2010-09-05

و الله ابو بسعاد حل السؤال

 تورطت عندما قلت لنفسي لاقرأ بعض الاخبار...و يا لهول ما قرأت...اقرؤا معي

رئيس الوزراء نوري المالكي : العراق اليوم سيد ومستقل و لكن خبر آخر يقول  بدأت القوات العراقية باسناد من القوات الامريكية ، عملية عسكرية جديدة اطلق عليها / الفجر الجديد / لتعقب مسلحي القاعدة في سلسلة جبال حمرين في ديالى

لكن تعقيبا عما قاله نوري المالكي ان العراق سيد و مستقل قرات خبرا مفاده ان علاوي يؤكد: العراق ينزلق الى مستوى الدولة الفاشلة و يقول عن المالكي " كيف يكون المالكي قويا و هو يحكم كيلومترا مربعا واحدا فقط " و العهده على علاوي

زيباري " هوش " جفصهه و رد على نوري المالكي الذي قال ان العراق قوي و مستقل بقوله ان لا ضمانة في توقف التدخلات الخارجية بعد الانسحاب
 
و بينما طارق الهاشمي ابو خابصهه يقول القائمة العراقية‮:‬‮واشنطن تدعم التحالف بين  علاوي والمالكي رجع ابو السبع بلاوي  واتهم التحالف الوطني وبالأخص ائتلاف /دولة القانون/ الذي يرأسه رئيس الوزراء نوري المالكي بخلق أزمة تشكيل الحكومة مهددا بالأنسحاب من العملية السياسية برمتها ...هناك و قرأت  خبر يقول ان قائمه المالكي ترحب بمقترح واشنطن لتقاسم السلطه مع القائمه العراقيه

و على هالرنه طحين الحصه مو ناعم

شلت نفسي و ذهبت الى ابو بسعاد اللي براس الشارع....هذا ابو بسعاد واحد لاعوب محيبس عفريت و قلت له  .... الله يرحم والديك و اجدادك عمي ابو بسعاد... بس كلي المحبس وين.....تره آني راسي افتر و تاهت علي الحسبه
   
فقال لي ابو بسعاد...وليدي لبيب...حقك اذا لم تعرف اين المحبس...لانه انت تظن انهم يلعبون المحيبس بس بالحقيقه انهم يلعبون كره القدم...و احزر من هي الكره...انها نحن...و احب ابشرك انه بغض النظر عمًن سيسجل الهدف....فان الهدف سيسجل علينا نحن المساكين و ليس لنا

افحمني ابو بسعاد و راس غليص ... و هناك سمعته يصيح...بس عاد...بس عاد...انا أخذتني الحميه و قمت اصيح معه ...اي و الله بس عاد...مو طلعت روحنا...كافي بعد...بس عاد

هنا التفت الي ابو بسعاد و قال لي....ابني آني دا اصيح على ابنتي بسعاد...انته ياهو مالتك...انت ليش تريد تورطنا...مو آني مو حمل صوندات يا ابني

افحمني ابو بسعاد للمره الثانيه و رب الكعبه...هذه المره شلت نفسي و رجعت منين ما أجيت...أو مثل ما يسموهه هالايام "  عدت الى المربع الاول " و لو آني ما أعرف هوه ليش مربع مو مستطيل أو دائره





1 comment:

  1. عزيزي المقال رهيب وعاشت ايدك عيوني

    ReplyDelete

اهلا بكل اصدقاء العراقي