2014-09-20

خطية حمورابي

أسترخى على الحصيرة بعد أن أكمل غداء الظهيرة و أرتشف الشاي ثم نادى على زوجنه " زايرة...بلكت فد شاي اللاخ رحمه الله والديك "...أجابته الحجية " صار زاير...بس أنت خلصت كل القوري...راح أخدرلك قوري ثاني "
أرتخى على المخدة في أنتظار القوري الثاني و أخذ ينظر الى سعفات نخيل الناصرية و هو يتمايل مع نسمات الهواء الخريفية و العصافير تزقزق و هديل الحمام يعم أرجاء المكان...و ما هي الأ لحظات حتى سمع صوتا قويا
اعانتك الآلهه على ما أنت عازم عليه يا ولدي...كيف حالك
نظر الحجي الى الأعلى فأذا برجل ضخم طويل ذو لحية عظيمة شعرها مبروم كجدائل أبنه أخيه و يلبس الزي البابلي القديم يقف عند رأسه
الحجي : الله بالخير أبونا...أشو الثوب مالك كصير...شنو الخياط ما عنده شوية قماش يكمل دشداشتك و يغطي كراعينك ..وهاي ليش شاد رشمه مال أبو صابر حول خصرك
أجابه الشيخ الضخم : عذرا على الزي الغريب الذي لم تعتادوا عليه في زمنكم هذا يا سيدي .. لكن أنت صدك واحد ما تستحي..مو أحسن من أثواب أليسا و هيفاء وهبي...المهم أنا حمورابي العظيم و أردت الأطمئنان على أحوال الرعية من بعدي
أجابه الحجي : خايب الأنتخابات خلصت من زمان و صارت بالعكل بين أبو ما ننطيها و البقية و هسه يكولون صفت للعبادي...أنت أجيت متأخر و الكل أخذ بطانيات و صوًت
رد عليه الشيخ الضخم : حجي أنا حمورابي الذي حكم هذه البلاد و كل ما يحيطها منذ آلاف السنين...أنا من سننت أول الشرائع و أدرجتها في مسلتي...منها
 إذا، فقأ سيد عين ابن أحد الأشراف، فعليهم أن يفقؤوا عينه
إذا ضرب ولد والده فعليهم أن يقطعوا يده
و منها الكثير...أنها حوالي أكثر من 280 قانون و قلت أن هذه القوانين لن يغيرها أحد حتى و لو كان ملكا...حجي أفتهمت هسًه آني منو
فأجابه الحجي بكل برود : خايب جا أنت ما تدري...المسلًة مالك أخذوها لمتحف اللوفر في باريس و ما عندنا غير نسخه من الجبس منها
حمورابي : آنه خوك...و لماذا لم تطالبوا بها
الحجي و بكل برود أيضا : عمي شنطالب بيها...قابل هيه حصة تموينيه هههههههه. بعدين تعال أكلك...يا قوانين اللي جاي تحجي بيهه...أشو صارت فالتون ..الواحد ياكل باللاخ و أبن المسئول محًد يكدر يحجي وياه و المواطن له الله
حمورابي غاضبا...لا يا....مو آني انسمط سلفا سلفاي الى أن حطيت كل هالقوانين و نظمت سير الحياة في أرض السواد
الحجي: عمي يا قوانين يا بطيخ...راح ذلك الزمن
حمورابي مطأطأ رأسه : زين  و كيف حال رياضه صيد الأسود في زمنكم هذا
الحجي و ببرود : عمًي يا أسود...ما بقت غير البزازين بهالبلد و محًد بحالهن..و ين ما تروح تشوف البزازين حول المزابل و ما أكو أسد غير بحديقة الحيوانات
حمورابي متسائلا : و هل هذه حديقة غناء كبيرة و فسيحه كحقولنا الخضراء التي تطعم كل جياع العالم ؟
الحجي ضاحكا : خايب أنت شكد غشيم...أيران و تركيا كطعت الماي عن العراق و لا بقى نخل مثل الأول و لا زرع و لا شجر...عمي حتى الركي قمنا نستورده من أيران و الفلاح اليوم كلًه كاعد يشرب جاي و يدخن مزبن...و لك ما أعرف أنت شلون صرت ملك و أنت هالكد غشيم
حمورابي غاضبا : الفرس و غيرهم لم يكونوا ليتجرأوا على رفع أصواتهم بحضرة الملك حمورابي...و اليوم يقطعون الماء عنكم و أنتم ساكتون
الحجي و هو يلف المزبن : لا و أزيدك من الشعر بيت مولانا...أيران لاعبة بينا طوبه..مفخخات و أغتيالات و ميليشيات و فتن و غيرها
حمورابي و هو ينتف بشعر لحيته: كفى...لا أريد أن أستمع الى المزيد
و في هذه الأثناء شاهد الحجي رجلين يركضان نحوه و يلبسان أزياء تشبه زي حمورابي
الحجي: و لك شتهي السالفه..أنتم منين جيتم
الأثنان و هما يلهثان بعد أن وصلا الى حيث يجلس الحجي : أنا نبوخذنصر و هذا الملك آشور بانيبال جئنا لنستفسر منك عن حال الرعية من بعدنا
هنا سحب حمورابي الرجلين و صعد الى السماء معهم و سمعه الحجي و هو يقول للرجلين الذين سحبهما معه : الافضل أن لا تسألا أي شئ و الا ستنتحران من القهر...طيًح الله حظك أمريكا وكل اللي في بالي...و كان صوته كالرعد هز أرجاء الكون و زلزل الأرض من تحت أقدام الحجي
هنا أفاق الحجي على يد الحجية و هي تهزه: زاير أكعد...القوري خدر
هنا أعتدل الحجي في جلسته و قال للحجيه و هو يمسح عرقه المتصبب : الحمد لله الذي أحيانا بعد أن أماتنا و اليه المصير...يمكن إجاني ملك الموت بالحلم و فلتت منه
الحجية و بعد أن قص عليها الحجي الحلم: خايب يا ملك الموت...هاي يمكن حلمت بفلم القادسية و أنت ما تدري
لا قيًم الركاع من ديرة طويريج
 
و هذا الفيديو يوضًح لكم كيف نحيي اليوم عظمة حضارة الأجداد
 


2 comments:

اهلا بكل اصدقاء العراقي