و الله يا زمن....خليت الضفدع يغني اوبرا

الى حد الآن و المالكي غير مصدق ان نتائج الانتخابات كانت لصالح اياد علاوي...و الله حقًه....كل الاموال المصروفه لتزوير الانتخابات و كل الناس المجيشه لهذا الغرض و بالاخير....يروح الكرسي لاياد علاوي...بس لا تخاف مالكي...خالو خامنئي اكيد مراح يتركك لوحدك...معقوله يخلي اياد علاوي يجي و يكشف المستور . انته بس ادعي و شوف بركات السيستاني شلون راح تجيك

و انتم يا من ترقصون لاياد علاوي...لا تحلموا كثيرا ان علاوي سيجعلكم تاكلون الشهد...كثره الاحلام احيانا تسبب الخرف

و كل انتخابات و انتم بخير

السرسره الذاتيه لواحد كلكم تعرفوه

دشوفون اخونه بالله  شكد فرحان...ما ادري على شنو 

استجابه لرغبه برجوازينا العراقي بقراءه السيره الذاتيه للبروفيسور حصيني الشهرستاني " ما اعرف شوكت اترقى الى بروفسور " وضعت لكم رابط السيره الذاتيه للدكتور الشهرستاني و ها انا ذا اقراءها معكم و بصوت عال" صوتي لونه احمر" و بعض الروابط  باللون الازرق من مدونه مبدعتنا عشتار العراقيه ... و افتخر يا احتلال  بهكذا بشر

اسمه الكامل حسين بن ابراهيم الموسوي الشهرستاني " حلوه هاي الموسوي...حتى يضحك على المساكين" الذي يعتبر واحد من اهم عشره علماء ذره في العالم  " اكيد بعد انشتاين-انريكو فيرمي - حمديه صالح و بناتها السته...لعد شعبالكم "  من مواليد كربلاء (110 كيلو مترات جنوب بغداد ) في الخامس عشر من اغسطس عام 1942  " هاي اغسطس يعني آب بس هاي بس تنكال لعلماء الذره العشره الاوائل في العالم "  و تخرج من مدارسها وواصل دراسته الجامعيه في موسكو و انكلترا وكندا

و اقترن في عام 1971 بامراه كنديه كانت قد اسلمت قبل زواجها "يعني مهمه هاي قبل زواجها لغرض في نفس يعقوب " و نقل في عام 1971 الى جامعه الموصل ثم الى جامعه بغداد لرفضه الانتماء لحزب البعث... هاي شلون عقوبه خمس نجوم ...نقل الى اعرق جامعتين في العراق.....زين شلون الحكومه ما عاقبته و رفضت ارساله الى كندا لاكمال الدكتوراه....ليش انتظرته الى ان يرجع و بعدين تعاقبه عقوبه خمس نجوم

و عين في عام 1974 رئيسا لقسم النظائر المشعه في لجنه الطاقه الذريه " ما افتهمنه بعده هوه متعاقب لو شلون الحكومه رضت عنه " و منح في سنه 1979 لقب مستشارعلمي لرئيس لجنه الطاقه الذريه بعد ان نقل اليها في العام نفسه.. لحد الآن ما عرفنه شلون الحكومه البعثيه الظالمه قَبِلت ان يصل الدكتور الحصيني الى هذه المناصب و هو المعارض للانتماء لحزب البعث....ثم هذا شلون ارهاب من الحكومه اللي دتعاقب الحصيني بترقيته الى هذه المناصب.....و الله افتر الديلكو عندي

زجه الطاغية صدام في سجن أبو غريب عام 1979 بعد أن اعترض على المساهمة في صناعات عسكريه للذره ... يعني الامريكان بعد ما دخلوا العراق لم يجدوا لا اسلحه نوويه او اسلحه كيميائيه او اسلحه دمار شامل....يعني يا قنابل هاي اللي رفض الحصيني ان يتعاون في صناعتها ....شنو هذا الوز اللي يزرع ركي .. و تمكن من الهروب من السجن الى ايران عام 1991 في اخطر عمليه هروب ... بعدين راح تقرأون عن عمليه الهروب الكبير لهذا الصغير 

وهو حاصل على شهاده الدكتوراه في العلوم النوويه من جامعه تورنتو الكنديه في مطلع عام 1970 و عاد الى العراق و التحق في مؤسسه الطاقه الذريه العراقيه كباحث مسؤول عن برنامج بحوث في قسم الكيمياء يعرف بالتنشيط النيتروني و هي طريقه نوويه حديثه في ذلك الوقت تستخدم للكشف عن العناصر ضئيله الوجود في مختلف المواد و قد استطاع ان يطور خلال دراسته للدكتوراه طرقا نوويه جديده للكشف عن هذه العناصر التي قد تكون مهمه جدا لعلاج الامراض " الله يشفي هذا الحصيني من مرض الخرف....هل قرا او شهد احدكم اي انسان عولج باستخدام طريقه الحصيني ابو العلوم لشفاء الاسنان و البلعوم ؟ما اعرف اذا كانت هذه النشرات و البحوث منشوره في اي من المجلات العلميه الرصينه كمجله سوبرمان او ميكي ماوس

قصه هروبه من سجن ابو غريب

وضع في زنزانة انفرادية في سجن ابو غريب لمدة عقد كامل من عام 1980 إلي عام 1990 وتعرض خلالها للمراقبة في كل دقيقة لكسر ارادته.وبعد توقف الحرب مع ايران في آب (اغسطس) عام 1988 ولم تعد الجمهورية الاسلامية وفقا لحسابات النظام، خصمه الرئيس جري التخفيف عن السجناء المنتمين للحركة الاسلامية حيث سمحوا له بالاختلاط مع بقية السجناء "هسه قبل شويه قلتم انه وضع في زنزانه انفراديه لغايه 1990 و الآن قلًت هذه المده سنتين و صار يخالط السجناء في عام 1988 يلله ...عبًروهه...بقت على هذه" ، ويتذكر وجود مجموعة من السجناء ينتمون إلي حركة فتح التي يترأسها ياسر عرفات تم اطلاق سراحهم بعد توافق النظام مع قيادة المنظمة، ورأت قيادة المخابرات في السجن استخدام احدهم وهو علي عريان لتقديم الخدمات لهم كالطبخ والمكوي وصيانة السيارات، واصبح تدريجيا يتولي نقل الطعام إلي زنزانتي وفاجأه في احدي المرات قائلا (نحن نعرف عنك كل شيء. وانا مستعد لخدمتك حتي اذا كنت راغبا في الهرب من السجن) .. شكد هالحصيني مشهور بحيث حتى الطباخ يعرفه...ثم شنو علاقه حركه فتح الفلسطينيه بالحصيني و ليش يريدون يهربوه من السجن...شنو جانوا رايدين يصنع لهم سياره ذريه لياسر عرفات و على عناد اسرائيل لو شنو ؟؟؟

هنا يقول الدكتور الشهرستاني ان هذا الشخص اصبح موضع شكي اولا فقد كنت اعتقد بانه علي ملاك المخابرات، لذلك شكرته علي الخدمة التي عرضها علي. وحرصت لاحقا علي تطوير علاقتي معه وقررت اختبار نياته فطلبت منه تسليمي مفتاح باب الزنزانة التي سجنت فيها لاستنساخه فجلب لي المفتاح فعلا فاستنسخته واصبحت قادرا علي فتح الباب في اي وقت اشاء....شنو هاي...مو قلتم انه كان مراقب في كل دقيقه لكسر ارادته....زين شلون يفتح الباب و يخرج في اي وقت يشاء... لازم كان يشرب اختراعه الاخير و هو  مشروب التخفي الذري لاخفاء نفسه.....ها يا جماعه ...حسيتوا شئ ثكيل ديطير فات من فوق راسكم؟؟، لكن ذلك لا يعني ابدا توفير امكانية لهروبي فالزنزانة داخل قسم المخابرات اي داخل قسم الاحكام الخاصة في سجن ابو غريب....لعد ليش طلبت المفتاح اذا تعرف هيجي و يعني لانه الاخ علي جابله مفتاح السجن حتى يستنسخه صار موضع ثقه؟؟!!....شنو هالانجاز و الاعجاز من الاخ علي اللي خلله الحصيني يثق فيه....زين ليش الاخ علي ما استنسخ المفتاح للحصيني و جابله النسخه حتى يوفر التعب على الحصيني....و اين استنسخ الدكتور الحصيني المفتاح اذا هوه بالزنزانه الانفراديه.... هذا شلون حمار ديرقص باليه

ويضيف عندما سمح له بالاختلاط مع السجناء في ايار (مايو) 1990" هاي شنو ...اشو رجعنه لسنه 1990 كسنه الاختلاط مع السجناء...شنو هاللعب دكتور حصيني...مو قبل شويه غيرتوهه لسنه 1988 ...يمعودين استقروا على رأي.. وبدأت عائلته تردد علي السجن لزيارته واخبر زوجته بوجود امكانية لهروبه، خاصة بعد بدء القصف الجوي لبغداد وقيام مخابرات السجن بانزال ابراج الاتصال فاستنتج عزلتهم عن القيادة وفقدانهم امكانية الاتصال بالمناطق الاخري " اللي آني و التاريخ يعرفه ان قصف قوات التحالف ابتدأ في سنه 1991 يعني ساعه الاخ الحصيني مقدمه عن الوقت العادي فد كم شهر....و شلون عرف ان الابراج انزلت و كيف استنتج بعزله قياده المخابرات عن القياده العامه...و حتى لو ماكو ابراج اتصالات ليش شنو مجان اكو مراسلين و سيارات تروح و تجي...و شنو علاقه عزله قياده المخابرات بالبدء بعمليه هروبه...شنو لازم كاميرات المراقبه اللي تتبع الدكتور الحصيني مربوطه على راديو و تلفزيون القياده العامه اللي صدام جان شايلهم وياه وين ما يروح . عندها قلت لــ ((علي) الذي عرض علي المساعدة سابقا (هل ما زلت مستعدا لتهريبي من السجن؟) وعندما رد بالايجاب عرضت عليه خطتي....شلون فلم هندي ملون.... وفعلا سارت الامور كما خططت لها فقد ارتديت بدلة عقيد مخابرات دبرها علي لي وساعدني علي التسلل إلي خارج المبني الذي تقع فيه زنزانتي...لحظه دكتور حصيني...آني اللي اعرفه انه المخابرات جان لبسهم مدني و ماكو رتب على الاكتاف...يعني شلون صايره شكل بدله العقيد هذه...لازم هاي البدله بيهه ثلاث ايدي و اربعه ارجل...و ذيل بعد ان هيأ احدي السيارات المستخدمة من قبل المخابرات لنهرب بها والمعروفة للحراس وأجهزة الأمن بتبعيتها لضباط المخابرات من خلال ارقامها....يعني الحراس يباوعون على الرقم و يخلًون السياره تعبر...يعني حتى بالقوقاز ماكو هيجي فلم...و اذا الارقام هي الاساس شنو لزوم بدله " العقيد " اللي ما اعرف شنو شكلهه.. حيث تسللنا بهذه السيارة إلي خارج سجن ابو غريب ومنه إلي منطقة المنصور حيث تقيم عائلتي المتكونة من زوجتي واطفالي لنتوجه بعدها إلي مدينة كركوك في شمال العراق ثم مدينة السليمانية ومنها عبرنا الحدود إلي ايران...و كل هذا و لا احد تتبع الاخ الحصيني او اوقفه او اعترضه بالرغم من مئات السيطرات العسكريه بين مدن العراق و المعروفه لكل الشعب العراقي في ذلك الوقت....الا اللهم اذا كان الدكتور الحصيني تنكر بزي بغل او جاموسه حتى لا يجلب الانتباه

الجدير بالذكر إن الدكتور الشهرستاني كان قد اعتذر عن تولي منصب رئيس الوزراء في الحكومه العراقيه المؤقته التي اعلنت في حزيران عام 2004 و اوضح انه يفضل خدمه بلاده بطريقه اخرى ...و لو آني ما سامع بهيجي زلابيه زركه بس من قرات هذا المقطع طكيت من البكاء من التاثر بنكران الذات التي يتمتع بها الدكتور الحصيني

و للدكتور الشهرستاني مواقف علنيه برفض تدخل دول الجوار في شؤون العراق و باي شكل من الاشكال سواء ماديا او مخابراتيا او حتى تدخلا اعلاميا و دافع عن حق الشعب العراقي في ان يسود نفسه و يقرر مصيره و ينتخب من يمثله و حكومته و يضع دستوره بنفسه دون اي تدخل....صار لي ساعتين ادور  ويه عمو كوكل على هيجي تصريحات بس ما لكيت غير المواقف المخزيه للحصيني من سرقات النفط و عقود الشركات الفاسده و استجواب البرلمان له و وثيقه بخط يده يحض فيها على الاسراع بالاتفاق على الحقول العراقيه لاعتبارها حقول مشتركه  و يعطى جزء منها لبلده الام ايران....سوًد الله وجهك يا حصيني على هالسياده اللي تنادي بها

و اخيرا قيل في الامثال...اذا لم تستح فافعل كما فعل الدكتور حصيني...عفوا ...البروفسور حصيني

من خواطر فراشتنا المبدعه ريم قيس كبه

حينما تحسّ ُ انك تستحقّ الحياة .. ولكن لاشئ في الحياة يمنحكَ هذا الحق .... فانتَ عراقي

حينما تحسّ ان انسانيتك قـد سُـلبتْ منك .. وحياتـُك وحياة ُ اطفالكَ لم تعد تهم احداَ سـواك .. فانت عراقي

حينما تحسّ ُ بالمهانةِ لحظة تترك بيتك متوجّها الى اي كوكب في العالم .. خال ٍ من الموتِ والدم والخراب .... فانت عراقي

حينما تحسّ ُ انك عبارة عن تاريخ ٍ من الحروبِ والجروح ِ والخيبات ِ والموت ِ والغياب .. كلها مشي على الارض معك .... فانت عراقي

حينما تكون صغيراً في السن وتملؤك امراض الشيخوخة .... فانت عراقي

حينما تحسّ ُ انكَ – واطفالك – تدفعون ثمن اخطاءِ وعجرفةِ وظلم الآخرين .. بلا ذنب او سبب .....فانت عراقي

حينما يحترمك الآخرون ويتعاطفون معك .. ولكنهم يعجزون غالباً عن الوقوف الى جانبك ....فانت عراقي

حينما توجعك كرامتـُكَ حتى مع سائق ِالتاكسي الذي يأخذ منك اكثرَ من اُجرته .... فانت عراقي

حينما تحسّ ُ بالتحسـّـُر ِازاء نسمة هواءٍ تداعبُ خدّكَ ولا تداعبُ خدّ اُمكَ او اخيكَ اوصديقك ..فانت عراقي

حينما تحسّ ُ انكَ أمامَ لحظاتِ الفرح ِالحقيقيةِ تبكي .. وتجدُ نفسكَ مذهولا ً هازئاً امام الموت ..فانت عراقي

حينما يضحكُ الآخرون على النكاتِ الجميلةِ .. وانت لا تضحككَ سوى النكات الدامية .. فانت عراقي

حينما تحسّ ُ انك تحصي امواتك بشكل ٍ فـَـذ ..ولا تتنبهُ الى لحظاتِ الفرح ِالتي تمرّ بك.. فانت عراقي

حينما تحسّ ُ انك تموتُ ببطء .. والآخرونَ يزدادونَ بهاءً .... فانت عراقي

حينما تحسّ ُ انك اهمّ "عزيز قوم ٍ ذل" فوقَ الكرةِ الارضية .... فانت عراقي

حينما تحسّ ُ بالجوع .. وانت تمتلكُ ذهبَ الأرض وعناية َالسماء .... فانت عراقي

حينما تتحوّل حياتك الى كتلة ٍ من الأعصاب الملتهبة .. وتثور لأيّ سبب .... فانت عراقي

حينما ينتابكَ الحقدُ لأتفه ِالأسباب وانت تمتلكُ حباً يغطي الكرة َالأرضية .... فانت عراقي

حينما تحسّ ُ انك تكرهُ كلّ شئ حولك .. وما ان تغادرَ بلدكَ حتى تعشقَ تراب الشارع ِ الذي كنت تمشي عليه .... فانت عراقي

حينما تحسّ ُ ان كل بلدان العالم الجميل لا تساوي جلسة َسمر ٍعلى نهر ٍ عظيم ٍ اسمهُ : دجـلة .. فانت عراقي

حينما تكون بعيداً .. وتحسّ ُ بوخز ِالضمير ِوانتَ تستمعُ لأخبار ِالعراق .. بدل ان تحمد الله على سلامتك من الموت .... فانت عراقي

حينما يستفزك الحنين – حتى وانت في قعر دارك – لحظة تسمع " حسين نعمة " .... فانت عراقي

حينما تمشي بخيلاء ٍامام َالآخرين .. وتنكسرُ امام مرآتك .... فانت عراقي

حينما تخسرُ عزيزاً او صديقاً او فرصة ً او وظيفة ً او نقوداً او حاجة ً ما .. وتحسّ ُ ان ذلك حدث فقط لأنك انت .... فانت عراقي

حينما تحسّ ُ – ولو مجرّد احساس – انك تعرف كلّ شئ عن الآخرين .. وهم لا يعرفون عنك اكثر مما تنـقلهُ الأخبار .... فانتَ عراقي

حينما تحسّ ُ انك وحدك تفهمُ ما يدور .. ووحدكَ تقفُ متصدّياً ومتحدياً وساخراً وزاخراً بالخسارت ومستـَلـَباً من انسانيتك .... فانت عراقي

حينما تحسّ ُ انك روبنسن كروزو .. ولكي تعيش .. فانت مستعد ٌ لفعل ِاي شيء وكل شيء في كل مكان .. الا ما يمسّ كرامتك .... فانت عراقي

حينما تحسّ ُ ان سوءَ الطالع ِيلازمك .. وتجتهدُ وتتفانى وتستبسلُ للحصول ِعلى ابسطِ الاشياء .. وفي النهايةِ .. قد تحصلُ على ما تريدُ .. وقد لا تحصل .... فانت عراقي

حينما تفكـّرُ ان تنفدَ بجلدكَ من الارهابِ ومهرجاناتِ الدم اليوميةِ في بلدك .. وما ان تواجه الآخرين حتى يقال عنك بأنك ارهابي .... فانتَ عراقي

حينما تقفُ بالطوابير امام مباني السفاراتِ العربيةِ والعالميةِ والكونيةِ والفلكية .. وكل من يقفُ قبلك او بعدك يأخذ تأشيرتهُ .. الاكَ انت .... فانتَ عراقي

حينما تحسّ ُ ان كلّ يوم ٍ يمرُ بك هو اسوءُ من الذي سبقه .. وكل يوم ٍ مضى هو احسنُ مما سيجيء .. ومع ذلك تقول : الله كريم .... فانتَ عراقي

حينما تحسّ ُ انك لم تعد تستحقّ ُ الحياة .. ولكنك – مع ذلك – لا تنتحر .... فانتَ عراقي

وان كانت غيمه الحزن تظلل هذه الخواطر و لكن يبقى الامل موجودا ....و كل عراقي يجب ان يعرف ان لا شئ سيغير حال العراقي......الا العراقي نفسه

تخاريف تالي الليل

اليوم شعرت بالضجر فاخذت اقلب صفحات الانترنت و اذا بواحده من الصفحات تنقلني الى موقع الناطق الرسمي للحكومه العراقيه و هوب .....الى صفحه السيره الذاتيه للافندي.  حبيتكم تطلعون عليها معي مع بعض التعليقات المنصفه من قبل جنابي و المؤشره باللون الاحمر

تقول سيره الافندي الذاتيه

تاريخ الميلاد: 1955 كربلاء

العنـوان: بغداد- الكرادة: اكيد في بيت محوسم

اللغـات: الإنكليزية، الهندية، الفارسية والفرنسية : الحقيقه آني سامعه يحجي عراقي بتقاطيع وجه فارسيه و بمنطق هندي بس هاي الفرنسيه لا اعرف منين جابهه و لا شفت اي شئ يدل ان الاخ رقيق و بنبون و يحب الطبخ مثل الفرنسيين.....يلا خلي نعبرهه

المؤهلات

بكالوريوس هندسة مدنية – بغداد- 1977

دورات هندسية متقدمة في ادارة المشاريع : معرفنه اي نوع من المشاريع سوف يديرها الدكتور الدباغ. هل هي مشاريع بناء ام هدم ام مشاريع بيع الوطن

دورات متقدمة في الإدارة والمالية : هاي ما اعتقد انها ميزه كبيره يتفوق بها الدكتور الدباغ عن باقي قرود الحكومه لان لو تشوفون كل اعضاء الحكومه الغير موقره بدأوا بلا رصيد و انتهوا و في حساباتهم الملايين مما يدل على درايه متقدمه في الاداره الماليه....  بعضهم فاق حتى القديس الجلبي

دورات متقدمة في قيادة الأفراد: ما اعرف يا قياده يمكن للدكتور العبقري ان يقدمها اشو اعضاء الحكومه و البرلمان نصهم يجر بالطول و النص الثاني بالعرض الا اذا كانت المسأله تتعلق برواتبهم ومشفنه اي قياده لا من الدباغ ولا من غيره....مو صحيح دكتور

دورات مهنية وأكاديمية ومؤتمرات سياسية عديدة: هالمره بشنو

مؤهلات أخرى

ماجستير هندسة (تلوث البيئة)- امريكا 1983- : معرفنه من اي جامعه حتى نتأكد لو الدكتور متقصًد انو ما يخلي اسم هاي الجامعه الوهميه

دكتوراه أدارة أعمال- بريطانيا (عن طريق الأنترنيت عام 2003 ) : هاي شنو....طلعت الشهاده مال الدكتوراه من الانترنت...يمعودين حجي ماهود جاب شهاده دكتوراه باداره الحدائق من الانترنت و هوه حتى ميعرف يقرأ و يكتب. خلف الله على ابنه اللي جابله الشهاده من مقهى الانترنت اللي براس الفرع....و شلون صدفه... تحصيل شهاده الدكتوراه في نفس عام الغزو و كأن الدكتور عنده حاسه سادسه انه عام  2003  راح يكون عام خيرعلى كل خائن و كذاب و دكتور بالانترنت 

الخبرات

ثلاثين سنة في إدارة وتطوير مؤسسات كبرى وشركات مقاولات وأعمال حرة في دولة الامارات العربية المتحدة والدول الاوربية وكندا والصين وشرق أسيا : يعني هوه اتخرج سنه 1977 مما يعني ان الدكتور بدأ بتطوير و اداره الشركات من هوه جان خريج حديث لا يعرف بعلم الاداره اي شئ...بحياتكم سامعين بهيجي شئ هذا مع عدم الاخذ بنظر الاعتبار سنين الدراسه للحصول على الماجستيرو الدكتوراه و حضور المؤتمرات و الدورات المهنيه و المريخيه و ما الى ذلك....شنو الاخ مجان ينام و يشتغل 24 ساعه..لا و شلون...شركاته متوزعه من الصين الى كندا...شلون شوي كباب على سطح القمر

خبرة واسعة في قيادة الأفراد وادارة وتطوير مؤسسات تجارية وعلاقات عمل واسعة: هم رجعنه الى نفس النقطه اللي ناقشناها اعلاه بس هالمره ما ذكر الدكتورعن اي علاقات عمل واسعه يتكلم عنها...يمكن قصده علاقاته مع المخابرات الايرانيه

مدير شركه مقاولات كبرى لتنفيذ مشاريع مباني تجاريه و سكنيه و خدميه : بس نريد اسم شركه واحده و تكون معروفه و تليق بمقام الدكتور...و اذا عنده هيجي شركه ليش مراح الى مدينه الثوره او اي مكان من العراق و شاف شكد الناس محتاجه الى هيجي مشاريع...على الاقل يقدم بعض من خبراته الرهيبه لهؤلاء المساكين 

تخطيط استراتيجي وإعادة هيكلة شركات: لا مبين..... مثل ما تريدون اعاده هيكله العراق الى اقاليم

خبير وتاجر في التجارة الدولية والإتصالات وتجارة الأسهم والعقارات: هاي شنو !!!! شو صارت هالمرًه تجاره و اتصالات و اسهم و بورصه....شنو اكو مجال فات على دكتورنا الهمام و مشتغل بيه...هاي لاحظوا ان كل هذه الفعاليات و الدكتور مشغول و  ديطور بالمؤسسات الكبرى و الشركات الممتده من الصين الى كندا و حسب ما جاء اعلاه

علاقات واسعة مع سياسيين وأكاديميين وكتاب في مختلف دول العالم: و الله و لا يوم شفت الاخ طلع ديساعد مانديلا مثلا على المشي او ديحلق لحيه كاسترو من جان مقعد على فراش المرض او ديحاول يقنع كيم ايل بتسليم اسلحه كوريا الشماليه او حتى شفناه بملتقى اكاديمي و زار بعض المفكرين و الادباء العراقيين اللي ديعانون في بلاد المهجر كمظفر النواب او عبد الستار ناصر او بدري حسون فريد او غيرهم....لو علاقات الدكتور تتخطى حدود هذا الكوكب الى ما بعد عوالم مسلسل "ستار ترك" و الكابتن كيرك و اللي لسه الناس العاديه مثلنه ما اكتشفوهه 

خبرة في التحكيم الهندسي وحل المنازعات المالية: هاي خلتني احك براسي لمده نص ساعه

ناشط في الحقل الإجتماعي والتبليغ الديني والشأن العام: شو هنا صارت الموجه دينيه ...يعني الاخ باتري- كهرباء

مساهم رئيسي وناشط في العديد من الدول لمتابعة الشأن العراقي منذ عام 1980 في باكستان والهند وجنوب آسيا واوروبا وأمريكا الشمالية : الله يخليكم اريد واحد منكم يتذكر انه شاف الاخ بهيجي نوع من النشاطات قبل الاحتلال " هاي اذا هيه اكو هيجي نشاطات "  و ما اعرف ليش الاخ مجلًب بالهند و اللغه الهنديه

متابعة مشاكل ومعاناة العراقيين في المهاجر: هسه قبل شويه ذكرنا الادباء العراقيين اللي ديعانون بالمهجر و محد من الحكومه ديسال عنهم...يعني احد منكم شاف هذا الصغير و هو يتفقد اي من هؤلاء الكبار

كاتب مقالات عديدة حول الشأن العراقي: ما اريد احجي حجايه لا بعدين يزعل الدكتور

 محاضرفي العديد من الدول حول الشأن العراقي : اكيد باللغه المريخيه في فلم حرب النجوم ....بس مدا اذًكر باي لقطه شايفه 

محلل سياسي في العديد من الحوارات التلفزيونية حول الشان العراقي: يمكن في برنامج الكاميرا الخفيه

ناشط في مجال حقوق الأنسان: هاي اتركهه لحضراتكم حتى تضحكون على راحتكم

كشف جرائم النظام البائد وانتهاكات حقوق الانسان في العراق عبر ندوات ومحاضرات عديدة في جامعة لاهور (باكستان) وبنغلور (الهند) وحوارات مع سياسين وأحزاب عديدة في الهند، الباكستان، ايران، ماليزيا، الصين، كندا، هولندا، مصر، المغرب، سوريا، الاردن، لبنان، تركيا: هم جاب طاري الهند...مدا ادري ليش مجلًب بالهند...يمكن خطيه نايم براس الهنود و لم يجد احد غيرهم ليصدقوه او ليكشفوا كذبه 

عضو في العديد من الهيئات والمنظمات الدولية: آني عندي غير تعريف " للعضو"  اللي يناسب مقام الاخ الدكتور بس ما اريد اجرح مشاعر القراء 

أحد مؤسسي المعهد الاستراتيجي العراقي في واشنطن وهي مؤسسة خيرية من أهدافها المساهمة في نشر الوعي الصحيح في الولايات المتحدة عن الوضع في العراق ومساعدة المؤسسات العراقية في مجالات التعليم والتدريب داخل العراق والمساعدة على التخطيط الأستراتيجي للمجتمع العراقي: ارجوا من الاخوه طبع اسم المعهد الاستراتيجي العراقي في واشنطن في صفحه عمو كوكل و شوفوا اذا احد معترف بهيجي معهد

عضو الجمعية الوطنية العراقية ولجنة كتابة الدستور ولجنة العلاقات الخارجية: من هاي طاح حظ الدستور و العلاقات الخارجيه....بس لا تديرون بال...عدنه الدكتور الفطحل راح يصلًح كل شئ...انتو بس انتخبوه و شوفوا

وبالاخير بس حبيت اسأل وكاله الفضاء الامريكيه " ناسا "  اذا الاخ الدكتور مسجل كعضو فيها... رائد فضاء.... او حتى كنًاس....و الله من وراء القصد 

حتى لا ننسى هذه البطله

راشيل كوري (بالإنجليزية:Rachel Corrie، عاشت بين 10 أبريل 1979 - 16 مارس 2003 م) عضوة في حركة التضامن الدولية (ISM) وسافرت لقطاع غزه بفلسطين المحتله أثناء الانتفاضة الثانيه حيث قتلت بطريقة وحشية من قبل جيش الإحتلال الإسرائيلي عند محاولتها إيقاف جرافة عسكرية تابعة للقوات الإسرائيلية كانت تقوم بهدم مباني مدنية لفلسطينيين في مدينة رفح في قطاع غزّة

ملابسات حادثة وفاة راشيل ليست موضع جدل، حيث أكد شهود عيان للواقعة(صحافيين أجانب كانوا يغطون عملية هدم منازل المواطنين الفلسطينيين التعسفية) بأن سائق الجرافة الإسرائيلية تعمد دهس راشيل والمرور على جسدها بالجرافة مرتين أثناء محاولتها لإيقافه قبل أن يقوم بهدم منزل لمدنيين. في حين يدعي الجيش الإسرائيلي أن سائق الجرافة لم يستطع رؤية ريتشيل (المصدر: ويكيبيديا ) و لكن كما تعلمون فان الكذب هو ديدن اليهود. فقد كانت ترتدي القميص العاكس و كانت تصرخ  بالمايكروفون  و تقف بوضوح حيث يراها سائق الجرافه

زوروا هذا الموقع للاطلاع على تفاصيل هذه الجريمه

لا تنسوها.....و لا تنسوا الحبيبه فلسطين و ما يفعله اليهود هناك.. و الله فوق كل ظالم

من داخل قبه البرلمان

جاء وفد من الذين فازوا بالانتخابات الاخيره الى ماما جلال و قالوا له : الله يخليك ماما جلال....نرجوك ان تقبل تصيررئيس علينا...و الله راح نضيع اذا واحد غيرك استلمهه

ماما جلال: بس اخواني لازم انطي مجال لغيري...ميصير احتكر الرئاسه

الوفد: يمعود ماما جلال كول غيرهه...منو احسن منًك يصير رئيس علينا و يكون تاج راسنا للاربع سنين المقبله ...الله يخليك اقبل بمنصب الرئيس

ماما جلال: بس آني كنت مقرر اعتزل و اكتب مذكراتي مثل بيليه...حتى اختاريت اسم للمذكرات و هو "من ايام عمل الرئيس.. في اختراع دواء للفراكيس

الوفد: فدوه نروحلك ماما جلال...لا تخذلنا...حكومه انت مو رئيسهه ما تعتبر حكومه....من دونك احنه نضيع

ماما جلال: انتوا و الله دا تحرجوني...دخلًوني افكر بالموضوع

الوفد: دخيلك ماما جلال...ما كو داعي للتفكير....الله يخلًيك اقبل بالمنصب

ماما جلال : و الله دا تحرجوني....شلون شغله...مدا اكدر اشوفكم تتوسلون اكثر....زين دخلي استشير كاكا مسعود ونشوف شيكول

بالنسبه لمسعود البرزاني فقد كان يحتفل مع شله الحزب لفوزهم الساحق بالانتخابات و اثناء الاحتفال دخل عليه وفد من وجهاء كركوك

الوفد: كاكا مسعود...الله يخليك...هسه انت الله وفقك و فزت بالانتخابات...ارجوك لا تضيع حلم كل الناس اللي بكركوك بالانضمام الى دوله كردستان الكبرى

كاكا مسعود: و الله احنه راح نسوي اللي علينا و الباقي على الله و الاصدقاء اليهود

الوفد: الله يخليك كاكا مسعود...تره انت متدري شكد احنه نعاني كل يوم من نشوف الاعمار و الرفاهيه ترفرف على كردستان و احنه محرومين من هذه الرفاهيه لمجرد ان كركوك تقع خارج حدود كردستان الدوليه

كاكا مسعود: منو كال انتو خارج حدودنا الدوليه...الحكومه العراقيه هيه اللي استقطعتكم من دوله كردستان بغيروجه حق...لازم الفرع يعود للاصل

الوفد: كاكا مسعود....احنه سمعنه انه حكومه دوله العراق اقرت ان كركوك كرديه

كاكا مسعود: اكيد كركوك كرديه...دروحو شوفوا لحد الان كم شروال كردي مصنًع في دوله كردستان الكبرى قد تم تصديره الى كركوك ...غير معنى هالشي ان الاكراد موجودين بكثره في كركوك... و الا منو ديلبس كل هالشراويل....الخرفان لو البزازين

الوفد: و الله احنه سمعنه انهم يستخدمونها في تصنيع خيم لزوار العتبات المقدسه

كاما مسعود: شنو ؟!!!! و الله هسه احجي ويه عمار الحكيم و اشوف هالحجي صدك لو لا

عمار كان يجلس و الناس تأتي اليه و تقبًل يديه و قدميه و تتوسل اليه ان يقبل بالربع بدل الخمس...جاءه وفد من الناس و بعد اكمال مراسم التقبيل و التبجيل جلسوا و هم يتهامسون

عمار: هلا بالوفد من اهالي الجنوب الجالسين على بحيرات النفط ....عائلتي قدمت الكثير لكم و ما زالت...مائه و اربوووووطعش سنه من العطاء لاهالي الجنوب

الوفد: هذا صحيح مولانا....احنا نريد ان يعلن جنابك عن اقليم الجنوب و ان تكون رئيسا لهذا الاقليم

عمار: بس آني هنا لخدمتكم و بس...يعني آني ما طمعان باي منصب...آني بس اريدكم انتو تكونوا مرتاحين

الوفد: احنا مراح نرتاح الى ان نعلن عن تاسيس اقليم الجنوب برئاسه مولانا حجه الناس القشامر عمار الحكيم ادام الله طول دشداشته

عمار: اخواني ...آني هنا لراحتكم و خدمتكم...و جماعه المجلس الادنى يحييون مواقفكم الوطنيه هذه

الوفد: مولانا...و نريد نلحق اقليم الجنوب بجارتنا العزيزه ايران حتى نكون جزء من هذه الامًه العظيمه التي انجبت ناس عظماء كالسيستاني و الشهرستاني و الحكيمستاني

عمار: و الله يا جماعه ما اعرف شأكول...آني انسان متواضع و ما احب السلطه...اصلا جماعه المجلس الاعلى وكعوا على الرجلين حتى آخذ مكان الوالد قدس الله سر سن الذهب مالته من مات

الوفد: الله يخليك مولانا...تره روحنا معلقه بايران و بخالو خامنئي...الله يخليك..لا تحرمنا هذه الامنيه مثل ما حرمتونا من خيرات النفط...و بمناسبه النفط...قررنا ان كل خيرات النفط تروح لعائله الحكيم و احنه فوكاهه ننطيكم اموال الخمس....بس لا تحرمونا من بركاتكم

عمار: و الله ما اعرف شاكول...بس انطوني مهله دا افكر و استشير فلته العصر و الزمان اخونه هادي العامري

هادي العامري من جهته كان يقوم بزياره لمقرات فيلق بدر...و هناك جاء قائد الحرس الثوري الايراني ليهنأه باعاده انتخابه باغلبيه ساحقه فقال العامري: و الله كل هذا بفضل بركات السيستاني و خالو خامنئي...ما ننسه فضلكم علينا

قائد الحرس الثوري: اخونا هادي....احنه ما عدنه فضل عليكم...بالعكس انت ابو الفضل...لا فاتك طيار او ضابط او عالم او استاذ جامعي او دكتور اذا ما قدمت راسه هديه لجمهوريه النار الاسلاميه... و بالنهايه هيه الناس اللي انتخبتك و على عناد كل البعثيين....و لهذا راح نرقيك لرتبه شاهنشاه انذال العراق

العامري : اغا...و الله احرجتموني و اخجلتم تواضعنا

قائد الحرس الثوري : لا مو بس هذا....خالك خامنئي راح يخصصلك قصر قرب قصر الخميني بالجنه حتى تصير جيران رهبر خميني بيًض الله فانيلته يوم القيامه

العامري : و الله ما اعرف شأكول...يعني لو ما انتم جان هسه احنه نكرات و لا واحد يعرفنه...بس شوف الله شلون فرجهه...نسبه اللي يحبونا و انتخبونا فاقت المئه و عشرين بالمئه...يا ريت عادل زويه هنا و يسمع هاي الاخبار

الدكتور عادل زويه كان مشغول بمقابله وفد من اعضاء لجنه تحكيم جائزه نوبل و التي فاز بها لهذه السنه

اعضاء وفد جائزه نوبل: دكتور عادل انته كنت مثل اعلى للدكتور المثابر اللي كدر يحول الحراس الى حراميه في اقل من اسبوع...و اللي جمع ما بين اعباء الدكتره و نيابه رئاسه الجمهوريه و رئاسه حراميه بنوك بغداد و رئيس لجنه مصادره بيوت الناس و السكن فيها بغير وجه حق و حضور مراسم دفن عمو بابا و كل ذلك في وقت قياسي قصير و لذا نحن منحناك جائزه نوبل التنكيه لفلتات اخر عصر الامام الغائب و عصر برتقال ديالى

الدكتور عبد المهدي : و الله آني من قمت بكل هذه الاعمال الخيريه مجان قصدي اي جائزه...كل القصد كان خدمه ابناء بلدي....و هذه هي النتيجه...كل الناس انتخبتني بشكل لا يوصف و هنا انتبه ان كل اعضاء الوفد كانوا واقفين ...فاحمر وجه الدكتور خجلا و قال لهم

آسف ليش انتو واكفين...تفضلوا اكعدوا....اكعدوا.....اكعدوا.....اكعدوا.....دوًت هذه الكلمه في ارجاء قاعه البرلمان....استفاق جميع الحاضرين على وقع صراخ احدهم و هو يعوي و يصيح......كل اجتماع تقضوها نوم....اكعدوا...اكعدوا....راحت كل فلوسنا.....واحد كشًط كل فلوسنا من كنا نايمين و دنحلم احلام العصافير

هنا زمجر اياد علاوي قائلا....تاليهه وياك.....هم سويتهه بينه يا احمد يا جلبي....متكولولي هذا شلون كعد قبلنه...نكًد علينا كل الاحلام

ذيب و الله دكتور

نتائج الانتخابات العراقيه الحقيقيه

رشاقه رئيس الجمهوريه الدكتور ماكس العشتاري ادام الله ظل ذيله الشريف

بعد فرز الاصوات لجميع من صوًتوا و من لم يصوًتوا ظهرت النتائج غير متوقعه حتى بعد حشر الاوراق المزوره بين الاوراق السليمه ....الجميع لم يصدق عينيه....فاز الدكتور ماكس من غارعشتار باغلبيه الاصوات.....يا للهول......الكل كتب على الاوراق الانتخابيه  " نريده رئيسا علينا "  ارتعب كل الحاضرين...نتائج لم تكن متوقعه و كانت صاعقه لكل قرود الحكومه السابقه ....الدكتور ماكس....فعلتها يا قدر و اتيت بمن لم يكن على البال

فورا دعي الى اجتماع عاجل بين المتنفذين من قرود الحكومه و الاحزاب العميله . الكل اجمع ان هذه مصيبه ما بعدها مصيبه.....كل ما انجزوه و ما سوف ينجزونه لايران...لامريكا...و لانفسهم سيضيع هباء...بدا عمار اللئيم باللطم و البكاء " وهو المتمرس على فعاليه كهذه " هو يقول

اربوووطعش مره كلتلكم ديروا بالكم من هذوله المرشحين المستقلًين...متعرفون شراح يصير وياهم...و هاي النتيجه...هذا لا راح يقبل يلغف اموال الخمس...و لا حتى راح يقبل يحللها....و لا حتى عنده اهتمام بالفلوس لان من شيمته الامانه يعني عكسنه بالضبط....زين هاي شراح نخليلهه و تطيب

رد عليه القديس الجلبي و قال....هذا من شيمته الوفاء ....يعني لا راح يقبل يسرق و لا راح يقبل يغدر بالعراق من اجل عيون ايران مثلي و مثلكم...و الله خالو خامنئي راح يشرنه عالحبل

وافق جلال الصغير "جدا"  على  ما قاله الجلبي و اللئيم و اضاف....هذا من شيمته عدم الغدر...يعني يختلف عني و عنكم....و كل فرق الموت اللي شكلناها لاغتيال الكفاءات و الطيارين راح تصير بخبر كان

وافقه شريكه في الجريمه هادي العامري و اردف ان الدكتور ماكس لن يقف مكتوف الايدي على كل المؤامرات التي ننفذها ....هذا مو مثلنا فهو من شيمته الحفاظ على صاحبه من اي سؤ و لن يسكت عن تقتيل الشعب العراقي لايقاع الفتنه بين كل الطوائف.....و الله قائد الحرس الثوري راح يشوي على اذاننا بصل

شاهبور الربيعي كان لا يهدا و يقطع الغرفه بالطول و العرض...قال للجميع....شوفو هذا من شيمته الصدق...يختلف عني و عنكم كليا....يعني و لا واحد من عدنه راح يكدر يوكف بوجهه....كل كلاواتنا راح يكشفهه....لا آني و لا علي الدباغ و لا بقيه الشلًه راح تسلم من شر هالدكتور....و المصيبه اذا هوه دكتور فراح يكشف كل شهاداتنا المزوره

عادل زويه جان لونه مخطوف و تكول و لا قطره دم باقيه بجسمه....فراد الطالباني ان يتشاقه وياه فقال له....ها عدًولي....لازم خايف لا دكتور ماكس يشم ريحه السرقات مالك و اولها سرقه مصرف الزويه و بعدين جنابك تصير علك بحلك اللي يسوه و اللي ما يسوه

اجاب عادل.....ماما جلال ...كافي شقه ثكيل....مو احنه دافنيهه سويه....عاد اللي يسمعك يكول انته شكد شريف....اذا آني ابوك مصارف....انته خيرات شمال العراق كلهه بجيبك و بجيب مسعود

مسعود العربنجي من سمع اسمه فز و ارتعب...اخذ يصيح و هو يرتجف.....هذا ماكس وفي و يكره الخونه مثلي و مثلكم....يعني راح يشم الخيانه من على بعد مائه كيلو....يعني راح يفضحنه جميعا و اولهم آني....اويلي عليج كركوك....راح تروح من ايدينه

الدكتور الشهرستاني كان يتخذ ركنا قصيا وهو يقضم اصابع يديه....فوكزه الدكتور علاوي " ما شاء الله لقب الدكتور منتشر بكثره و بوفره بين ربع الحراميه هذه الايام " و قال له...ها دكتور يومستاني...انته شبيك....فقال الدكتور حصيني ....يمعود...هذا متدرب تدريب بوليسي رهيب....يعني حجايه هروبي من سجن المخابرات و الفلم الهندي اللي سويته على هالسالفه راح تنكشف...و الله احمدي نجاد راح يعلكني من رجلي

ابو ريشه منزًل عرف الديك ماله و كاعد خانس.....سالوه انته شبيك....كالهم عجل يابه ما تعرفون ان ماكس بيه عاده يركض وره الطيور و يهلس ريشهه.....هاي شراح اسوي آني بهاي المصيبه...هذا راح يتركني ملص املط الريش و لا ريشه تسترني

ماما جلال كان يدمدم بالكرديه...ساله عمو صولاغ عن ما يفكر فيه فقال ماما جلال....و الله مشكله....هسه لقب الرئيس راح يتغير من ضخامه الرئيس الى رشاقه الرئيس باعتبار الدكتور ماكس رشيق و يتحرك مثل نسمه الهواء و آني يا دوب شايل نفسي....يعني محد راح حته يفكر يجدد الولايه مال آني...يا لتيف على هالورته " الورطه "...خطيه مام جلال

مقتدى حبيبي كان عصبيا ...ساله الصغير عن رايه فاجاب...هذا ماكس شجاع...لا يفر حين اللقاء...مو مثلي او مثلكم بس صارت الحديده حاميه على جيش المهدي و ابو درع شلت جوالاتي و انهزمت...يعني هسه الناس راح تكول بوله ماكس تسوه مقتدى و محًد راح يباوع بوجهي....يا امام انقذنا

و سال الجميع عن راي السيستاني بالمساله و لكن السيستاني آثر السكوت كعادته ووعدهم باعطاء الجواب بعد الدخول في خلوه شرعيه لمده عشر سنين

اتفق الجميع بعد هذا اللقاء العاصف ان ياتوا بالدكتور ماكس و ان يقابلوه وجها لوجه لحل هذه المشكله..فرئيس بهذه الصفات راح يكلب عاليها سافلها على سفله مثل هؤلاء و هذا امر لا يرضاه خالو خامنئي او حجي اوباما فالحل ان يتنازل ماكس عن اي منصب في الحكومه و كفى الله الخائنين شر الفرار

جاء ماكس الى منطقه الحظيره الخضراء و هو يدري لماذا استدعي.فوقف بينهم واعظا و قال

يا اولاد ال..... حتى نحن معشر المخلصين نعاف ان تتشبهوا بنا . الا تعلموا ان الشعب ملً منكم و من حكمكم الارعن. لقد بعتم ضمائركم للمحتل و قتلتم ابناء وطنكم " ان كان وطنكم العراق" من اجل مصلحتكم الشخصيه...لقد دمرتم بلدكم و اهلكتم الحرث و النسل لارضاء اسيادكم الايرانيين و الاميركان . لقد ابحتم دماء العراقيين لغايه دنيئه في انفسكم. الم تفكروا بمستقبل اجيال العراق الذين سيرثون حصاد زرعكم...الا تسألون انفسكم لماذا يريد الايرانيون و الاميركان و اليهود تدمير بلدكم...الا تسألون انفسكم و انتم الذين عشتم خارج الوطن اي وطن سيحميكم اذا دمر العراق...يا مجانين ...تربه العراق امانه في اعناقنا و انتم شر من يؤتمن لهكذا امانه...الشعب مل منكم و لا يريدكم...اتركوا الشعب في حاله و اتركوا العراق ان كنتم تبغون دماره...لا تهتموا بي ان كنت سافعل كذا و كذا بكم فان همي هو بلدي و ليس انتم....كلكم عندي نكره امام العراق...بئس ما زرعتم انتم و اسيادكم و اعلموا ان الصبح قادم ما طال الليل يا نكرات هذا العصر....دعوا العراق و ناسه و اغربوا عن وجوه العراقين المحبين لبلدهم 

كان الجميع ينصت بلا كلام و علامات الذل باديه على وجوههم...لو رميت ابره لسمعت صوتها...لا لانهم حسًوا بذنبهم بل لانهم لم يكونوا متوقعين انهم مكشوفين للجميع بهذا الشكل .....لحظات صمت رهيب مرًت على الكل.....و فجأه صاح احدهم يصوت عال.....يا جماعه اتحوسمت جيوبنا و احنا دنسمع كلام الدكتور ماكس....واحد من عدنه كشط جيوبنا كلها .....و هنا زمجر عمًار اللئيم و قال ...انعل بليسك يا احمد يا جلبي...احنا بيا حال و هوه بيا حال

هنا ابتسم الدكتور ماكس و قال.....و الله ذيب دكتور.... متفوت اي فرصه للسرقه اذا ما تقتنصهه...مثل جماعتك اللي كدامي....بس انته شويه اسرع