2009-12-31

الجناح الطائر

الجناح الطائر هو اسم طائره شبح كان الالمان يطورونها لقصف المساكين الاميركان ايام الحرب العالميه الثانيه. قناه أمريكيه أعدت برنامج خاص عن هذه الطائره و قام فريق مختص ببناء هيكل كامل لهذه الطائره لاختبارها و لمعرفه مدى فاعليتها بالاختباء من الرادارات الامريكيه . الفريق هذا أستنتج ان 60-80%من جسد الطائره لن يرى على الرادارات و بالتالي كان سيعطيها عنصر المفاجأه في اي غاره جويه . محركها النفاث سوف يعطيها عنصر السرعه للتغلب على الطائرات الامريكيه و بالتالي ستكون اي معركه محسومه لصالح الالمان. كانت هذه الطائره ستخصص لقصف الاميركان و بالتالي قلب موازين الحرب " من حجيتله لابو فاضل جيراننا الي قاري تاريخ العالم ضرب ايد اب ايد وكال ليش مسواهه هتلر و خلًصنه من الاميركان " طبعا اكيد هتلر جان صار اضرب من الاميركان لو رابح الحرب بس هذا مو مربط فرسنه
البرنامج قدم الطائره على انها " لو نجح الالمان بانتاجها " لكانت قلبت موازين الحرب و لما استطاعت أمريكا و حلفائها أنهاءالحرب لصالحهم و تخليص العالم من بعبع هتلر و لكن الاميركان و لحسن الحظ انهوا الحرب لصالحهم و خلصوا العالم من شر النازيين. وين سامعين نفس القصه ؟؟؟ ها هسه أتذكرت...نفس قصه حرب العراق و اسلحه الدمار الشامل اللي ما لكوهه بالاخير
نرجع الى قصه الطائره الالمانيه. مره رحت الى طبيب أسنان فلته . هوه أجنبي من بريطانيا بس كلش حباب " لا عبالكم آني ساكن بالمنطقه الخضراء لو آني من جماعه الحواسم بس اثناء عملي مع احد الشركات الاجنبيه في الامارات تضررت اسناني نتيجه حادث و التأمين دزني على هذا الدكتور
المهم هذا الدكتور كان عنده واهس بالطيارات و كان من المهاره انه مختص بتجميع و اعاده تصنيع الطائرات المروحيه القديمه " سبع صنايع بس بخته ما ضايع " و انه يمارسها كهوايه " آني اكثر هوايه مكلفه لي كانت ركوب البايسكل
دكتورنا هذا سألته انا عن هذه الطائره . بعد ما بدأ يشتغل بحلكي وأتأكد انه ما راح أكدر أحجي أو اقاطعه انفتح مثل البوري و كام يحجي على هالطياره. قال الدكتور" والعهده عليه " انه أشتغل مع مهندس طائرات الماني عجوز بتجميع طائره قديمه . التقى بهذا العجوز في نادي هواه و محبي و مختصي تجميع هذا النوع من الطائرات " خما مثل جماعتنه بالكهوه و كاتليهه بشرب النركيله و الجكاير " و كان هذا العجوز مهندس يسكن في بريطانيا مع زوجته البريطانيه والتي استقر معها منذ زمن طويل
.
ما أطولهه عليكم المهندس العجوز كله لدكتورنا هذا انه هذه الطائره كانت عباره عن خرده طائره . كان الطيار لا يستطيع ان يتحكم بشكل عملي في حركاتها و لم تكن لها القدره على المناوره و اضافه الى ذلك فأن صوت المحرك كان يصم آذان الطيار فيفقده القدره على التواصل مع القاعده أو بقيه السرب لكون مقعد الطيار قريب من المحرك . و بالاضافه الى هذا فقد كانت وضعيه الطيار داخل الطائره تشبه وضعيه الانبطاح مما يفقد الطيار القدره على الرؤيه بشكل واضح و بالتالي تؤثر على امكانيه التحكم و المناوره
ساعه يحجي و آني حلكي مفتوح وهو يصلح أسناني و اتمنيت لو ما سالته . بالنهايه ختمهه بعد ما خلاني اتمضمض و اسد حلكي و كاللي . شوف لبيب هاي الطياره لا كانت راح اطير و لا كانت راح تكدر اتسوي شئ ." معناتهه كل حجي الاميركان طلع خرط". سبحان الله هالامريكان ما يبطلون كذب
بالنهايه شكرته على العلاج و على المعلومات اللي وضحها اللي و آني بدوري انطيته معلومه مهمه و كتله
شوف دكتور الاميركان دائما ايبينون للعالم على انهم منقذيهم واعلامهم يلعب دور مهم بهاي المسأله "طبعا جنت دا أحجي وياه بالانكليزي المكسًر مو بالعاميه مالتنه مثل مدا أكتبها الكم " و كتله ..دكتور مره اللخ اذا الاميركان رادوا أيورطوكم بحرب مثل حرب العراق اوكفوا بوجوههم و كسروا اسنانهم أذا اصروا انوا يجرجروكم وياهم" لا تسألوني شلون كلت يجرجروكم بالانكليزي" بس الله يعلم
فقال الدكتور" يا ريت نكدر نكسر اسنانهم جان صارت عيادتي عامره و اتزنكنت أكثر" طبعا كالهه بالانكليزي الفصيح مو بالعاميًه مالنا مثل ما آني كاتبهه

11 comments:

  1. زين حليت مشكلة الكتابة. ياريت تكبر الخط حتى ترتاح العين حين ترى الكلمات. اجعل الحجم (كبير) وليس (نورمال) . المواضيع شيقة ومهمة . سوف اضع رابط مدونتك عندي.

    بس لا تكسل . اذا وضعت موضوعا واحدا كل يوم ، يكفي.

    ReplyDelete
  2. ياريت تكبر عنوان المدونة واللوجو وتضعهما على الفراع الموجود خارج الصورة وبحجم اكبر. تستطيع ان تفعل ذلك من الاعدادات /قسم التخطيط/ الخطوط والألوان

    كبر الخط وربما غير نوعه. ولكن انصحك الا تغير في الوان المدونة لأنها تتخربط اليمين يصير شمال والشمال يصير يمين . ما ادري ليش.

    ReplyDelete
  3. شكرا على الملاحظات . لم أعرف كيف اضع اللوجو خارج الصوره . ساحاول مره اخرى

    ReplyDelete
  4. لبيب العراقي
    تمنياتي بالتوفيق اعجبتني مواقفك الوطنية الرامية الى قوة وحدة العراق والمستندة الى المنطق.

    ننتظر المزيد من مدونتكم وساقوم باضافتها الى الدليل على الفور.

    البرجوازي العراقي

    ReplyDelete
  5. ارجوا وضع اسم للمدونة
    اي في الــ
    SETTING
    فلو جربت فتح المدونة بمتصفح
    Google Chrome
    ستشاهد مربعات في مكان الاسم
    والبلوك لست يرفض اضافة مدونتك بسبب عدم وجود اسم

    ReplyDelete
  6. شكرا لللاخ البرجوازي العراقي على التشجيع و آني بخدمتكم و بخدمه عراقنا الحبيب

    ReplyDelete
  7. هناك أسم للمدونه و لكنه بالعربي لا أعرف ان كان المتصفح يستطيع الاستدلال على الاسم العربي . سأحاول ان أغير بال الخيارات لعله ينفع ولكن يمكنك اضافه المدونه عل ال "فايفورتس" لسرعه الاستدلال على المدونه أعدك باني سأحاول حل هذه المشكله

    ReplyDelete
  8. شوف عزيزي

    ارسلت لك على البريد صورةرأس الصفحة والعنوان وقد عملتها على الفوتوشوب ياربي تعجبك.وسأذكر طريقة وضعها على الموقع. اذهب الى بريدك .

    ReplyDelete
  9. استاذتي عشتار

    ممتن جدا جدا للمساعده و أقدر وقتك الثمين لانتاج و أرسال الصوره و بوركت يدك .وضعتها على راس المدونه و أعتز انها من أنتاج عشتار العراقيه. آسف على بطء الرد و لكن كانت عندي مشاغل و لكني سوف أعاود الكتابه و التعليقات بعد غد ان شاء الله . جزاك الله خيرا عن المساعده الاخويه من جانبك . أخوك لبيب العراقي

    ReplyDelete
  10. معود ماكو تعب. اعتبرها هدية العام الجديد. وكل عام وانت بخير.

    ReplyDelete
  11. و انت و كل العراقيين الشرفاء امثالك بالف خير... شكرا جزيلا

    ReplyDelete

اهلا بكل اصدقاء العراقي