صور للذكرى

الصوره الاخيره نشرتها كما هي و وضعت تعليقي فقط...اما ان المصور خبيث و اختار هذه الزاويه لالتقاط الصوره او ان منسق الحفل خبيث و اختار الصوره المناسبه لوضعها خلف منصه الخطابه....آني ما عليًه...و اذا ما تصدكون شوفوها على هذا الرابط  

أسويهه لو ما اسويهه

الصوره مقتبسه من احدى المنتديات

بعد عده تعليقات على احد المقالات في موقع غار عشتار لعزيزتنا عشتارتنا العراقيه انقسمت عائله الغارالى قسمين..فريق مؤيد لفكره ان اتحول الى جنس ثالث و اصير آيه الله و القسم الثاني قلبه موغوش ولا يريد هذا التحويل خوفا من مطالبتي اياهم  بنصيب الخمس اذا تم هذا" و هذا حق مكتسب من حقوق آيه الله "  بالاضافه الى بعض الحقوق الاخرى كالحاق بعض الالقاب بلقب الآيه " كقدس الله فرارته...ادام الله البلوز اللي لابسه...طوًل الله ردن دشداشته..حفظ الله عمق جيبه" ...الخ من الالقاب اللي لازم الواحد يختار ما يشاء منها على ان لا تزيد عن خمسه

الحقيقه تطبيق الفكره ليس سهلا...فأولا لازم اغير اسمي من" لبيب العراقي" الى " أغبر الايراني" ...و اسم المدونه من "عراقي بن عراقي" الى "أيراني بن نكره" ...و اغير شعار المدونه الى صوره حجي خامنئي و هو يلطم...الخ من الامور الفنيه اللي راح تاخذ وقت و جهد ..بس ميخالف...الخمس يستحق كل هذا الجهد و فكرت و بما ان هناك حوزه علميه فأذن يجب ان نؤسس حوزه ادبيه حتى اللي ما يطلًع معدل و ما يكدر يروح حوزه علميه فيكدر يروح حوزه ادبيه ...و حلوه من يكولون آيه الله أغبر الايراني هو الاب المؤسس للحوزه الادبيه " و على عناد ملله مقطاطه ابو الحوزه الناطقه " و حينذاك و بما اني المؤسس الرائد لهكذا حوزه فامكاني ان ارفع قيمه الخمس الى الربع و في النهايه لعد آني ليش اريد اصير ايه الله

و كواحده من ادوات الآيه المطلوبه قررت البدأ بتجربه لحيه مزيفه و عمامه هنديه "اهداني اياها صديقي الهندي عندما قرا في مدونتي اني اثبت ان لا وجود لاي هندي بنفسجي" . لبست اللحيه و العمامه قبل الذهاب للعمل و اول ما نزلت الدرج و شافتني العائله الكريمه بدأ تأثير اللحيه فوريا و سريعا...فابني الصغير انفجر من البكاء و هو يصرخ " بن لادن حي...بن لادن حي " و لف يديه حول طيارته الورقيه خوفا عليها من الاختطاف....زوجتي اسرعت و رشت علي مبيد حشري لانها صنًفتني كحشره ضاره ...كلبنا ذهب و احضر كلب الجيران و الله يجازيهم الاثنين شخًوها عليه و همه فرحانين " طلع حتى الكلاب تأنف من هؤلاء الآيات "...جيراننا اول ما شافني اتصل بدلال البيوت و كله يعرض بيتهم للبيع...اما قط الجيران الابيض فاقسم بالله كاني رايت لونه و قد تحول الى اسود...البقال الملاصق لبيتنا جائني مهرولا و تبرع لي بماكنه حلاقه و هو يقول " الله يجازيك اخويه لبيب عبالي من صدك في زقاقنا آيه ...غير تكول انت محتاج كم موس لماكنه الحلاقه مالك و الله خرعتنا " ....ولك لبيب هاي شلون طركاعه و بعدني باولها

نزعت اللحيه و العمامه و انا ادمدم. هاي اللي يعرفوني جان هذا رد فعلهم...لعد اللي ما يعرفوني شراح يسوون

و بما اني في هذا الوقت كنت اسكن في بلد اجنبي فقد قررت ان ابحث عن الرداء او ما يسمى بالجبًه لاكمال زي الملله...فذهبت لاحد المتاجر و في يدي صوره كامله لواحد من ايات هالوقت. دخلت المتجر و اريته الصوره و قلت له اني اريد شراء زي كهذا..نظر مليا الى الصوره و قال لي  " آني ما عندي مثل هذا الزي بس اكو بنهايه الشارع محل متخصص ببيع ازياء الهالوين ...روح بلكت تلكي عنده اللي تريده "  فشرحت له ان هذا الزي هوه لآيه الله و لا علاقه له بازياء الهالوين فقال لي  " وداعتك نفس الشي.... كله رعب و موت...دروح لهذا المحل و انت تشوف " .... هاي شلون شغله

فوضت امري لله و رحت لهذا المحل. اجاني ابو المحل و سالني عن مرادي..الحقيقه جان لابس قناع ارعبني بحق فسالته عن سبب لبس القناع و عيد الهالوين بعد ما اجه وكته لو هوه من باب الدعايه للمنتجات التي يبيعها المحل فرمقني بنظره مخيفه و قال لي " هذا وجهي الحقيقي" ..اعتذرت منه خوفا على وجهي من التشويه على يد هذا البائع و قلت له  " آني دا ادور على زي مثل هذا باعتباري اريد اصير آيه الله"  فنظر في الصوره مليا و قال لي .." آه.... زي الرجل الوطواط "  فقلت له بادب ان ما ابحث عنه هو ليس زي الرجل الوطواط و قلت له ان آيه الله اقرب الى مصاص الدماء منه الى الرجل الوطواط....فقال لي....آه قصدك دراكيولا...مع الاسف بعد ما نبيع هذا الزي ...بعد ما التلفزيون مال دولتنا كام يعرض لقطات من اجتماعات الحكومه العراقيه و اعضائها انخفضت شعبيه هذا الزي من باب " صارت مزعطه " و محد كام يشتريه....فشكرت الرجل و اذنته بالانصراف

قررت ان اذهب لخياط حباب  لخياطه هذا الزي لاني لا اعتقد اني ساجد زي مثله هنا و لكني قررت شراء بعض الخواتم من الاسواق استكمالا لمتطلبات الزي فذهبت الى محل لبيع المجوهرات و اريته بعض صور الايات و هم يرتدون هذه الخواتم و قلت له اني ابغي شراء خواتم كهذه...نظر الرجل الى الصور و كام يحك براسه لمده عشر دقائق و بعدين قال لي " شوف زبوني الكريم...في حياتي لم اشاهد خواتم مثيره للضحك كهذه و اللي لابسينهه يضحكون اكثر بس  لو تجيب الي كم دعبلًه اكدر اصنًع لها اطارات و  احطهم بهاي الاطارات و تصير تشبه المحابس اللي بالصوره " ... شكرته على هذه الفكره الجهنميه و وعدته بالعوده اليه مره اخرى حالما اشتري هذه الدعابل

وصلت الى مقر العمل و انا متعب من مسأله اللحيه و العباءه و الخواتم.باشرت روتين العمل اليومي لغايه فتره الغذاء..احمد الله ان معي بعض الاخوان العراقيين في نفس محل العمل و عاده ما ادردش معهم اثناء فتره الغداء. هذه المره قررت ان اجرب الوي لساني مثل الايات و حجج الله فقلت لهم  " اليوم تأخرت اربوووطعش دقيقه عن موعد العمل و هاي سبووووطعش مره كلت لزوجتي انو تكعدني من وكت " ...لحظات صمت... ثم....الحقيقه لا اريد ان اروي لكم ما حصل بعد ذلك حفاظا على كرامتي الشخصيه و احترام حبايبي القراء لشخصي..... بس احب ان انوه هاي اول مره اشوف اصدقائي يعفطون و يسوون شغلات تخلي الجلد يكزبر

الله يساعدهم لهذوله الايات شكد حياتهم صعبه و آني اللي جنت متوقع انهم عايشين متونسين..ابويه لا اريد اصير ايه و لا هم يحزنون... يكفيني لقب آيه بالجمال وبس  " خوما الحلم عليه جمرك " على كولت عشتارتنا.... و صدق من قال ...انطي الخبز الى خبازته...مو الى لبيب

هاي شتحطلهه و تطيب

دوله رئيس وزراء حكومه الفافون ذبوني بن شداد  في احدى غزواته  ايام مرحله النضال السلبي ..هسه اتطور.... صار يركب سياره مو حصان

امس قرأت هذا الخبر و الذي يقول ان نوري المالكي امر بأعتقال الضباط العراقيين الذين شاركوا القوات الأمريكية امس في الهجوم على قرية حدودية تنشط فيها جماعة حزب الله المدعومة من أيران والتي تقوم بعمليات أرهابية داخل العراق وبما يسمى بـ ( الجماعات الخاصة )

وقد تم اعتقال مايزيد عن عشرة اشخاص مشتبه بهم وقد ادت العملية الى مقتل خمسة اشخاص آخرين قيل انهم من العوائل الموجودة في القرية

غير ان جيش االأحتلال اعلن في بيانه ان المجموعة المنتسبة لحركة حزب الله والتي يشك بعلاقاتها مع حزب الله الأيراني وحزب الله اللبناني كانت متحصنة في القرية

من جانبه أتهم هادي العامري زعيم منظمة فيلق بدر المعروفة بعلاقاتها بايران والذي هو ايضا رئيس لجنة الأمن والدفاع في مجلس النواب العراقي أتهم القوات الأميركية بخرق الاتفاقية الأمنية على خلفية قيامها مع قوات عراقية بتنفيذ عملية في إحدى قرى محافظة ميسان

وأعرب العامري عن احتجاجه على العملية التي أسفرت عن مقتل وإصابة عدد من الأشخاص، مؤكدا في حديث لـ"راديو سوا" على ضرورة تقديم الجنود الذين شاركوا في تنفيذ العملية إلى القضاء العراقي

وأشار العامري إلى أن رئيس الوزراء نوري المالكي أمر باعتقال الضباط العراقيين الذين شاركوا في تنفيذ العملية، مشيرا إلى أن "الحكومة العراقية ليس لديها علم مسبق بخصوص العملية بدليل أن رئيس الوزراء أمر باعتقال جميع الضباط العراقيين الذين شاركوا في تنفيذها فضلا عن فتح تحقيق لكشف ملابسات الحادث

وهذا الحادث واحتجاجات الحكومة تلقي الضوء على مجريات العلاقة الأمريكية العراقية وفق مايسمى بالأتفاقية الأمنية وأن القوات الأمريكية مازالت هي التي تتصرف بالساحة العسكرية والا كيف نفسر قيام قوات عراقية وامريكية مشتركة دائما في عمليات المداهمات للمدن ويقول رئيس الوزراء انه لايعلم بالعملية

وكانت القوات الأميركية أعلنت في بيان لها عن قيامها بتنفيذ هجوم على منطقة حدودية في محافظة ميسان على خلفية رصدها لتحركات مسلحين ينتمون إلى "كتائب حزب الله" التي تتهمها القوات الأميركية بالقيام بأعمال أرهابية في العراق وبتلقي الدعم من إيران

انتهى الخبر

وكانت عشتار العراقيه قد نوهت عن هذه العمليه في احدى مقالاتها

عده اسئله تبادرت الى ذهني و انا اقرأ هذا الخبر

لماذا لم يامر المالكي باعتقال الضباط و الجنود الاميركان كما أمر باعتقال القوات العراقيه المشاركه في هذه العمليه

من الذي اتصل و امر القوات العراقيه بمرافقه القوات الامريكيه . اليس من المفروض ان القوات العراقيه تأتمر بأوامر السلطات العراقيه

هل سيحاكم الاميركان بتهمه قتل عوائل عراقيه بريئه و هل تحركت حكومه الطراطير " او لاقل تجرأت "  في هذا الاتجاه لغرض تسليم الامريكان للسلطات العراقيه

لماذا لم ينفي العامري او المالكي وجود مسلحي كتائب حزب الله كما ادعى الاميركان

الجانب العراقي ذكر ان القوات المهاجمه كانت عراقيه مدعومه من قبل القوات الامريكيه في الرابط المشار اليه في مقال عشتار العراقيه فلماذا يناقض العامري و المالكي هذه الروايه

مع اي جانب يحتجز الاشخاص المعتقلين؟...مع الجانب العراقي ام الامريكي

هل لهذه العمليه علاقه بكتائب اهل الحق و التي تتهم بخطف جندي امريكي من اصل عراقي و هل يعاقب المدنيين العراقين كرد فعل على هذا الاختطاف

لاحظوا ان اوامر السيد المالكي لاعتقال الضباط العراقيين جاءت نتيجه لمشاركه هؤلاء الضباط الامريكان في صولتهم و ليس لان هناك ارواح بريئه هدرت و كانوا هم السبب فيها  

كل هذا تبادر الى ذهني و انا أقرأ الخبر ...زين صدًعتوا راسنا بالسياده المزعومه و تاليها طلع جيش الحكومه مالكم  يمشي وره الامريكان

عمو اوباما...الله يخليك كول لجماعتك المره القادمه خلي ينطون خبر لاي قرد من قرود الحكومه العراقيه قبل ما يسوون اي شئ...منريد واحد يسأل و يكول طرزوني المالكي شديسوي.. كاعد طرطور لو شنو

 

     

تذكروا و لا تنسوا

لكل من عنده شك باطماع احفاد كسرى و نزعتهم العنصريه  فلينظر الى الصورتين. فهذا ما تبقى من أيوان و طاق كسرى الذي اذلًه الله و انهى دوله الفرس على يد فارسنا الصحابي الجليل سعد بن ابي وقاص و في عهد سيدنا الفاروق عمر رضي الله عنه و الى الاسفل النصب الذي شيده الشاه و الذي ابى المعممون الا ان يحافظوا عليه و يعتبروه رمز من رموزهم و ليقيموا مناسباتهم الاحتفاليه تحت ظله. لاحظوا الشبه المقصود في ملامح التصميم بين الاثنين. فكسرى الفارسي في نظرهم لن يموت و بلاد فارس ستعود لتحكم العالم من جديد و هذا حلمهم

يا مالكي و من ورائك من فئران المنطقه الغبراء ان كنت رجلا فطالب الايرانيين بهدم نصبهم  كما طالبوك ان تهدم قوس النصر و تمثال ابي جعفر المنصور و نصب اللقاء و غيرها .ان كنت رجلا فطالبهم بذلك قبل ان تمس اي حجاره من نصب بغداد و ان كنت رجلا فدعهم يهدموا نصبهم و تماثيلهم ( هذا اذا استمعوا لك )  ثم قل لهم انك لن تمس نصب العراق...و لكننا متاكدين انك لن تتجرا و تقولها أو  تفعلها..فهم اقزام قورش و احفاد كسرى و لكنك لست بشئ من عمر و حاشا عمر ان تتشبه به.... لك الله يا عراق.... يا بلد الانبياء

   

و لله في خلقه شؤون

و عليً منكم براء

انفخوا حيل بس لا كلًش حيل

تذكرت المثل المصري " تنفخ بقربه مقطوعه " و انا أقراء هذا الخبر عن هذا النمًونه الذي يدعى بابو جندل و الذي يدًعي انه كان الحارس الشخصي للملًه ابن لادن. دعوني استعرض مقتطفات مما قاله و ابين رأي جنابي الشخصي لحضراتكم

يقول ابو صندل هذا انه كان الحارس الشخصي لبن لادن في الفتره  من سنه 1996 الى عام 2000...زين خلًي نكمًل يقول ابو صندل هذا " وقال في معرض حديثه كان علي أن أقوم بإطلاق النار على رأس الشيخ أسامة بن لادن في حال تعرض لعملية أسر من قبل القوات الأمريكية " لقد رفضت المهمة في البداية ولمدة أسبوع إلا أنني قبلت في النهاية تحت إلحاح زعيمي الشيخ أسامة بن لادن الذي أمرني بأن أوافق على قتله دون تردد في حال وقع في كمين وكانت القوات الأمريكية على وشك أسره " ويضيف لقد كنت أدعو الله دائما أن لا يحصل ذلك وأن لا أتعرض لمثل ذلك الموقف الرهيب " اكو شغلتين احب اوضحًها ..الاولى ان الاستشهاد هو ما جل ما يصبو اليه اي مجاهد في سبيل الله...و ان قتل النفس حرام...لا ادري من اي باب يحق لابو صندل ان يقتل اسامه بن لادن و لماذا لا يقاتل اسامه بن لادن حتى الاستشهاد او ما اللذي يحول بينه و بين هذه الشهاده و ليش يتوسل لابو صندل حتى يقتله...ما دتشوفون اكو فراغ بين رجل الفيل و بين الارض. الشغله الثانيه هي ان اميركا غزت افغانستان في اواخر عام 2001 بينما ابو انعل هذا كان يعمل مع اسامه بن لادن قبل هذا التاريخ يعني ما ادري على يا قوات امريكيه كانت على وشك اسر جربوع الصحراء بن لادن...يمكن هسه دتشوفون الفراغ بين ارجل الفيل و الارض اخذ يتسع ..مو هيجي

يضيف الخبر" أبو جندل واسمه الحقيقي ناصر البحري ويبلغ من العمر 38 عاما ، يعيش في احد أحياء صنعاء القديمة القريبة من السفارة الأمريكية التي يحيط بها تواجد أمني كبير من الجيش اليمني ، وأسوار من الإسمنت المسلح لمنع السيارات المفخخة من الوصول إلى مداخل السفارة التي تعيش حالة استنفار دائم منذ أكثر من عشر سنوات ، ويلبس أبو جندل ملابس على الطريقة الغربية ، جينز وبلوزة وقبعة بيسبول "...زين شلون يعيش الاخ ابو صندل او اذا نصيحه باسمه الحقيقي ناصر الجرًي قرب السفاره الامريكيه و هو الذي كان متبنًي فكر القاعده و كان الحارس الشخصي للراس الكبير بن لادن..يعني الاميركان مسوين كل هالحواجز الكونكريتيه حول السفاره المحميه بشده و يتوقعون اعمال ارهابيه ضدها و الاخ ابو مدندل يعيش يم السفاره بدون ما الامريكان يعترضون...لا وشنو بعد ديلبس جينز و قبعه بيسبول وهو الغيور على الدين و المحب للجهاد و عدم التشبه بالاعداء ....اعتقد انتو هم مثلي بديتو تشوفون اكثر من فيل ديرتفع في السماء

خلًي نقره الخبر للاخير...يقول الخبر ايضا "وقال انه كان يشاهد منذ صغره كيف يقتل الإسرائيليون الفلسطينيين ويدمرون بيوتهم وكيف تقوم أمريكا بدعم إسرائيل مما شكل له دافع قوي ليعمل أي شيء ليساهم في الجهاد ضد الإسرائيليين والأمريكيين .وفي صبيحة أحد الأيام وبعد صلاة الفجر غادر ناصر البحري البيت في طريقه إلى البوسنة التي كانت تعاني من الإرهاب الصربي ، وكانت رحلة دون عودة حيث انه ساهم هناك في الحرب مع المسلمين " يعني المسأله مثل ما يكول اروح و اقتل كلب الجيران ولسبب ان ديكي يصيح من الصبح!!! فاكيد جيراني راح يجي و يكللي ..بابا لبيب ديكك اللي خابصنه شنو علاقه كلبي بالموضوع ......يعني القصد ليش يروح للبوسنه حتى ينتقم للفلسطينيين لو اخاف الاخ ما يعرف زين بالجغرافيا ...الفلسطينيون يعيشون في فلسطين ما ينرادلهه مدرسه ..و بعدين فلسطين مو اقرب من البوسنه و اذا انته متأثر بالوضع و تريد تقاتل اليهود ففلسطين على بعد شمره عصا وهم اليهود يحتلًون فلسطين ...و ازيدكم من الشعر بيت انه هذه الحرب حدثت عام 1999 يعني بعد ثلاث سنوات من ذهاب الاخ ابو مدندل الى افغانستان ..يعني التسلسل الزمني للاخ ابوصندل كله جذب و الشغله الثانيه هي ان حرب تحرير البوسنه حدثت بقياده الناتو مع امريكا يعني ابو مدندل جان ديقاتل تحت رايه الصليب هذا اذا سلمنا انه كان هناك يقاتل...شنو هاي ابو صندل يعني شويه رتب الكذب مالك احتراما لذكاءنا المتواضع و حتى تقلل عدد الافيال اللي دتطير

خلي نكمًل ويه ابو قرندل هذا...يقول الخبر"لقد كان ابن لادن يثق بي ثقة كبيرة جدا وقد كنت مسئولا عن قوة الحماية الشخصية المكونة من 50 مقاتلا غير أن من بين الخمسين لم يكن مسموحا للبقاء بالقرب من زعيم القاعدة سوى ثلاثة أشخاص ، شخصين وأنا ، وقد كنا نبقى معه مادام يعمل وعند النوم كنت احرس الباب بينما يقوم اثنان بحراسة البيت من جهات أخرى" زين ليش خمسين شخص لحمايه بن لادن و بعدين فقط ثلاث اشخاص هم من يستطيع الاقتراب منه...زين السبعه و اربعين بودي كارد وين متموضعين و على يا مسافه ؟؟ زين انتو وياه بالقراءه و النوم زين انتو نفسكم شوكت تنامون و تاكلون ...و بعدين بس اثنين لحراسه البيت من جهات اخرى.... شنو الظاهر هذا بيت مسطح ذو بعدين فقط ... والله بعد مدنشوف السماء من عدد الافيال

خلي نكمل و يه ابو صندل ..يقول صاحبنا في الخبر"الفرصة الذهبية للبنتاغون لقتل أسامة بن لادن كانت في العام 1998 بعد عمليات ضرب السفارات الأمريكية في نيروبي ودار السلام ، فقد قرر الشيخ تغيير مكان إقامته آنذاك ، وكنا في تارناك وقد سرنا حتى وصلنا إلى مفترق طرق وكانت الطريق إلى اليمين تذهب إلى معسكرات التدريب في خوست والتي إلى اليسار تؤدي إلى كابول وسألني الشيخ بن لادن أي طريق اقترح أن نأخذ وقد قلت بدون تردد إلى كابول وقد اخذ برأيي وبعد وقت قصير قام الأمريكيون بقصف معسكرات خوست بخمسة وسبعون صاروخا بعد أن قام مخبر للسي أي ايه يعمل مع القاعدة بإخبار الأمريكيين بأن ابن لادن قد غادر إلى معسكرات خوست وقد تم التعرف على العميل وهو أفغاني كان يعمل طباخا إلا أن زعيم القاعدة رفض قتله وتركه يغادر حتى انه أعطاه بعض المال حيث كان له أطفالا صغارا ، لقد كان بن لادن زعيما حكيما مستنيرا وكان دائم الابتسام رغم الصعاب والمخاطر" زين خلًي نناقش هذه الفقره...الاخ هنا طلع عرًاف و هوه اللي كان يقود ابن لادن و الدليل الطريق الذي سلكه بن لادن بناء على نصيحه الصندل...زين اكتشفوا المخبر و هو كان طباخا و تركه بن لادن يغادر...يغادر ماذا...اذا كان معهم فاكيد كان سيخبر الاميركان بتغيير بن لادن لوجهته..و اذا لم يكن معهم فاكيد كان سيفر عند فشل محاوله القتل...زين اذا ثلاث اشخاص فقط هم من يسمح لهم بالاقتراب من بن لادن...كيف عرف السيد الطباخ بوجهتهم مع العلم انهم وصلوا لمفترق الطرق ثم قرروا اين سيتجهون....حديقه حيوانات كامله دتطير و داعتكم

المهم ما اريد اطولهه عليكم و المقال كلش طويل بس راح اختتمهه بمناقشه هذه الفقره من المقاله و التي تقول " علي صوفان عميل في مكتب التحقيقات الفيدرالي زار أبو جندل وحقق معه ثم عاد إلى واشنطن وقال انه حصل على معلومات حيوية وغاية في الأهمية من السجين اليمني ودون الحاجة إلى وسائل تعذيب وكل ماكان يحتاجه ليجعله يعترف بضع علب من البسكويت غير المحلى لأن أبو جندل كان يعاني من السكري وقال صوفان انه حصل على كنز من المعلومات لا يقدر بثمن ، ولما سأل الصحافي الذي أجرى المقابلة مع أبو جندل عن صحة ذلك قال " إن علي صوفان يكذب ولم يحصل مني على أي معلومات ذات قيمة لقد أعطيته من المعلومات ما أريد ولو كنت تكلمت كما أدعى في تقريره لرؤسائه لما كانت القاعدة موجودة اليوم ، غير انه أراد أن يبدو كبطل أمام رؤساءه في مكتب التحقيقات الفيدرالي " مو شويه متواضع الاخ صندل هذا...لو تدققون في اجزاء المقاله في الرابط الذي وضعته لكم ستجدون انه يقول انه كان لا يعرف عن تخطيطات بن لادن لانها امور يعرفها المختصون بالموضوع فقط و من ضمنها تفجير برجي التجاره في امريكا...زين شلون يكول انه لو اعطى المحقق ما يعرف لما كان تنظيم القاعده له وجود هذا اليوم ...زين هوه اكو تنظيم القاعده اليوم الا في خيال هؤلاء المهرجين..و الشغله الثانيه هو ان الاخ طلع مريض بدنيا و يعاني من السكري...و الله اللي يقرا شنو سواه ابو صندل راح يكول هذا و لا سوبرمان... زين والله انت دتكدر تكمًز من دوله لدوله اخرى و من غزوه الى اخرى و في بلاد كافغانستان و البوسنه مثل الذيب  و انته عندك سكري اللي يحتاج الى ادويه و رعايه دائمه... و الله بالاخير آني اتوقع انه عميل المكتب الفيدرالي اكتشف ان ابو مدندل يعاني من الخرف مثل ما يعاني من مرض السكري و الدليل ان الاميركان تركوه يسكن جنب السفاره الامريكيه حتى يحلم عالطبيعه

طبعا راح اتركم تقرون المقاله بالراط اللي وضعته لكم حتى تقرون المهزله و تكتشفون المزيد من التهريج بانفسكم

هسه شفتو الربط بين هذه المقابله و بين المثل المصري اللي كلتلكم عنه...فهؤلاء و من ورائهم يحاولوا ان يجعلوا حجم تنظيم القاعده كبير و ان له وجود و اناس و حراس ..الخ فراحوا ينفخون و ينفخون و هم لا يدرون انهم ينفخون بقربه مقطوعه

ابو صندل حبيبي...آني سامع بهنود سود...هنود حمر...بس هاي اول مره اسمع بهندي بنفسجي

بغلنا غلب بغلهم

تره لا يروح فكركم لبعيد و عبالكم هذا البغل شايل بجيبه مفخخه ...قابل هوه حمار حتى يسويهه

يا جماعه الخير ما اعرف ليش هذوله الامريكان يعجبهم يصرفون فلوس هوايه . يعني الفلم الخير " افاتار" من عملوه صرفوا عليه ما يقارب النصف مليار دولار. و لكن الفلم نجح و حقق عوائد خياليه والمخرج فلت من عواقب وخيمه لو فشل الفلم. بس مثل ما يكولون مو كل مره تسلم الجره. هذا الاسبوع قريت خبر عن تصميم بغل آلي لصالح وزاره الدفاع الامريكيه . يقول الخبر

شرعت وكالة المشاريع البحثية الرائدة لدى وزارة الدفاع الأمريكية في تصميم جهاز روبوت على شكل "بغل" سيخصص لنقل شحنات إلى حيث يوجد جنود أمريكيون وعناصر من قوات مشاة البحرية "المارينز"، حتى في أكثر المناطق الوعرة مثل أراضي أفغانستان

وخصصت الوكالة مبلغا قدره 32 مليون دولار لشركة "بوستون دايناميكس التي تكلفت بإعداد رسم تخطيطي دقيق لمظهر الروبوت وبناء نموذجه التجريبي وتقدير كلفة إنتاجه

ويتعين على الشركة التي في حوزتها نموذج مشابه بحجم كلب كبير، أن تنجز هذا العمل خلال 30 شهراً فقط، وفقاً لما نقلته وكالة الأنباء الروسية "نوفوستي

ولا يحتاج "البغل" الروبوت إلى سائق لأنه سيستخدم أجهزة استشعار ونظام تحديد الموقع العالمي، بحسب ما ذكر موقع الشركة على الإنترنت

وبعد إنجاز المرحلة الأولى من تصميم الروبوت وصنعه ستقوم وكالة المشاريع البحثية الرائدة وسلك مشاة البحرية الأمريكية بتحليل النتائج وتخطيط المراحل اللاحقة لتطوير المشروع

يعني الحقيقه حيرني هذا الخبر. يعني كل هالبغال اللي بهاذي الدنيا و الجماعه راح يصرفون ملايين حتى يصنًعون بغل. يعني جماعه افغانستان صار الهم قرون مدبريهه على ظهور البغال العاديه في كل مناطقهم الوعره و ماكو احد راح الى شيخ العشيره و كاله " يا طويل العمر...البغال ماله صايره نستله و ما تدقبل تمشي بالمناطق الوعره و لهذا لازم نفكر ببغل ميكانيكي " و لا جماعه القجغجيه بشمالنا الحبيب فكروا فد يوم انو يبدلون البغل العادي ببغل اوتوماتيكي جان من زمان طار كاكه مسعود و ماما جلال. زين هذوله الربع في مناطق الجبال في كل انحاء العالم المختلفه محد منهم فكر بهيج فكره بغليه

مراجعه سريعه وييه عقلي فكرت شلون اقنع الاميركان انو فكرتهم هذه غبيه.اقصر طريق فكرت فيه هو ان اذكر لهم بعض نماذج البغال و ما تستطيع ان تقدمه لوزاره الدفاع الامريكيه من خدمات دون ان تصرف سنتا واحدا في تطوير اي جيل من اجيال البغال الاليه . و لاقناعهم فكرت بذكر بعض البغال المعروفه للربع الامريكي و التي قدمت خدمات جليله للامريكان و منهم

اياد بغلاوي

بغلال الصغير

ابغل الجلبي

جلال الباغلاني

عمار البغيل

بوغلي المالكي

هادي الباغلي

مبغول البرزاني

صالح المبغل

باغل صولاغ

عدنان البغيلي... تره الصوره اعلاه مو صورته في حاله شفتو القبعه و التبس الامر عليكم و عبالكم سداره الافندي 

مبوغل الربيعي

مبتغل الصدر

احمد ابو بغله

بغلي اللامي

بغيله سهيل

بوغيال الزيباري

و القائمه تطول .بغال قدمت و لاتزال تقدم خدمات جليله للمحتل و ماكو واحد بيهم يكول آخ او يحتاج ملايين الدولارات لتطويره و انتاجه. و كل هذه البغال تنتمي لجيل " ابو رغال فل اوتوماتيك " و بضمان طول العمر . و اذا اردتوا ان تعرفوا لماذا اطلقوا على المنطقه المحميه بالمنطقه الخضراء فهو في الواقع رمز للجت الاخضر الذي يتم اطعامه يوميا لهذه البغال

طبعا لايروح فكركم لبعيد و عبالكم دا اقلد...بالعكس تره البغل حيوان قوي و مفيد و رائع...و الحمد لله انه ما يعرف يقرأ مدونات...جان شبًعني بسط  

اجهزه رصد البلابل

أخوان....لا يهمكم اللي يكوله المحتل و اذنابه حول التقسيم العرقي و الطائفي و ان العراقيين من العرب في وادي و الاكراد منهم في وادي آخر. و الله اخواننا الاكراد بيهم ناس تخليهم على الراس. واحد من هؤلاء هو صديقي كاكه بختيار " هذا اسمه الحركي طبعا ". بختيار هذا كان معي منذ ان كنًا في الجامعه . و شاءت الاقدار ان نفترق... هو للشمال الحبيب و انا لاكل الزبيب. و لكنه والشهاده لله يزورني كلما سنحت له الفرصه و انا أفعل نفس الشئ.لا ينساني و لا انساه و يقوم بزيارتي وزياره كل الاصدقاء في بغداد من غير كلل و لا ملل و بالطبع لا ينسى ان يجلب معه لبن اربيل في كل زياره..طبعا احنى مكيفين بلبن اربيل مثل ما مكيفين بختيار و يمكن شويه اكثر

قبل ايام جاء زيارتي و كالمعتاد سالته السؤال التقليدي العراقي " شكو ماكو ؟" كال باع لبيب ولو انته مو واحد يكدر يحجيلك كلشي لانه تكعد تحللها و تدخلها من الف باب بس هم ميخالف راح احجيلك . الربع الامريكي تبرع لنا بممعدًات كلًش مطوره

سالته: معدًات شنو كاكه بختيار...لا تكولًي لبن اربيل راح يصنًع بتقنيه امريكيه

بختيار: شوف انتو عرب عدكم مخ ثخين...شنو لبن اربيل بتقنيًه امريكيه...باب تبرعوا لنا بمعدات رصد زلزالي

انا: يا زلازل تحجي عنها كاكه ...العراق يقع خارج حزام الزلازل يمكن شويه يطخنه من هالحزام شويه بس بالنهايه العراق باذن الله آمن من خطر الزلازل المدمًره

بختيار: يعني هيه اجهزه متطوره تقيس اي زلزال بالمنطقه حتى لو كان زلزال صغير

آني: يعني تقيس اي نشاط زلزالي حتى لو كان جنوب العراق او ايران او سوريا

بختيار: لبيب هسه بدأ عقلك يشتغل

آني: زين كاكه كمًل للاخير...و شلون هذه الاجهزه تسجل القراءات

كاكه بختيار: هذه الاجهزه تبث كل القراءات عبر الاقمار الصناعي الى امريكا...يقوم العلماء الاميركان بتحليل المعلومات ثم ارسالها لنا منسوخه على دي-في-دي لنحتفظ بنسخه منها في مركزنا على جبل ازمر في محافظه السليمانيه

آني: هلو كاكه هنا بدا الفار يلعب بعبي ...و بعد... منو متبرع بهاي الاجهزه كاكه

كاكه بختيار: الحقيقه لبيب آني هم الجريدي بدأ يلعب بعبًي من عرفت انو الاجهزه متبرًع بيها الجيش الامريكي

آني : بعدين كاكه بختيار...منو يدربكم على هالاجهزه

بختيار : همه الاميركان اكو غيرهم..و كالوا انو هذي المنظومه راح تنربط ويه بقيه المنظومات في الاردن و عمان و غيرها من دول المنطقه.

قلت لاخي بختيار: شوف كاكه...أذا هوه مشروع علمي ليش الممول يكون الجيش الامريكي. و ليش المستقبلات نصبت في امريكا و ليس العراق.

بختيار: و آني شمدريني...شنو شايف جنابي قائد بالجيش الامريكي حتى اكدر اجاوب على اسئلتك

آني: حشاك كاكه بختيار...بس راح اجيك لمربط الفرس...زين مو المفروض انو القراءات تؤخذ بالعراق و من ثمً يقوم علمائنا بترويج نتائج القراءات للجهات التي يهمها الامر و حسب تقدير علمائنا...صح

بختيار: يعني و لو آني اضوج من اتفق معاك بالرأي لانه انته واحد نقناقي بس كلامك صحيح

آني: شوف اغاتي كاكه بختيار...كل المسأله و ما فيها انو الجيش الامريكي نصب هذه المنظومه حتى يقرأ اي نشاط زلزالي في المنطقه...العلاقه هي انه اي تجربه مستقبليه لاي قنابل غير اعتياديه و التي تولًد نوع من الزلازل الصغيره سوف تتم قراءتها من قبل هذه الاجهزه و ترسل للجيش الامريكي الذي سيستطيع ان يحدد مركز الهزًه و سببها . هذه المنظومه ستغطي مناطق كبيره و ذلك لشده تحسس هذه الاجهزه لنشاطات زلزاليه غير اعتياديه. اذن كما يقول المثل الاميركان سيسمعون دبيب النمل في كل دول المنطقه

بختيار: و الله كلامك صحيح...بس هذه اجهزه علميه ممكن ان تفيد بقياس النشاط الزلزالي

فقلت له: كاكه...كلامك صحيح..بس وين اكو زلازل مدمًره  بالعراق...التكنولوجيا العلميه و مع الاسف تستخدم الآن للاغراض العسكريه و مثل ما تشوف كثير من التطبيقات التكنولوجيه مثل التفاعلات النوويه يمكن استخدامها للاغراض المدنيه و العسكريه على حد سواء يجوز انه غرضهم شريف بس التجارب علمتنه انو لازم ندقق بكل الاحتمالات

بختيار: هذوله الاميركان ما يسوون شئ لوجه الله. و الادهى من ذلك انهم يرسلون ما يختارون من القراءات لنا و لكن احنا مندري هل هم دزًوا كل القراءات لو بس اللي يريدونه نشوفهه.

فقلت له: بالضبط كاكه

فقال لي: و فوق كل هذا حكومه الاقليم تزرع هذه المتحسسات في اي مكان يريده الاميركان

فانهيت حديثي بقولي: شوف كاكه...كان لازم نوجه ارسال الاشارات من هذه المتحسسات لمركز مبني في العراق...انا لا اقول ارفضوا التكنولوجيا الامريكيه بل يجب ان تكون تحت سيطرتنا...و اذا كان غرضهم نبيل فالمفروض انهم يقبلوا بهذه الشروط خدمه للعلم كما يدًعون و قراءه و تحليل و توزيع المعلومات يجب ان يكون من خلال علماؤنا. و فوق كل هذا لا أدري ما المعلومات الاخرى التي يمكن لهذه الاجهزه قراءتها و التي يستلمها الامريكان دون عن غيرهم؟

هنا قام كاكه بختيار مودعا لزياره المزيد من الاصدقاء و قال لي...شوف لبيب مو خساره بيك لبن اربيل اللي اجيبه اللك في كل زياره .بس كل ما اجيك و الجريدي يلعب بعبًي من فد شئ تطلعني من يمًك و الجريدي كبر و صار جمل بس صدك لازم نسأل الف سؤال عن كل جهاز او منظومه او شبكه تقترح اويتم التبرع بها من قبل الاميركان حتى نعرف ليش همه يريدون يقدمون مثل هيجي خدمات

فقلت له: كاكه انت و لبن اربيل على راسي من فوك بس سؤال واحد محيرني

فقال صديقي بختيار: شنو سؤالك لبيب

فقلت له: يعني انته من سليمانيه ...ليش متجيبلي لبن سليمانيه..ليش دائما تجيبلي لبن اربيل

صديقي بختيار عافني و هوه يهز بايده و يكول... لبيب ...مو صوجك...صوج اللي يجيبلك اللبن

الى محبي دجاج الكنتاكي

أحمد ابو ريشه و عمار الحكيم في حوار سري .."انقر" على الصوره

أخترت لكم

أغنيه أخترتها لكم ..انقر هنا للمشاهده

لقطه من فلم نهايه الاسبوع مع الشرح المفصًل

أضغط على الصوره للتكبير..لاحظتوا ما كو مترجم

متحف تحفه لتحف لا تحفها اي شبهه

 حلوه كلش... الحك آحوسمها قبل ما يشوفها عادل زويه أو عمار اللئيم

خبرنا لهذا اليوم يقول

تسلمت جمعية ضحايا القصف الكيمياوي ومتحف حلبجة نسخة من شهادة وفاة المجرم علي حسن المجيد والقلم الذي وقع به قرار الاعدام بحقه، للاحتفاظ بهما في المتحف. وقال رئيس ملف قضية حلبجة في المحكمة الجنائية العراقية العليا كوران ادهم: ان "اللجنة عرضت على أسر ضحايا قصف حلبجة بالغازات الكيماوية القلم الذي وقع به القاضي عبود مصطفى حكم الاعدام على المجرم علي الكيمياوي ونقل الى متحف الذكريات في مدينة حلبجة".

واضاف ادهم في تصريح صحفي "استلمنا ايضا نسخة من شهادة وفاة الكيمياوي واهديناها الى أسر الضحايا وجرى نقلها للمتحف"، مشيراً الى ان لجنته تنتظر حكم محكمة الاستئناف في قضية حلبجة وعند اصدار الحكم "سنهدي نسخة من لائحة الحكم الى الجمعية".

من جهته، قال نائب رئيس جمعية أسر ضحايا القصف الكيمياوي في حلبجة آراس عابد في تصريح نقلته وكالة السومرية نيوز: ان "الجمعية استلمت شهادة وفاة علي الكيمياوي وستحتفظ بها بمتحف ذكريات أسر الضحايا، اضافة الى القلم الذي وقع به حكم الاعدام، كما سيحتفظ المتحف بالثوب الأسود الذي ارتداه رئيس فريق المحامين اثناء جلسات القضية

انتهى الخبر

ما أدري اللباس الداخلي مال القاضي اللي نطق بالحكم وين راح يخللوه . و ما أدري اذا يريدون يحتفضون بقوطيه البيبسي اللي جان المصور اللي صور وقائع المحكمه ديشربها . و الله آني نصيحتي انو جواريب حاجب المحكمه هم تسوه الواحد يعرضهه. زين اللي نفذوا الحكم ليش خطيه ما لهم ذكرى. يمعودين على الاقل لو تخلًون بهالمتحف التحفه فرشه الصبغ اللي الجلاد اللي نفذ الحكم لمًع بيهه قندرته يوم التنفيذ حتى جماعه الجلادين يكونون ممنونين الكم

و الله آني هم دا أفكر أذا انكشفت هاي الغمًه عن العراق يمكن نسوي متحف على غرار متحف اخواننا الاكراد و الحقيقه دا أفكر شنخلي بيه.   أقتراحاتي هي كالاتي

 أول دينار اردني من ملايين الدنانير اللي دخلت جيب الدكتور القديس أحمد الجلبي " بالحلال طبعا " بشرط ان لا يكون الدينار المهدى من قبل دكتورنا للمتحف مزوًر

 القميص الي جان لابسه هادي العامري عندما اصدر أول تعليماته باغتيال كفاءات العراق و ضباطه و طياريه و تفجير المخخات بين العراقيين " سنًه و شيعه " لشحن الاحتقان الطائفي

 الفانيله الداخليه لجلال الدين الصغير في أول اجتماع له مع فرق الموت

نعال نوري المالكي اللي كان لابسه يوم اللي وقع حكم الاعدام على صدام حسين و المشط اللي مشط بيه شعره في ذلك اليوم

 عقب آخر جكاره دخًنها عبد العزيز الحكيم في آخر اجتماع له مع ولي الفقيه علي خرائي لتلقي تعليماته باستهداف شيعه آل البيت و اتهام السنه بذلك و عقب اول جكاره دخنها بعد مطالبته بتاسيس أقليم الجنوب و قيطان القندره اللي جان لابسهه حين مطالبته العراق بدفع تعويضات سخيه للوطن الام أيران جرًاء اصرار الخميني على الاستمرار بالحرب مع العراق

 سداره عدنان الدليمي بعد تصليح بوصلتها

 فرشاه اسنان مثال الالوسي عند اول زياره له لتل ابيب

 دكمه من قميص الدكتور اياد علاوي عند اول اجتماع له مع بول بريمر للتباحث حول هدم العراق

دريل عمو صولاغ 

بعض الريش من ذيل عميل الانبار أحمد أبو ريشة

 ثلاث شعرايات و نص من لحيه محبوبنا السيستاني اقتطعت في نفس لحظه تحويله لاموال الخمس العراقيه الى بلده الام

 طابوقه و نص من احد البيوت التي استولى عليها عادل زويه

 احد شورتات عمار الحكيم الداخليه عند اول لطميه له في النجف بعد الاحتلال الامريكي

 أحد المخطوطات العبقريه للعلامه الدكتور علي الدباغ عند اكتشافه لنظريه البيسكلات المنفجره في فراغيه الكون المتولده من اندماجيه حليب المجرًه مع غبار الزهر الكوني عند اجتيازه حاجز الثقب الازرق ...و من المفضل ان يعرض له اخر شيش كباب قام علي الدباغ بايصاله للزبون قبل نيله شهاده الماجسغير لدماغسزيه العصر ما ادري بيا موضوع 

 استكان الشاي اللذي كان حصيني الشهرستاني يتزقنبه حين التوقيع على اول عمليه تهريب للنفط للعزيزه ايران شراكه مع عمار الحكيم و بمساعده جماعه بدر و مخطط لاول قنبله نايترونيه من تصميم الحصيني و التي رفض اعطائها لصدام خوفا على الامن العالمي

 شريط صوتي للسيده نرمين عثمان في احد حالاتها النادره و هي تلفظ جمله عربيه بدون ان تدخل فيها اي غلطه مطبعيه باللغه الكرديه

 عصا ماما جلال قبل ان يكسرها على راس نوشيران مصطفى

شهاده الدكتره مال عبقرينا شاهبور الربيعي أذا كدرنه نلكيهه

 شهاده الدكتوراه بمرتبه أمتياز في تقليم الشوارب و الاضافر التي حصل عليها من دار ايف سان لوران – فرع قم  و بفخر السيد مقتدى الصدر

بشرفي راح يكون متحف تحفه بس لو نكدر نحط بيه صوره لكاكا مسعود و هو يرتدي الدشداشه و العكال العربي

الرحمه على جميع ارواح  اخواننا و اخواتنا من شهداء حلبجه التي لا تستحق  ارواحهم ان يتاجر بها لاغراض انفصاليه و لعنه الله على كل من تسبب بقتلهم   و قتل أي عراقي بغير وجه حق