2010-02-10

اجهزه رصد البلابل



أخوان....لا يهمكم اللي يكوله المحتل و اذنابه حول التقسيم العرقي و الطائفي و ان العراقيين من العرب في وادي و الاكراد منهم في وادي آخر. و الله اخواننا الاكراد بيهم ناس تخليهم على الراس. واحد من هؤلاء هو صديقي كاكه بختيار " هذا اسمه الحركي طبعا ". بختيار هذا كان معي منذ ان كنًا في الجامعه . و شاءت الاقدار ان نفترق... هو للشمال الحبيب و انا لاكل الزبيب. و لكنه والشهاده لله يزورني كلما سنحت له الفرصه و انا أفعل نفس الشئ.لا ينساني و لا انساه و يقوم بزيارتي وزياره كل الاصدقاء في بغداد من غير كلل و لا ملل و بالطبع لا ينسى ان يجلب معه لبن اربيل في كل زياره..طبعا احنى مكيفين بلبن اربيل مثل ما مكيفين بختيار و يمكن شويه اكثر

قبل ايام جاء زيارتي و كالمعتاد سالته السؤال التقليدي العراقي " شكو ماكو ؟" كال باع لبيب ولو انته مو واحد يكدر يحجيلك كلشي لانه تكعد تحللها و تدخلها من الف باب بس هم ميخالف راح احجيلك . الربع الامريكي تبرع لنا بممعدًات كلًش مطوره

سالته: معدًات شنو كاكه بختيار...لا تكولًي لبن اربيل راح يصنًع بتقنيه امريكيه

بختيار: شوف انتو عرب عدكم مخ ثخين...شنو لبن اربيل بتقنيًه امريكيه...باب تبرعوا لنا بمعدات رصد زلزالي

انا: يا زلازل تحجي عنها كاكه ...العراق يقع خارج حزام الزلازل يمكن شويه يطخنه من هالحزام شويه بس بالنهايه العراق باذن الله آمن من خطر الزلازل المدمًره

بختيار: يعني هيه اجهزه متطوره تقيس اي زلزال بالمنطقه حتى لو كان زلزال صغير

آني: يعني تقيس اي نشاط زلزالي حتى لو كان جنوب العراق او ايران او سوريا

بختيار: لبيب هسه بدأ عقلك يشتغل

آني: زين كاكه كمًل للاخير...و شلون هذه الاجهزه تسجل القراءات

كاكه بختيار: هذه الاجهزه تبث كل القراءات عبر الاقمار الصناعي الى امريكا...يقوم العلماء الاميركان بتحليل المعلومات ثم ارسالها لنا منسوخه على دي-في-دي لنحتفظ بنسخه منها في مركزنا على جبل ازمر في محافظه السليمانيه

آني: هلو كاكه هنا بدا الفار يلعب بعبي ...و بعد... منو متبرع بهاي الاجهزه كاكه

كاكه بختيار: الحقيقه لبيب آني هم الجريدي بدأ يلعب بعبًي من عرفت انو الاجهزه متبرًع بيها الجيش الامريكي

آني : بعدين كاكه بختيار...منو يدربكم على هالاجهزه

بختيار : همه الاميركان اكو غيرهم..و كالوا انو هذي المنظومه راح تنربط ويه بقيه المنظومات في الاردن و عمان و غيرها من دول المنطقه.

قلت لاخي بختيار: شوف كاكه...أذا هوه مشروع علمي ليش الممول يكون الجيش الامريكي. و ليش المستقبلات نصبت في امريكا و ليس العراق.

بختيار: و آني شمدريني...شنو شايف جنابي قائد بالجيش الامريكي حتى اكدر اجاوب على اسئلتك

آني: حشاك كاكه بختيار...بس راح اجيك لمربط الفرس...زين مو المفروض انو القراءات تؤخذ بالعراق و من ثمً يقوم علمائنا بترويج نتائج القراءات للجهات التي يهمها الامر و حسب تقدير علمائنا...صح

بختيار: يعني و لو آني اضوج من اتفق معاك بالرأي لانه انته واحد نقناقي بس كلامك صحيح

آني: شوف اغاتي كاكه بختيار...كل المسأله و ما فيها انو الجيش الامريكي نصب هذه المنظومه حتى يقرأ اي نشاط زلزالي في المنطقه...العلاقه هي انه اي تجربه مستقبليه لاي قنابل غير اعتياديه و التي تولًد نوع من الزلازل الصغيره سوف تتم قراءتها من قبل هذه الاجهزه و ترسل للجيش الامريكي الذي سيستطيع ان يحدد مركز الهزًه و سببها . هذه المنظومه ستغطي مناطق كبيره و ذلك لشده تحسس هذه الاجهزه لنشاطات زلزاليه غير اعتياديه. اذن كما يقول المثل الاميركان سيسمعون دبيب النمل في كل دول المنطقه

بختيار: و الله كلامك صحيح...بس هذه اجهزه علميه ممكن ان تفيد بقياس النشاط الزلزالي

فقلت له: كاكه...كلامك صحيح..بس وين اكو زلازل مدمًره  بالعراق...التكنولوجيا العلميه و مع الاسف تستخدم الآن للاغراض العسكريه و مثل ما تشوف كثير من التطبيقات التكنولوجيه مثل التفاعلات النوويه يمكن استخدامها للاغراض المدنيه و العسكريه على حد سواء يجوز انه غرضهم شريف بس التجارب علمتنه انو لازم ندقق بكل الاحتمالات

بختيار: هذوله الاميركان ما يسوون شئ لوجه الله. و الادهى من ذلك انهم يرسلون ما يختارون من القراءات لنا و لكن احنا مندري هل هم دزًوا كل القراءات لو بس اللي يريدونه نشوفهه.

فقلت له: بالضبط كاكه

فقال لي: و فوق كل هذا حكومه الاقليم تزرع هذه المتحسسات في اي مكان يريده الاميركان

فانهيت حديثي بقولي: شوف كاكه...كان لازم نوجه ارسال الاشارات من هذه المتحسسات لمركز مبني في العراق...انا لا اقول ارفضوا التكنولوجيا الامريكيه بل يجب ان تكون تحت سيطرتنا...و اذا كان غرضهم نبيل فالمفروض انهم يقبلوا بهذه الشروط خدمه للعلم كما يدًعون و قراءه و تحليل و توزيع المعلومات يجب ان يكون من خلال علماؤنا. و فوق كل هذا لا أدري ما المعلومات الاخرى التي يمكن لهذه الاجهزه قراءتها و التي يستلمها الامريكان دون عن غيرهم؟

هنا قام كاكه بختيار مودعا لزياره المزيد من الاصدقاء و قال لي...شوف لبيب مو خساره بيك لبن اربيل اللي اجيبه اللك في كل زياره .بس كل ما اجيك و الجريدي يلعب بعبًي من فد شئ تطلعني من يمًك و الجريدي كبر و صار جمل بس صدك لازم نسأل الف سؤال عن كل جهاز او منظومه او شبكه تقترح اويتم التبرع بها من قبل الاميركان حتى نعرف ليش همه يريدون يقدمون مثل هيجي خدمات

فقلت له: كاكه انت و لبن اربيل على راسي من فوك بس سؤال واحد محيرني

فقال صديقي بختيار: شنو سؤالك لبيب

فقلت له: يعني انته من سليمانيه ...ليش متجيبلي لبن سليمانيه..ليش دائما تجيبلي لبن اربيل

صديقي بختيار عافني و هوه يهز بايده و يكول... لبيب ...مو صوجك...صوج اللي يجيبلك اللبن

5 comments:

  1. لازم يكون اكو تلث مراكز للرصد الزلزالي بشكل مثلث مهما تكون اطوال اضلاعه حتى تكدر تحدد مركز الهزة الارضية.

    المراكز الباقية الموجود في الاردن او في اسرائيل او الكويت غير كافية لان المسافات بينها وبين هذه المركز كبيرة.

    يعني امريكة بصريح العبارة راح تبني بعد مركزين بالعراق من نفس النوع حتى تحدد موقع الهزة.

    موقع الهزة تحديدة بسيط جدا مجرد فروقات الزمن باستلام نفس الهزة على ثلاثة مواقع تعني مسافات مختلفة الى رؤوس المثلث وبالنتيجة يمكن بسهولة تحديد موقع الهزة.

    في حالة وجود مركزين فقط تكون النتيجة خط مستقيم على طوله يكون موقع الهزة في مكان ما.

    في السابق في زمن الرئيس صدام حسين كان لدينا مراكز للرصد الزلزالي تقع قرب حدود ايران كما كان لدينا ادوات متحركة للرصد المغناطيسي اي العواصف المغناطيسية المتعلقة بالنشاط الشمسي ومركز ثابت في الجادرية عدا القابلية على الرصد المستمر للنشاط الشمسي وتغيرات وتقلبات طبقة الاينوسفير.

    الان اعتقد ان المعدات القديمة تم تدميرها لا اعرف مصيرها.


    لكن اخوية لبيب من جانب احتمالية الزلازل نعم موجودة.

    الزلالزل محتملة على طول جبال زاكروس وحتى مدينة الكوت ممكن فيها وحتى في الخليج ممكنة وفي جبال طوروس ممكنة ايضا والسبب ان هذه الجبال التوائية وهي تكونت بسبب التواء اي ارتفاع الارض بسبب تضاغط طبقتين وعمر جبال زاكروس هو خمسين مليون سنة بالضبط وهي مكان لدراسة تاريخ المتحجرات مما كان تحت البحر بملايين السنين السابقة وفي اخر زيارة لي للسليمانية وعلى جبل زيتوني وبيرة مكرون كان هناك اصداف بحرية فوق الجبل كبيرة وصغيرة وهذه اعمارها بملايين السنين.


    وعاشت ايدك على هذه الخبر لانه بالضبط يشير الى تحسس اي تجربة نووية تحت الارض في ايران.

    من جانب اخر الجبل الذي ذكرته اسمه

    ئةزمةر اي تكتب ازمر وهو جبل يطل مباشرة على السليمانية وفي جزء منه قمة تسمى

    جوارتة
    اي الاحمال الاربعة

    اما قضية لبن اربيل فهي تذكرني بدكتور بالجامعة واصله من الكوت وبقي شهر كامل في اربيل وبعدها سالته عن الكلمات والجمل الكردية التي تعلمها فقال فقط كلمتان

    ماست اي لبن
    سةرجاو اي على عيني وتعني شكرا

    فكان يذهب لشراء اللبن وعند شربه يقول سرجاو وهذا كل ما تعلمه.

    واعتقد ان السليمانية رغم كونها المدينة الوحيدة البرجوازية في كردستان فانها لاتستطيع التغلب على لبن اربيل.

    البرجوازي العراقي

    ReplyDelete
  2. برجوازينا...شكرا على الاضافات و المعلومات...طبقا لصديقي بختيار فان هذه المحسسات مزروعه في اكثر من مكان داخل العراق...هي محسسات بالغه التطور و اذا ربطت بمنظومه المنطقه فالتحسس يمكن ان يغطي المنطقه...كل القراءات تذهب لمركز في الولايات المتحده للتحليل.ربما متطلبات الاجهزه الجديده فيما يخص اطوال اضلاع المثلث مختلفه عن الاجهزه القديمه . المرًه القادمه سأسأل صديقي بختيار لاعطائنا معلومات اكثر عن هذه الاجهزه و عن كيفيه قرائتها للهزه. كما ذكرت في مقالتي انا لست ضد الاخذ باي تكنولوجيا من امريكا خاصه ان كانت مجانيه " شعرايه من جلد خنزير غير معمم " و لكن يجب ان تكون هذه التكنولوجيا تحت سيطرتنا و اشرافنا. الزلازل في العراق موجوده و لكن خطر الزلازل المدمًره جد قليل. حتى تصميم الابنيه في العراق لا تدخل قيمه القوى المتولده من الهزه الارضيه العاليه " فوق قياس 7 في مقياس ريختر " في حسابات التصميم. انا نفسي كانت لي تجربه مع هزه ارضيه في احدى زياراتي لصديق في الموصل و كان هذا منذ وقت بعيد .هناك بعض الدول التي لها سواحل بحريه كدول جنوب شرق اسيا و القاره الاستراليه و غيرها تحتاج اكثر الى هذه الاجهزه للتنبؤ عن حدوث تسونامي في حاله الهزه الارضيه التي تحدث في عمق البحر. اسف على الخطأ في كتابه اسم الجبل فهو كما ذكرت ازمر و ليس ازمير و تم تصحيح الخطأ. اشكرك جدا على تعليقاتك المهمه و التي تضيف الكثير من المعلومات القيمه للكل و منهم انا
    و بخصوص لبن اربيل حقه ماما جلال من يفتخر بان " لا بديل عن لبن اربيل " و عاشت كركوك عراقيه

    ReplyDelete
  3. هاي مشكلتي كلما أدخل على هاي المدونة ما أركز على الطرح الجاد في مواضيعها !!! لأن تجذبني السخرية في الطرح .... ومن أهنا , يبدأ فار يلعب بعبي من جهة , و جريدي يلعب بعبي من الجهة الثانية !!!
    أستمر لبيب ... خللي أشوية نروٌح عن هموم مقالات عشتار العراقية (طبعا آني أهواية نصحتها أتخللي لسٌتة بأدوية الضغط للقراء في آخر كل مقالة ) , ترى والله ورمت گلبنا من مقالاتها هالعشتار !!!!

    عراق

    ReplyDelete
  4. اغاتي عراق. الله يقدرني و استمر باعطاكم جرعات لتخفيض الضغط. تره عشتارتنا عدها روح سخريه رهيبه و هيه من تكتب مقالات ساخره تخليك تخرب من الضحك. بس روحهه الوطنيه العاليه تخليها تاخذ الحياه بجديًه عاليه . حلوه هاي مال لسته الادويه المخفضه للضغط في نهايه كل مقاله. اقترح ان تفاتح كل الفضائيات العراقيه او التي تبث اخبار عراقيه لتضع لسته مشابه في البانر الذي يظهر اسفل الشاشه عند بث صور ولقاءات و اخبار الحكومه العراقيه و جلسات البرلمان . تدري اقتراحك هذا شكد راح ينقذ ارواح ناس و يطلًع دكاتره الامراض القلبيه و العقليه و مستشفياتها كسر...عفارم عليك

    ReplyDelete
  5. برجوازينا...قريت هذا الخبر و يمكن له علاقه بخبر المقاله

    http://www.elaph.com/Web/Politics/2009/12/511392.htm

    ReplyDelete

اهلا بكل اصدقاء العراقي