جاب طاري التي شيرت بالنص
أنت مو قلت نص ردن..غير تعني قميص أو تي شيرت
جاك ..أنت شكلك دا ينصب على هوبي
لا مستر هوبي...آني مو نصًاب..آني أنسان محترم
على كل مستر جاك الطنطل..شنهي شغلتك

مستر بوبي..هيه نفس الشغلة...آني رحت سألت عن مسز دبة بس لا أحد  يعرف من هي

جاك...هاي مسز دبة لازم راحت يم سليمة الكبور

و من هاي سليمة الكبور مستر روبي

ولك هوبي مو روبي يا طركاعة سودة...سليمة الكبور هاي واحدة تشبه عالية نصيف أو حنان الفتلاوي 

مستر هوبي..انت ليش ما يقول لي الحقيقة و آحنا يخلص
شوف يا جاك الطركاعة آني راح أقول لك الحقيقة..الوحيد اللي يعرف كل شئ بهالعراق و اللي ديصير بيه و عنده الدواء الشافي و يعرف منو جاب داعش و يقاتلهم و ينتصر عليهم هو واحد فقط لا غير
منو هذا مستر بوبي رحمة على والديك
بس هذا سر مستر جاك يا اللي جيت و جبت المصايب وياك
اقسم لك أني لن أبوح لأحد بهذا السر
أنه السيستاني مستر جاك..السيستاني عظيم الحوزة و كبير الآلهه
هل تقصد السيستاني اللي كاعد بالنجف مستر هوبي
نعم هو لا غيره مستر جاك
مستر هوبي
نعم مستر جاك
هاي روح سولفها على الدبة مستر هوبي
لا يا ملعون جاك ...تعلمت سوالف العراقيين بسرعة

علامات التقدم في العمر

كنت اليوم أقرأ الأخبار في الشبكة العنكبوتية و الذبابية و أذا بي أقرأ عنوان خبر جذب أنتباهي و عنوان الخبر هو 

"  وقفت نملة أمام حانة فأغتصبوها " 

صحت من عجبي " يا للهول " كيف يتم أغتصاب نملة و من الذي أغتصبها...صرصار أم بريعصي أم ماذا

قربت عياني و عليهما نظاراتي من شاشة الكومبيوتر لأقرأ بقية الخبر و أذا بالعنوان " وقفت ثملة أمام حانة فأغتصبوها " ...يا للهول

 حان الوقت لأستبدال نظاراتي بواحدة أقوى

كبرنا و شيبنا...يا للهول 

سوالف المفتش هوبي - المكالمة الأولى

الو

الو نعم تفضل

هل هازا المفتش روبي

لا أبوية هنا المفتش هوبي

أعذرني أيها المفتش..أنا جاك من المباحث الفيدرالية الأمريكية

 أنت ما أجيت لآني...أنت شوكت جاك ليمي

لاء عفوا أقصد أسمي جاك و أحنا نريدك في شغلانه تساعدنا بها و ننطيك أنت الأجر مالتها

لك هلو داد صار لي قرن ما جايتني شغلة..أؤمر عيوني

و أنت البابا مالك شنو دخله

أرجوك لا تجيب طاري أبوي حجي صغير بالنص

أنت قلت " ولك داد " ...فآني عبالي أنت يصيح الداد مالك

 هاااااا...لا أبويه هذا مصطلح من لغتنا العامية..هاي معناتها سحقا للجحيم هههه

المهم سيد مفتش روبي أحنا نريدك بالشغلة...أنت يقبل يساعدنا

ما دام بيها فلوس فليش لاء..و مرة ثانية أقول لك آني أسمي هوبي مو روبي

شوفي مفتش هوبي...أحنا دايخين بمسألة داعش و نريد الجهود مال أنت حتى يكشف شنو هاي داعش

أبوية جاك من أجاك قزلقرط أن شاء الله..منو قال لك آني أشتغل على القصص
الخيالية و أفلام الخيال العلمي
يعني شنو مستر بوبي
بوبي بعينك..شنو مشبهني بعلج بوبي ...أسمي هوبي يا جاك الموت أن شاء الله...هاي شغلة الأمريكان اللي همه مسووين داعش و هسه يريدون يعرفون منو داعش روح سولفها على الدبة
و من هذا الدبة مستر هوبي..هل هو مسئول في حكومة عراقية
لاء...هاي الناطقة بأسم أوباما يا بعد روح هوبي..مع السلامة
التفت جاك الى مساعدته الواقفة بجانبه و سألها " ممكن ترتيب لقاء مع الناطقة بأسم أوباما السيدة دبة لأمر هام " ..ثم تمتم مع نفسه قائلا ..و هل الرئيس أوباما لديه ناطقة بأسمه ..و لماذا أسمها غريب الى هذا الحد فأني لم أسمع بحياتي موظفة في البيت الأبيض أسمها دبة..فعلا كما يقول العراقيون..عجيب أمور غريب قضية

بطيخ ما بعد الظهيرة

حجي شلون بطيخ بروح أبوك

و الله حجي كاطع عاشت إيدك..ريحته  تشمها من يم بيت حجي أبو ساهي

هاك أخذلك شيف اللاخ حجي ثجيل

رحمة على والديك حجي كاطع

تدري حجي ثجيل من البلد يحكمونه مجموعة  زعاطيط  يصير مثل روضة أطفال

صحيح صحيح حجي كاطع...جيب شيف بطيخ اللاخ

و تدري حجي ثجيل من البلد يحكمونه مجموعة مهرجين مثل جماعتنا يصير البلد كله عبارة عن سيرك

و الله تمام حجي كاطع

هاك أخذ شيف اللاخ لانه راح أحزز البطيخة الثانية

رحمه على ذاك الأب حجي كاطع

و تدري من البلد يحكموه مجموعة حرامية يصير مثل ولاية بطيخ لا قانون و لا عدالة

و الله كلامك ذهب حجي كاطع

لا و فوكاهه أسم قائمتهم " دولة القانون " لازم هذا القانون اللي يدك عليه المزقجي مال حمدية صالح هههه

ههههه ...ناوشني شيف اللاخ بروح أبوك حجي كاطع

و تدري حجي ثجيل من البلد يحكموه مجموعة قرود تصير الوضعية و كأنك عايش بقفص و القرود  يباوعون عليك من برُة القفص

و الله كلامك مثل ماء بارد على قلبي...شيف اللاخ حجي

أخذ حجي..راح أحزز البطيخة الثالثة

حجي و الله بطيخ يسوه هاي الكعدة الحلوة 

و تدري حجي ثجيل من البلد تحكمه احزاب التيارات الدينية بدل حكومة تكنوقراط  يصير حالة عبالك عايش بداخل كابوس مو داخل بلد له حضارة عمرها 6000 سنة

حجي شنو هاي التكنوقراط...من أسمها مبين هذولة ناس تاكل قرنابيط هواية

لا حجي ثجيل..يا قرنابيط...بس الصراحة آني هم ما أعرف شنو التكنوقراط  بس سمعتها بالتلفزيون و صار لي شهر أحاول حفظ الأسم

ناوشنا شيف اللاخ حجي كاطع

و تدري حجي من البلد يحكمه مجموعة قتلة معناتها نصير مثل اللي عايش بغابة من الواحد يقتل بالثاني و البقية بس تتفرج من بعيد و تنتظر يومها

الله على تشابيهك اليوم حجي كاطع..كلها على الجرح

و تدري حجي ثجيل..البلد اللي يحكموه ناس ما عندهم عقل و لا ثقافة و لا ضمير وطني يطيح حظه و يصير مثل المرجوحة هذا يدفع و ذاك يدفع و أحنا بالنص مسموط أبونا

و الله بهاي أنت أجيت على الجرح حجي كاطع

و تدري حجي لمن كل هاي و ذاك يصير بالبلد و الناس تسكت و ما تثور يعني شنو

شنو حجي كاطع..بس قبل ما توضًح أريد شيف بطيخ اللاخ

يعني كل المهرجين و الحرامية و الزعاطيط و المسئولين اللي ما غندهم ضمير و القتلة يستمرون بمنهاجهم اليومي من دون رادع و لا محاسب و لا رقيب و بهذا يزدادون غيًا و فحشا و خطيئة بدون خوف و لا وجل

و الله عمي حجي أنت كلامك ذهب...هاي أذا أكلت بطيخ و هيجي كمت تحجي لعد لو ماكل أناناس كان شسويت

يمكن كان صرت ثوري مثل جيفارا ههههههه

هههههههه....حجي كاطع..و هذا منو جيفارا

أكل حجي شمخي..همزين موكلك بطيخ مو باذنجان مقلي..كان هذا الي جوه 
صلعتك جيًم للأبد

و يستمر أكل ال...بطيخ

********************

و لك رياض ماكو أحلى من طعم بطيخ العراق رياض

     



صورة..و كم كلمة

خوش خيار...بيش الكيلو ؟

البرلمانيون العراقيون...و دجاج أفريقيا

جاءته دفرة أيقظته من نومة الظهر. فتح عينيه فأذا بزوجته الحنون و هي تقول له

- كوم كافي نوم لعز الظهاري. ما بيك فايدة غير بس النوم. كوم روح لدكان أبو كمبالا أمبالا و جيب أكل

- هو هذا هم عنده أكل يا أم ماهونجا. أشو بس يبيع جت و سماد كيمياوي الذي صنعه من ناتج فضلات المواشي

- أعرف بس يقولون أن قافلة مساعدات الأمم المتحدة المخصصة لأفريقيا وصلت  هذا اليوم   لقريتنا و دا يوزعون مساعدات خاصًة على المهتلفين اللي ما عندهم أي شئ أمثالنا و أختاورا دكان أبو كمبالا إمبالا كمركز للتوزيع

- صار يا أم ماهونجا ..هسة أروح

- لا تنسى أطلب منهم صدر دجاج مناسب لعمل أكلة كوردون بلو بالجبنة المحلًية و لحم دجاج مناسب لعمل غراتان الدجاج بالبروكلي

- شنو بالضبط هذا اللي قلتيه للتو يا أم ماهونجا يا بنت أبو البلبلي

- مثل ما سمعت..خلًي فد يوم ناكل مثل ما تاكل هالأوادم..بعني حرام

- بس هاي شلون أحفظ كل هالمسميات يا أم ماهونجا

- هسًه أكتبها لك على جلد الماعز مال بيت الجيران و أكعد أحفظها بالدرب

و ذهب أبو ماهونجا في طريقه لدكان أبو كمبالا أمبالا و هو يردد مع نفسه أكلات أم ماهونجا " كوردون بلو بالجبنة و غراتان الدجاج بالبروكلي.. كوردون بلو بالجبنة و غراتان الدجاج بالبروكلي... كوردون بلو بالجبنة و غراتان الدجاج بالبروكلي "

و فجأة أنقلب الصبح ليلا و الضوء ظلاما و الصيف شتاء و خرج ديك كبير من حيث لا نعلم من أين و صاح بأعلى صوته

كوكورييييكو...شبيك لبيك ...ملك جان دجاج أفريقيا بين إيديك

فرك أبو ماهونجا عينيه و هو غير مصدق لما يراه

 هاي منين أجيت يا فارع الطول...الله يخليك لا تأذيني...تره ورايه 5 أطفال و زوجة حنون و ما عندي غير الصريفة مال أبو زوجتي عايشين بيها

عمًي لا تخاف ..أنا ملك جان دجاج أفريقيا..انت قريت التعويذه اللي تخليني أجيك و أنفذ لك طلب واحد فقط مما تطلب و تتمنى

الله يخلًيك..يا تعويذه اللي دا تحجي عليها

و الله أمرك عجيب...صارلك ساعة تقراها و تقول " كوردون بلو بالجبنة و غراتان الدجاج بالبروكلي " و ها أتذا أجيت...شلون يوم مصخًم هذا...صار لي 500 سنة من جابوني من أمريكا و عينوني  ملك جان دجاج  مال أفريقيا و لا واحد عرف يفك طلاسم التعويذه و قلت مع نفسي راح أعيش فد الفين سنة اللخ بدون وجع راس...هاي شلون طركاعه بهاليوم الأسود هذا...عمي خلصنا و قول شتريد

و بعد أن أدرك أبو ماهونجا الصدفة السعيدة التي قادته الى هذه اللحظة الحاسمة قرر أن يستغلها لآخر قطره فقال لملك جان دجاج أفريقيا

أريدك تصنع منًي رجل مهم و تحطني بمنصب مهم في مكان لا يهم ماذا كنت بل يهم ماذا أصبحت . أريدك تحطني بمنصب أكرف منه فلوس لأبو موزه و ماكو مسائله و أشتري عقارات و أملاك بأوربا و رصيد بالبنك و راتب تقاعدي يكفي أحفادي ل 1000 سنة . أريد أطك و لا أحد يقول لي فوك عينك حاجب. أريد من أمشي بالشارع الناس كلها تقف حتى أمر .و أريد أسافر و أروح و أجي بجواز دبلوماسي حتى أستمتع بمعاملة خاصًة . أريدك تحقق لي كل هذا بمنصب واحد و تخلي هذا المنصب يدوم لي الى يوم الممات...ها و أريدك شوية تخفف من سوادي الزنجباري و تخليني أسمر حنطي بدل أسود...أريدك تخليني أنسى كل أيام الفقر و البهذلة و تسويني آدمي جديد

يقال أن ملك جان دجاج أفريقيا حول أبو ماهونجا الى عضو بالبرلمان العراقي و خلص من دوخة الراس.

 العليم الله يمكن ملك الجان هذا حوًل أبو ماهونجا الى علي شلاه



البرلمان...و ستار ترك

ستار ترك...كلنا يتذكر مسلسل الخيال العلمي هذا . كابتن كيرك حلال المشاكل في آخر لحظة . سبوك ابو اذان طويلة غريبة الشكل يدوس على كتق الواحد فيخر مغشيا عليه " لي هسه ما عرفت يا عصب يضغط عليه هذا الملعون حتى يخلي الشخص المقابل يغمى عليه بهذا الشكل " و غيرها من الشخصيًات التي لا تزال عالقة في أذهاننا كما علق الأخوة في الحكومة بكراسيهم.

و في هذا المسلسل ترى تلك السفينه الغريبة الشكل تتجول في الفضاء الرحب و تكتشف في كل يوم مخلوقات جديدة في مناطق نائية من الكون . المهم في كل هذا أسئله كنت أسألها لنفسي عند مشاهدتي لهذا المسلسل أيام زمان . فيا ترى منو يخيط ملابس الجماعة في السفينة . زين على يا وقود تشتغل هذه السفينة اللي ما فد يوم شفنا واحد يقول للكابتن " سيدي...الوقود راح يخلص و لازم نشوف محطة بانزين قريبة " . زين منين يجيبون قطع الغيار لصيانه مركبتهم و خاصًة أنها في كل حلقة تتعرض لضربات تمحى من أثرها الجبال . زين منين يجيبون الأكل لكل هذا الطاقم و منو يطبخ لهم هذا الأكل. ما شفنا يوم الطباخ و لا المطعم ولا وين ياكلون . زين منين يجيبون الماي و وين يتم تصريف المياه الثقيلة . منين عندهم كهرباء بكل وقت حتى في المواقف التي تتعرض لها السفينة للضربات تبقى الكهرباء تغذي المركبة مو مثلنا لا كهرباء و لا ماي و أحنا بعدنا ما طرنا للفضاء .  

المهم من كل هذا و ذاك و هنا مربط الحصان هو هذا العدد المهول من الطاقم . تشوف الناس تروج بهاي السفينة رايحين جايين و ما تعرف شدا يسوون . طول فترة المسلسل تشوف الكابتن و طاقم الكابينه همه اللي يقومون بكل المغامرات أما البقيه فبس يقضوها يتمشون في ممرات السفينه ولو يعيطون من السفينه تميل لو يوكعون بالكاع من تنضرب السفينه . أما شنو وظيفه كل واحد من هذوله فما تعرف. على شنو يتقاضون راتب هم ما تعرف. رايحين جايين شنو اللي دا يسووه ... هم ما تعرف

رباط الحصان أعزائي المشاهدين أن أعضاء البرلمان مال دولتنا هم مثل طاقم سفينه ستار ترك . لا تعرف شنو أساميهم و لا شنو فائدتهم و لا شنو اللي دا يسووه و لا على شنو دا يقبضون بهالرواتب المهوله و لا شنو لزمتهم بقياده سفينه العراق . همه كم واحد اللي متسيدين المشهد السياسي و يقودون سفينه العراق الى مستنقع الأمان أما البقيه فهم نكرات لا نعرف حتى أساميهم و لا محل لهم من الأعراب سوى المساهمه في السرقات و شفط أموال الشعب

المصيبه أن مسلسل ستار ترك أستمر منذ ذلك الحين و حتى يومنا هذا . فبعد أن هرم من هرم و مات من مات من أبطال المسلسل القديم أطل علينا المخرج بحلقات جديدة أسماها " ستار ترك..الجيل الجديد " و مثل الجيل القديم تشوف بس الكابتن و كم واحد هم من يقومون بالمغامرات و البقيه يتمشون في ممرات السفينه بلا شغل و لا مشغله...يعني مراح نخلص من جيل حتى يطلع جيل جديد يتمم ما قام به الأسلاف من قيادة السفينه الى أماكن لم يذهب لها بشر من قبل...و أحنا بس كاعدين نتفرًج

خبر ع الطاير
كشفت صحيفة المشرق اليومية العراقية عن أعتقال موظف في مكتب الرئيس العراقي الكابتن كيرك المعروف بأسم " فؤاد معصوم " و ذلك لتسريبه وثيقه من مكتب الرئاسه في وقت سابق مقابل مبلغ مالي
و جاء ذلك في وثيقة نشرتها الصحيفة حيث ملأت مواقع التواصل الأجتماعي مؤخرا و التي تضمنت تعيين " جوان " أبنه الكابتن كيرك مستشارة له و براتب 12 مليون و 900 الف دينار عراقي الأمر الذي أثار أستياء الشارع العراقي و خاصًة أن البلد يمر بأزمة كبيرة من الفقر و الجوع و التهجير و ميزانية خاوية بسبب الفساد و السرقة والمشاريع الوهمية

يا جماعة منو يريد نبقى محلًقين بالفضاء ؟

موز حجي غافل

المشهد الأول

 جلس الحاج غافل و هو يسند ظهره الى جذع النخلة و أخذ نفسا من سيجارته المزبن و نفث الدخان بحرقة و هو يجوب بنظره بستانه . سأل نفسه " مالذي جرى يا جماعة...أشو العالم كلها تتقدم و أحنا مثل بول البعير بس نرجع لي وره.و الله أتذكر العالم كانت تجي للعراق حتى تشوف العمران و هسه أحنا صرنا نحسد البلدان على عمرانهم و نتحسر على بنياننا و عراقنا أيام زمان...شنو اللي صار " هنا مر الملله محيسن من أمام حجي غافل

 الله يساعدهم حجي غافل

 هلا ملله محيسن شلونك

 الحمد لله حجي..بنعمه و خير..صوات على محمد و آل محمد

 ملله...ما تكللي أحنا شصار بينا...أشو العالم كلها ماشية لي كدام و أحنا منطلقين بأقصى

 سرعة الى الوراء...شنهي السالفة

 حجي...صلًي على محمد و آله

 اللهم صلي على محمد و آله

 حجي دجر بعد صلوات

 ملله ما تكوللي قابل داخلين مسابقة منو يجر صلوات أكثر...هو سؤال و سألناه

 حجي...العيب كله بيكم أنتوا العراقيين

  ملله لعد قابل أنت مو عراقي مثلنا...يعني أنت هم مشارك بالصوج

 لا حجي..آني موسوي من أهل البيت و ما علي أي زلل

 ملله مو  أعرف جدك الله يرحمه من كان يكرب نخل ويانه..منين صرت أنت موسوي 

حجي خلينا بالمهم..الصوج من عدم تقدم البلد هو أحنا العراقيين..يعني مثلا الفلاح بره 

اللي مثلك بدل ما يكعد يدخًن مزبن و يضيع وكته بالصفنات يروح و يفكر بمشروع يطور بيه بستانه أو نوعيه محاصيله أو يزيد من أنتاجه الحيواني و غيرها

 صفن حجي غافل على كلام الملله و قال في نفسه " دائما كلام ملله محيسن خريط بس هالمرًه الرجال دا يحجي عدل يمكن لأنه آني كاعد أعوج " 

مشكور ملله...ما قصًرت

 أودعانكم حجي

 أبتعد الملله محيسن و هو يشكر حظه أنه الأسبوع اللي فات كان حاضر أجتماع بالهيئة الزراعية بصفة مندوب عن فلاليح القرية و سمع هالكم كلمه اللي أتحف بيها الحجي غافل..يا غافلين ألكم الله

 المشهد الثاني

 زايرة أنه لازم أسوي شئ أفيد بيه البلد و يخلينا نتقدم للأمام

 حجي و لو ما أفتهمت شئ من كلامك بس أتوكل على الله و أعمل اللي تريده

 زايرة ما دام الحر وصل عندنا لهيجي مواصيل و صرنا عبالك كاعدين على خط 

الأستواء فآني قررت أزرع موز..بدل ما نستورد الموز و نصرف العمله الصعبة مال البلد برًة نكعد نزرع الموز بأيدنا

 و الله حجي يبين كلامك كلًش معقول ..بس شنهي هاي العملة الصعبة...أشو جماعة 

الحكومة صارت عملاتهم كلها سهلة...جيب و أكرف بلا تعب و لا شقاء

 زايرة ما أعتقد...لأنه هم سمعت أن فلوسهم كلها عملة الصعبة...حرام نظلم الوادم

 المشهد الثالث 

الملله محيسن مع بقية الشلة في جلسة سمر..بس جلسة حلال 

المللة محيسن : سمعتوا أن الحجي غافل يريد يزرع موز قهقهه من أحداهن بصوت 

عال...بس صوت حلال واحد من الشلًة اللي ديستمتع ...بالحلال

 اي سمعنا..هذا من كل عقله

 ليش لاء..خلًوه للرجال يسوي اللي يريده..هو مو حقه القانوني و الدستوري و الآدمي أنه يتطور مثل ما بقيه خلق رب العالمين يتطورون

 قهقهات نسائيه عاليه قريبة...قهقهات حلال

 و هو هذا يعرف يزرع موز لو حتى يعرف شجرة الموز شنو شكلها

 الملله محيسن و هو يقدم المزًة لأحدى المقهقهات : هو هذا المطلوب عيوني

  يعني شلون ملله محيسن...تره أنت حيرتنا

 لا تحتارون و توكلوا على الله و أهل البيت...و كل شئ راح يمشي عدل...أنطوني فد شويه من الشراب الحلال الذي أمامكم نجاكم الله من عطش يوم القيامة

 قامت أحداهن لتصب له كأسا و تقدمه له وقالت له و هي تقهقه عال ..أخذ ملله حبيبي ..سمًي و أشرب

 المشهد الرابع

 حجي وداعتك أجيبلك بزر موز لو كان بالقمر ما دام أنت تريد تتقدم و تقدم لبلدك و أهلك

 تسلم ملله محيسن...ما تقصًر

 آني حجيت مع أحد المغتربين في أمريكا الجنوبية و قال أنه يكدر يدزلك بزر موز من بورتوريكو

 ملله وين صايره هاي عيعوريكو...مبين من أسمها أنها مشهوره بالدجاج

 لا حجي يا دجاج...هاي دولة بأمريكا الجنوبية بيها مهربين يهربون بزر الموز من الأكوادور و يبيعونه بأنحاء العالم

 جا ملله و هاي شلون نجيب منها البزر

 أنت و لا يهمك حجي..أنت بس حضًر فلوسك و الباقي علينا

 بس ملله تره المبلغ اللي طلبتوه كلش هوايه

 حجي مو هواية..و الأخ المغترب منطيك خصم 20% بمناسسبة فوز صربيا ببطولة كأس العالم للشباب

 بس ملله منين أجيب هيجي مبلغ

 حجي أنصحك نصيحة لوجه الله..بيع نصف بستانك و أرهن النصف الآخر. و هيه كم سنه و تكوم تصدر موز و تسترجع بستانك و فوكاهه عشر بساتين مثلها

 و الله ملله خايف بعدين شغلة الموز و تصديره تصير مثل سالفه كهرباء الشهرستاني و أروحن آنه بالزلك

 حجي لا تخاف و توكل على الله و أهل البيت. أبني يريد يتداين كم فلس من خاله ويشتري نص بستانك و يرهن النصف الآخر...أبني المسكين ما عنده فلوس بس راح يتداين و هاي بس لخاطرك حجي

 تسلم ملله...بس هاي البذور مضمونة توصل

 حجي بضمانتي ...ما أخليك تنطي فلس واحد قبل ما توصل البذور

 توكلنا على الله...بس ملله أنت متأكد أن الموز ينزرع ببذور...أخاف يطلع ينزرع بأقلام و بعدين ننضرب بوري

 حجي أنت تعرف وين تصير الأكوادور

 لا و الله

 خلص حجي...توكل على الله و أهل البيت وخلًي السالفه على اللي يعرف وين بورتوريكو و الأكوادور و من أين تؤكل الكتف

 المشهد الخامس

حجي ...هاي هيه البذور و داعتك وديتها للأمام و قريتلك عليها يمكن خمسة أيام حتى الله يباركلك بيها

تسلم ملله...ربي يحفظك و يطول لي عمرك و يقدس سرًك

حجي و هاي هم عثك موز هدية من الجماعه اللي باعولك البذور...هدية مجانية

اللهم صلًي على محمد و آله...هذا شلون عثك و شلون موز ضخم...أصدك يثمر الموز مالي هيجي و ناكل آني و الزايرة موز كل يوم

حجي أن ذلك ليس على الله ببعيد...بس وداعتي حجي لأول عثك موز يصير من نصيبي

تدلل ملله...بس أكلًك ملله...هذا البزر شكله عبالك بزر مال جت...أنت متأكد هذا بزر موز لو آخاف يطلع بعدين بزر جت و نكعد وراهه ناكل جت

لا تخاف حجي...بعدين هذا جاي من أمريكا الجنوبيه...هناك ما عندهم جت

تسلم ملله...و يكللك صناعة أمريكا كلًش فاخرة مثل الجمسيات و الشوفرليت...أكيد البزر مالهم هم زين...و ما دام البزر من أمريكا معناها راح نبربع

المشهد السادس

ملله أشو صار لي شهور من زارع البزر و ماكو غير شويه عشب طلع مكان البذور...شنهي السالفه

حجي أصبر...قابل زراعة الموز سهلة...لو هيه هيجي سهلة كان الموز ترس الدنيا و سعره صار أرخص من سعر البصل

هم صدك مللًه...بس كل ما أباوع على العشب اللي طلع عبالك دا أباوع على حقل جت...أعوذ بالله من وساوس الشيطان

إي حجي...أطرد هاي الوساوس من دماغك و أذا تريد أجي أقرا لك على البستان و العشب و الزايرة...بعد شتريد

يطوللي عمرك مللًه...ما أدري لو أنت و اللي من أمثالك من الملالي ما موجودين كان شصار بحالنا

أشكر الله و أمريكا حجي...أيامكم راح تكون كلها سعيدة بأذن الله

المشهد السابع

زين ولك محيسن هذا أذا الجت نبًع و حجي غافل حس عالملعوب شراح تسوي

معليكم ...كلش مرتب

قهقهه نسائية حلال من بعيد

زين شلون مرتب..و لك هذا حجي غافل راح يكلب الدنيا على راسك إذا عرف أنك 
قشمرته و أخذت نص بستانه و رهن النص الثاني لأبنك بكومبيالات

دنطونا شويه من هالشراب الحلال و خلوها على الله و ملله محيسن

قهقهه نسائية يتبعها صوت نسائي و هو يقول...تفضًل ملله...الفرج كلًه يجي على أيديك 

تسلمين حبيبتي كرجية...آني بس أريد كم واحد منكم و شوية نفط و شخاط

الكل و هو يقهقه : و لك محيسن لازم راح تشتغل حاروكه

ليش لاء...قبل بأيام صدام مو كنت أشتغل بالأمن و اليوم آني ملله...ليش بعد ما أكدر أشتغل حاروكة

قهقهت كرجية بدلع و داعبت شعر ملله محيسن و هي تقول له: و الله عمًي اللي ما عنده ضمير و أخلاق كلشي يكدر يشتغل

أجابها الملله محيسن بأمتعاض و هو يقول : شوف منو صاير شريف روما براسي

المشهد الثامن 

 خرج المللة مذعورا على صياح أهل القريه : الحك حجي غافل ..بستانك صار فحم

صاح حجي غافل و هو يرى بستانه و حشيش الموز و هو يحترق أمام عينيه : يمعودين شصار...ليش هيجي...مو حتى شجر الموز بعد ما كبر 

و هنا سمع حجي غافل أبناء قريته و هم يصرخون ...الحك حجي غافل....الزايره مغمى عليها في البيت..يقولون أن جماعه ملثمين هاجموا بيتكم

ركض الحجي عائدا الى البيت و وجد نسوة القريه و هم يحيطون بالزايره و يهدأون من روعها و هي ممده في حضن أحداهن التي أخذت تمسح على وجهها بقطعه قماش مبلله بالماء و هي تقرأ عليها المعوذات

زايره شنهي اللي صار

حجي ما أدري...أشو ثلاثه ملثمين دفعوا الباب و همه شايلين سلاح و قالوا لي أنهم من جماعه داعش و أن زراعه الموز من المحدثات و تشجع على عدم زراعة الشلب و لذاهم حرقوا البستان و أذا قمت بزراعه الموز مرًه ثانيه فأنهم سيعدمونك و يعلقون جثتك على أحدى نخلات القريه

و هنا أنهار الحاج غافل و أسرع الجميع بحمله و نقله الى مستشفى القضاء

المشهد التاسع و يمكن الأخير

حجي لا تهتم...بالمال و لا بغير شئ...الله ينتقم من داعش

تسلم ملله محيسن...هسًه ما تكول لي آني شسويت لهم حتى يحركون بستاني و حلالي

حجي هذوله ما عندهم رحمه و تمولهم دول مجاوره ما تتمنى العراق يصدر موز

عمًي و هو قابل الموز فاكهه محرمة...مو أحنا على باب الله

حجي هذوله حاقدين و مدفوعين من برًه و على عنادهم إلا نبقى نستورد بزر موز و نشجع العراقيين على زراعته و الشحنه الجايه الا أنت أول اللي ننطيهم البذور

ملله و هو آني بقى عندي شئ أشتري بيه بذور جديده

صدك حجي على ذكر الفلوس...تره أبني بضيق و محتاج الفلوس اللي داينها لك بضمان نص بستانك اللي بقى ملكك

ملله الله وكيلك صفيت على الحديده

بس حجي أنت هم تعرف أن الفلوس اللي داينها لك هو هم مستلفها من خاله و لازم يرجعها و انت الله يعينك ما بقى عندك أمل بحصاد الموز و تصديره 

ملله ماكو غير ياخذ نص بستاني اللي صفالي..منين أجيب فلوس أسدد بيها الدين

حجي الله يعوض عليك بأحسن من هاي البستان...و آني من ناحيتي راح أسامحك بحق الخمس لأنك متضرر و راح أدعيلك و أدعي لكل أمثالك أنه الله يوفقهم و يسدد خطاهم حتى ينصرنا على داعش و أمثالهم

ملله أحنا و ولدنا لازم نقاتلهم حتى نخلص من هالشر و تبقى الدنيا للخيرين أمثالك و أمثال كل الطيبين من أهل القرية

صاح الجميع يصوت واحد: أن شاء الله ما يبقى واحد منهم بالديره

 وهنا أخذ الملله محيسن يبكي و يعدد مناقب و فوائد الموز بينما الجماعه مشتغلين لطم و تمزيق دشاديش

و هنا صاح ديك القريه معلنا الصباح فسكت لبيب عن الكلام غير المباح...و يا غافلين إلكم الله

شنسوي...الظالمين كطعوا عنا الموز و خلونا تاليها ناكل أناناس و برتقال

أنا و هو

جلست على مقعد الحافلة منهكا بعد يوم عمل شاق .و جلس بجانبي رجل في الثلاثينات من عمره بعد أن أبتسم لي و حياني . مؤدبين كلش أهل هذا البلد . أخرج من جيبه الآيباد و أخذ يجقجق فيه . لم أحاول النظر الى ما يكتبه الأخ الحباب فهذا هنا يعد تدخلا بخصوصيات الغير و هذا طبعا كلش عيب بأعراف أهل البلد الحبابين. بعد هنيهه التقت نحوي الرجل مبتسما و قال لي " هل تعرف ما أكتبه الآن "..نظرت اليه و أجبته

لا و العباس تره ما باوعت شدا تكتب

هو :  : أكتب عن مشاعري و فرحتي بقرار الأمريكان بأقرار زواج المثلين

أنا و بعد أن أبتعدت عنه قليلا : ليش هو أنت شاذ

هو : لا لست شاذا لكني أشعر بالسعاده لاقرار حق من حقوق هؤلاء المساكين

أنا : العفو و ماذا عن حقوقنا نحن غير الشاذين

هو : ما بالها فنحن ننعم بحقوقنا

أنا : طبعا لا فنحن لا ننعم بحقوقنا

هو : ماذا تقصد بهذا يا هذا

أنا : اليس من حقي مثلا أن أعيش مثل بقية الأوادم في بيئه ليس بها شاذ عن فطره رب العالمين

هو : و ما الضير في أن تعيش و حولك بعض الشاذين

أنا : و لماذا أعيش و من حولي أناس مختلفين عنا. أناس لا أئتمن أي منهم على أبني أو أبنتي

هو : يبدو أنك قاسيا بعض الشئ

أنا : لا و الله يبدو انك مايع بعض الشئ. رب العباد خلق الزوجين الذكر و الأنثى لتستمر الخليقه و خلق من كل زوجين أثنين لكل شئ ليش تجون و تفرحون لبعضهم ممن يغير خلق الله

هو بعد أن طارت الأبتسامه من على محياه : يبدو أنك صاحب فكر متطرف و غير حضاري. أنتوا ليش عايشين بيننا

أنا و بعد أن أستبد بي الغضب : يبدو أن مصائبنا لا تنتهي . نتكلم بالحق في بلادنا فنتهم بأننا بعثيون قاعديون داعشيون أرهابيون فنهاجر الى أرض الله الواسعه و نتكلم بالحق فنتهم بأننا متطرفون متخلفون رجعيون . لا أدري أين ستسعنا أرض الله

هو : و لذا فأنك يجب أن تنظر لنفسك أولا لأنه يبدو أن العيب فيك أن لم تسعك أرض الله و العيش بين عباد الله

أنا : العيب ليس في بلاد الله و لا العيب فيمن يريد أن يعيش كأنسان عادي و يحيا حياة عادية و يساهم في بناء مجتمع يكون أفراده عاديين بل العيب فيمن يقبل بالعيب على أنه ليس عيبا . هل أصبح العيش كأنسان عادي صعبا في زمننا الأغبر هذا

هو : يبدو أنك أنت من تصعب الأمور و لا تأخذ حريات الآخرين بعقل مفتوح

أنا و بعد أن هممت بالوقوف لا لضرب الأفندي بل لأني وصلت محطتي : يبدو أن تعريف العقل و الفكر المنفتح أصبح اليوم يعتمد على مفاهيم و أسس خاطئة ما أنزل الله بها من سلطان

و بعد أن نزلت و هم الباص بالتحرك أخرج الأخ الحباب رأسه من الشباك و صاح بي ...أرجع منين ما جيت يا متخلف

لا يا ملعون...هذا طلع لا حباب و لا هم يحزنون

خبر ع الطاير

كان رد فعل رئيس زيمبابوي روبرت موغابي غريبا على أنباء تشريع زواج المثليين في الولايات المتحدة. فقد صرح الزعيم البالغ من العمر 91 عاما بما أن الولايات المتحدة سمحت بزواج المثليين فهو مستعد لطلب يد الرئيس باراك أوباما.

وقال موغابي: "بما أن الرئيس أوباما يدعم زواج المثليين ويحمي مثليي الجنس. فأنا مستعد إذا لزم الأمر الذهاب إلى واشنطن وطلب يده".

أوباما لم يعلق على طلب موغابي لكن ميشيل زوجه الرئيس مكتئبة و خايفه لا يسويها أوباما و ينزًل ضرُه عليها تالي وكت