الليله عيد

بمناسبه تشكيل الحكومه اخذت احدى القنوات الفضائيه بمقابله ناس من الشارع العراقي لتسألهم عن رأيهم في هذا الحدث السعيد. احدهم رد قائلا

و الله نتمنى من الحكومه الجديده ان تقدم للشعب العراقي الخدمات و كل ما يطمح اليه المواطن لان الحكومه القديمه ماسوتلنه شئ....بعدين صفن شويه و كأنما تذكر شيئا و أكمل كلامه بقوله...و لو ان الحكومه الجديده هي نفس الحكومه القديمه و ما تغير بيها شئ بس هم نتمنى ان يحسنون الاوضاع

هذا واحد ممن وصفهم المثل العراقي " نايمين و رجليهم بالشمس " . اما رأيي انا فانا اصف هذا و من ماثله بانهم الموردون الرئيسيون للصمغ الذي استخدمه المالكي الحزين للتشبذ بالكرسي...يلله الكرسي كرسي المالكي و يلعب بيه و شلهه غرض بيه الناس

و بمناسبه الكلام عن المالكي الحزين فقد صرح ابو اسراء الورده قائلا :- لقد أعلنت وألتزم ويجب أن يلتزم معي اخواني السياسيين والوزراء ومنظمات المجتمع المدني وجميع شرائح المجتمع بالعمل الدؤوب المسؤول بجعل معالم الدورة الجديدة كما نطمح إليه ( تثبيت الأمن وتفعيل الإعمار والخدمات)، ولقد كانت السنوات الماضية رغم صعوبة ظروف الحكومة إلا انها وضعت لبنات أساسية للتطوير والإعمار في مجالات النفط والكهرباء والصحة والمياه والمجاري والتعليم ، ويجب أن تكون السنوات المقبلة سنوات جني الثمار ، وأن تتجه الحكومة بجهد أساسي لتخفيف معاناة الشرائح الفقيرة من المجتمع وتقليص الفارق بالدخول والرواتب والإمتيازات

يابه اذا 300 مليار و اربع سنين و هاي فقط لوضع اللبنات الاساسيه للتطوير و الاعمار و في النهايه لا شايفين لا كهرباء و لا خدمات و لا غيرها زين لعد اذا طك الاعمار و اشتغلت ناطحات التراب شكد راح تكون الكلفه.....احسن شئ ننتظر اربع سنين اخرى و بعدين نحسبها و نشوف...مو هيجي اخويه المشار اليه في بدايه المقاله...انت شاطر بالحساب...مو هيجي

و بعدين العيطه كابه على عدد مقاعد النسوان و قله تمثيل النسوان في حكومه الزلم القديمه الجديده...و كانه التشكيله القديمه الجديده للحكومه هي تشكيله مثاليه و متكامله بما تحويه من علماء و خبراء و مستشارين و فطاحله و لا ينقصها غير شويه نسوان حتى تصل الى درجه الكمال ...زين عجب الاخ المشار اليه في بدايه المقاله لم يأت على ذكر هذه النقطه المهمه...عجيبه هاي شلون فاتت على واحد يفتهم مثله

اما علاوي ابو السبع بلاوي فقد قال في جلسه منح الثقه لحكومه " اشيد بشجاعة الشعب العراقي الذي استطاع بذكائه وحسه الوطني ان يتجاوز المحن ويتغلب على الصعاب المتمثلة بالطائفية والعرقية التي وضعت في طريقه، و ان امام الشعب العراقي افاقا رحبة للتطور والتقدم " يعني بالضبط مثل ما قال الاخ المشار اليه في بدايه المقاله...لعد شكد طلع هذا الاخ يفتهم و احنا ما ندري

و الف مبروك للعراق على الخير القادم...اخواني العراقيين ...حضروا كوانيكم تراح الخير راح يصير مثل المطر.....و آني عن نفسي راح اروح اشتري دسته كواني و بسرعه...قبل ما الاخ المشار اليه في بدايه المقال يشتري كل الكواني من السوق و بعدين تنفقد ويصعد سعرها