2010-01-20

منعرف باجر المن راح يلزمون



و الله يا جماعه اني تفاجأت عندما قرأت خبر القبض على "والي ولاه العراق" . تخيلت نفسي كاني أشاهد فلم ديني قديم أو مسلسل تاريخي على غرار مسلسل هارون الرشيد او الناصر صلاح الدين او ما شابه. الظاهر ان جماعه القاعده متأثرين بهذه المسلسلات و الافلام " على فرض ان الافندي قاسم عطا يتكلم صدقا وان هناك شئ اسمه دوله العراق الاسلاميه او هناك والي كاللذي قبضوا عليه ". الحقيقه أول مره اسمع بمنصب بوالي الولاه هذا....العفو ليش كم والي اكو بالعراق ؟؟


يقول قاسم عطا ان والي الولاه هذا قد اعتقل ضمن خليه تابعه لتنظيم القاعده مكونه من 4 اشخاص .زين هيجي واحد بهذا المنصب المهم مثل والي ولاه دوله الالف عمامه و عمامه يحيط به 3 اشخاص بس...مو شويه غريبه..زين من جانوا يطلعون الرجل الوطواط الزرقاوي بالتلفزيون شفنه وياه كومه زلم...زين هذا الرجل اللي يشغل منصب واااالي ولاه العراق و مكمشوا وياه غير 3 اشخاص بس...شنو البقيه وين راحوا...عدهم عطله راس السنه لو جانوا رايحين مسواك لو شنو.. والله اعلم يمكن واحد من اللي كمشوهم كان ( طاهي طهاه العراق) حتى يطبخ اكل للوالي ماله

و فوكاهه يكول ثارم عصا ..اسف قصدي قاسم عطا ان من بين الاربع اشخاص هناك شخص سعودي الجنسيه في بغداد ضمن الخليه التي تنتمي الى (دوله العراق الاسلاميه) زين ما افتهمنه اذا الدوله الاسلاميه هيه عراقيه زين شجاب السعودي بالنص

السؤال الاخر اذا الاخ اللي لزموه هو والي ولاه العراق زين ليش ما سموهه ( ولايه العراق الاسلاميه ) وليس ( دوله العراق الاسلاميه) ....مو يمكن جماعه ثارم عطا شطحوا شويه زايد هالمرًه

و يقول قسومي عطا ان الصماخ الكبير " والي ولاه العراق هذا " مسؤول مباشر عن العديد من الاعمال المسلحه التي شهدها العراق بما فبها العاصمه بغداد . زين اسمعوا العمليات التي ذكرها ثارم عطا عن هذا الارهابي

تفجير مقر الامم المتحده عام 2003 مع العلم ان هذا التفجير اعلن عن مسؤوليته عده جهات منها القاعده و جيش محمد و انصار الاسلام و انصار السنه و كل واحد زايعته الدنيا
تفجير صهريج مفخخ امام مركز شرطه الرشاد
تفجيرناقله للجيش العراقي في ديالى
تفجيرمواقف عمال في بغداد الجديده
الاشراف( يعني مو منفذ ) على تفجير ناقله للجيش الامريكي.. منعرف وين
مسؤول عن حلقات المفاوضات مع ذوي المخطوفين الاجانب ..منعرف يا اجانب مخطوفين ديحجي عنهم ثارم عصا هذا


زين بشرفكم عدا تفجير الامم المتحده هاي اعمال و عمليات تليق بواحد بمنصب والي ولاه العراق...زين شنو العمل البطولي اللي يستحق ان يتقلد من اجله هذا الارهابي منصب والي الولاه . زين مو المفروض مثلا ان يقود هذا الوالي جحافل المجاهدين و ينزل دك بالجيش الامريكي و العراقي و يسوي بيهم شغلات تشيب لها الولدان على الاقل يحفظ هيبته امام اتباعه

و يقول ثارم عصا ان الوالي هذا كان يعمل طيارا بالخطوط الجويه العراقيه....شنو بالاكاديميه ديعلموهم يطيرون طيارات لو يطيرون رقاب ناس...هذا اذا سلمنا ان ثارم البصل عطا يقول الحقيقه

المصيبه الكبرى ان ثارم عصا يقول انهم اعتقلوا والي الولاه هذا في 26 حزيران من العام الماضي و يتفاخر بهذا الانجاز...زين اذا الوالي هذا جان ديشتغل من سنه 2003 بدليل ضلوعه في تفجير الامم المتحده وين جانوا زلم عطا كل هل 6 سنين المنصرمه

زين سؤال أخير....أذا انتم لزمتوا والي الولاه بجلاله قدره....زين منو اللي ديسوي كل هالتفجيرات الداميه الاخيره ؟؟؟

يابه ثارم البصل عطا....يمكن شويه احنه سود...بس مو الى هذه الدرجه هنود

2 comments:

  1. أنت وضعت يدك على الحقيقة. إن المؤلفين الذين تخيلوا (دولة العراق الاسلامية) بسبب اهدافهم المبطنة وعقليتهم السخفية ونظرتهم المتخلفة للعرب والمسلمين على انهم رعاة ابل فقط. كل ذلك يجعلهم يتصورون ان اسطورة مثل (دولة اسلامية) تعني بالضرورة : تخلف وجاهلية. ولهذا يستخدمون على السنة الممثلين المتخيلين كلمات جاهلية وعربية قديمة واذا صنعوا لهم افلاما فلابد ان يرافقها صهيل الخيل وصور الخيول الحربية تهرولمقتبسة من لقطات الافلام التاريخية والفرسان يرفعون السيوف. هذا في الوقت الذي يزعمون ان القاعدة تستخدم احدث الابتكارات العلمية واحدث السيارات وتستخدم احدث تقنيات الانترنيت !!

    مسألة قاضي القضاة ووالي الولاة والخليفة وامير المؤمنين الخ هي كلها تسميات تصب في هذا المضمون والمحتوى ويدل على العقلية وراء هذه الاساطير.

    ReplyDelete
  2. عشتارتنا....كلامك و الله ذهب صافي...المصيبه انه هناك من العراقيين من يساعدهم و يساهم معهم...و هناك ايضا من يصدقهم...توعيه القسم الاخير أمانه في اعناقنا جميعا...سلمت على التعليق

    ReplyDelete

اهلا بكل اصدقاء العراقي